Мазаем и 23-м къыщалъхуа махуэр игъэлъэпӀащ ди нэхъыжьыфӀ Чэнджэщауэ Сэхьид Ӏэдэм и къуэм. Абы и ныбжьыр илъэс 97-рэ ирикъуащ. Ар Хэку зауэшхуэми гуащӀэдэкӀми я ветеранщ. Илъэс 97-р — щӀыхь зыпылъ ныбжьщ. Илъэсищэм пэгъунэгъу дыдэ хъуахэм зыхэпсэукӀа зэманым зыпэщӀэхуа гъэунэхуныгъэ псори къызэпачащ, абыхэм я нэхъ шынагъуэхэм ящыщщ Хэку зауэшхуэр. Апхуэдэщ Чэнджэщауэ Сэхьиди.
Ди нэхъыжьыфӀым и махуэмкӀэ ехъуэхъуащ Зеикъуэ къуажэ поселенэм и администрацэм и Ӏэтащхьэ Зэубыд Рустам Кърым и къуэр. Абы фӀыщӀэ, пщӀэ зыхэлъ псалъэхэр жриӀащ гугъуехь мымащӀэ къызэрызэринэкӀам, гъащӀэм и гъэунэхуныгъэ мытыншхэм лӀыгъэ, быдагъэ къызэрыщигъэлъэгъуам папщӀэ.
Ехъуэхъуащ узыншагъэ, насып, гупсэхугъэ иӀэну, илъэс куэдкӀэ псэуну икӀи Урысей Федерацэм и Президент Путин Владимир къыбгъэдэкӀа хъуэхъу тхылъымрэ къуажэ поселенэм и администрацэм къыбгъэдэкӀа саугъэтымрэ иритащ. Юбилярым быни 5 ипӀащ, къуэрылъхупхъурылъхуи 9, абыхэм къатехъукӀыжауэ нэрыбгэ 16 иӀэщ.
И гъащӀэ псом Сэхьид колхозым щылэжьащ. Зауэ нэужьми губгъуэм илэжьыхьащ, пенсэм кӀуэху. Иджыпсту и къуэмрэ и нысэмрэ я гъусэу мэпсэу. Нагъыщэ, медаль куэд иӀэщ.
Больше на Черкес хэку
Подпишитесь, чтобы получать последние записи по электронной почте.
