«ЩIыбагъкIэ зыри тщIэкъым…»

Илъэс ещанэр йокIуэкI Куэчэ Шамсудин Къурмэнбий и къуэр жылагъуэ Iуэхухэм жыджэру я ужь зэритрэ. Абы, зауэ операцэ хэхар здекIуэкI щIыпIэхэм Къэрэшей-Черкесым щыщу щыIэ щIалэхэм запищIауэ, нэхъ зыхуэныкъуэу, зыщIэлъэIуу хъуамкIэ щIэгъэкъуэн яхуохъу. Ди республикэм мылъкукIэ хуэщIауэ ис хыхьэхэкIырылажьэхэр Iуэхум къыхешэ, уеблэмэ езым и щIакхъуэ Iыхьэ къызыхих шырыкъущIэ IэщIагъэм мылъкуу къыхэкIыр ныкъуэ ирищIыкIыурэ, Iуэху пажэм — зауэлIхэр зыхуей хуэгъэзэным хелъхьэ.

СВО-р зэрыщIидзэрэ Шамсудин и къуэшым и щIалитI зэуапIэм Iутщ — зыр Шэшэным, адрейр Осетием ирашауэ. КъинэмыщIауэ, и малъхъэр Ставрополь, и къуэш нэхъыщIэр 34-нэ гвардейскэ мото-фочауэ бригадэ щхьэхуэм икIри Украинэм кIуащ, къэралым къахуигъэува зауэ къалэнхэр щагъэзэщIэну. — ЦIыхухъухэм хэкIыпIэу тIущ диIэр. Е зауэлI фащэ зыщыттIагъэу, Iэщэ къатщтэу Урысейм ифI зыхэлъ Iуэхур дэдгъэкIын папщIэ СВО-м дыхыхьэн хуейщ, е ди хэгъуэгум дыкъинэу, зэуапIэм Iутхэм щIыбагъ дахуэхъуу, тхузэфIэкIымкIэ дадэIэпыкъупхъэщ. Iуэхуншэу, сэбэп къэдмыхьу дыщыс хъунукъым.

Аращи, сэ зэуапIэ сыIутыфынукъым, ауэ зэпэщIэтыныгъэм кIэ игъуэтыхун, текIуэныгъэр я Iэрылъхьэ хъуауэ ди щIалэхэм къагъэзэжыхун тылым сыхуэлэжьэну си къалэнщ, — къыддогуашэ Шамсудин. 2023 гъэм гуманитар Iуэхухэр къыщрихьэжьам, абы ауи и гугъакъым и мурадхэр жылагъуэм къыдиIыгъыну.

Ар егупсыст: «КъэувыIэ симыIэу схуэщIэмкIэ щIалэхэм сащхьэпэнщ, схузэфIэмыкIIами си гур згъэкIуэдынкъым, Тхьэм жиIар щыIэщ». Псыпэр зэрыжэм псыкIэри ирожэ зэрыжаIэу, ди республикэм мылъкукIэ зыгуэр зыхузэфIэкIыу ис абазэ, адыгэ щIалэ щыпкъэхэм ар щажалIэм, и гум ириубыда IуэхуфIхэм щыхигъэдаIуэм, я дзыхь кърагъэзащ икIи кърихьэжьа Iуэхур нэхъыфIу зэригъэкIуэтэнум хуэдэу чэнджэщ захуэхэр къратащ.

Абы жэщ-махуэ имыIэу телефонкIэ къыпыщIащ, СВО-м щыIэ ди хэкуэгъухэм ядэIэпыкъуным ехьэлIауэ сыт щыгъуи сэбэп къыхуэхъуну хьэзырщ Ростов областым и ХабзэкъэгъэщI ЗэIущIэм и депутат, «Донэнерго» дзей зэгухьэныгъэм и генеральнэ унафэщI Хъырцыжь Мурат, КъЧР-м и ЦIыхубэ ЗэIущIэм (Парламентым) и тхьэмадэм и къуэдзэ, абхъаз-абазэ Дунейпсо конгрессым и Ищхьэ Советым и тхьэмадэ Ечзэч Мусэ, хыхьэхэкIырылажьэу Шыдхэ Зурабрэ Зауррэ. Мы зи цIэ къитIуа хэр узыфIэмыкIыжыну хэкупсэ-лъэпкъыпсэхэщ, ахэр жумарт зыхужыпIэ хъунщ, мащIэ IэбэкIэ зымыщIу гугъуехьым хэт цIыхум щхьэпэ защIэщ. «Нобэ Донэнерго» компанэм щыхьэщIащ ди ныбжьэгъуфI, псапащIэ емышыж Куэчэ Шамсудин!

Дэ абы ену дыпыщIащ СВО-м хэт къулыкъущIэхэр къызыщIэлъэIухэмкIэ къызэгъэпэщыным ехьэлIауэ. Мы щIалэр гузэвэгъуэ, щытыкIэ хьэлъэ иувам дэмыIэпыкъуу есакъым, гу къабзэщ. Шамсудин къысIэригъыхьэжащ 34-нэ гвардейскэ мото-фочауэ бригадэ щхьэхуэм, Маргелов и цIэр зезыхьэ «Барс-33» добровольческэ отрядым, Къэрэшей-Черкесым и «Афганец» псапащIэ фондым къикIыу къысхурагъэхьа ФIыщIэ тхылъхэр, «СВО-м хэтхэм зэрадэIэпыкъум папщIэ» медалыр. Ди хьэщIэ лъапIэм и гуапэ дыдэу къыхигъэщащ къулыкъущIэхэм дэIэпыкъуныгъэ ягъэгъуэтыным ди компанэм и гуащIэ IыхьэфI зэрыхэлъыр.

Си щхьэкIэ къызбгъэдэкIыу абы жиIам сыпэджэжыну сызэрыхуейр зыт — щIэхрэ псынщIэу ди зауэлIхэм ТекIуэныгъэр я Iэрылъхьэу я унагъуэхэм ирехьэж!» — къыхигъэщащ Хъырцыжь Мурат. Ар зэрагъэлъэпIа медалым хуэдэ къабзэ яIэщ езы Куэчэ Шамсудини, Шыд зэкъуэшхэми, Ечзэч Муси. ИкIи, гуапэ зэрыхъущи, и Iыхьлыхэм, къызыхэкIа абазэ лъэпкъым гумащIагъ хузиIэ мы щIалэм фIыуэ ищIэр зыми щибзыщIкъым, атIэ, сурэт трихыурэ интернетым хэIущIыIу щещIыж, дэри тлъэкI къэдмыгъанэу, а псори ди газетым къызэрытеддзэжыным, цIыхухэм зэралъэдгъэIэсыным дыпылъщ. И Iуэхухэм теухуауэ къызэрыджиIащи: «Хэт сыткIэ дыдэIэпыкъуами наIуэмэ нэхъыфIщ, дэ дызыунагъуэшхуэм хуэдэщ, щIыбагъкIэ зыри тщIэкъым…»

ЛЫХЬ Тимур