Бадзэуэгъуэм (июлым) и 25-м Хьэбэз къуажэм дэт, Гуцериев С. и цIэр зезыхьэ щэнхабзэмрэ зыгъэпсэхупIэмрэкIэ паркыр макъамэтедзапIэ студием хуэдэт… АтIэ, а махуэм утыку зэIухам къыщапщытэжащ «Озвучка мультфильмов» проект гъэщIэгъуэныр, абы хэта ныбжьыщIэхэри ягъэлъэпIащ. Творческэ щIалэгъуалэр зыхэта проектыр гуфIэгъуэ даущ макъкIэ гъэнщIауэ екIуэкIащ. Гу лъывэзгъэтэнщи, мы проектым и зэхэшакIуэу щытащ «Мой выбор» АНО-р.
«Мультфильмхэм хэт лIыхъужьхэр ди лъэпкъэгъу ныбжьыщIэхэм я макъкIэ гъэпсэлъэнымкIэ проектыр щедгъэжьащ Хьэбэз къуажэм дэт щIалэгъуалэ купсэм. Япэ IыхьэмкIэ: ролхэр яхуэгуэшыныр, командэкIэ зэхэгъэкIыныр — зэдзэкIакIуэхэр, сценаристхэр, лIыхъужьхэм я макъкIэ псэлъэнухэр, режиссёрхэр къыхалъытащ. Зэуэ жысIэнщи, Iуэхугъуэр гуфIэгъуэ даущкIэ, творческэ и лъэныкъуэкIэ гъэнщIауэ зэхэтащ: ныбжьыщIэхэм зызэрапщытащ хэт лIыхъужьым нэхъ екIуу и макъыр игъэIуми, уеблэмэ макъыщIэхэр къагупсысащ, зэпсэлъэныгъэ гъэщIэгъуэнхэр зэхашащ. А псоми къапэкIуащ къабзэу, дыхьэшхэну, къэмыгупсысауэ ягъэува макъхэр, псэ хуабагъэкIэ гъэнщIа роликхэр…», — къыддэгуэшащ «Мой выбор» АНО-м и эксперт, «Урысей щIалэгъуалэ грант» зэпеуэхэм щытекIуа Джазаев Исмэхьил. Мульфильмым макъ щIэгъэувэнымкIэ творческэ ехъулIэныгъэфIхэр къэзыгъэлъэгъуа ныбжьыщIэхэм щIыхь тхылъхэр яхуигъэфэщащ Хьэбэз районым и Iэтащхьэ Тэмазэ Рэмэзан.
Мы Iуэхугъуэм къеблэгъащ «Мой выбор» АНО щIалэгъуалэ купсэм и унафэщI Лэхъу Ларисэ, Хьэбэз къуажэм дэт, Хъупсырокъуэ Е. и цIэр зезыхьэ лицейм и унафэщI КIытIэ Еленэ, гъэсэныгъэ IуэхухэмкIэ и къуэдзэ Тутхэ Фатимэ, эксперт лэжьыгъэр зыгъэзэщIахэу, «Черкес хэку» газетым и редактор нэхъыщхьэ Абидокъуэ Люсанэ, адыгэ телевиденэм и журналист Мамхэгъ Беллэ, нэгъуэщIхэри. Адыгэ газетым и редакторым хъуэхъу гуапэхэр яхужиIащ щIалэгъуалэр зыхэт творческэ проектхэр къэзыгъэщIхэм, зыгъэзащIэхэм, щIэблэм я зыужьыныгъэм къару хэзылъхьэхэм.
Хъуэхъухэмрэ саугъэтхэмрэ хуэгъэфэщэныр зэфIэкIа нэужь, гуфIэгъуэ зэ хыхьэм щыпащащ Хьэбэз къуажэм дэт, Гуцериев С. и цIэр зезыхьэ щэнхабзэмрэ зыгъэпсэхупIэмрэкIэ паркым, «Сэ мультфильмхэр фIыуэ солъагъу!» щхьэщIэдзапIэм щIэту екIуэкIа зэпеуэ – нэгузыужь программэмкIэ. «НыбжьыщIэхэр зыхэта егъэджэныгъэ-гъэсэныгъэ пIалъэм къриубыдэу дэ нэрылъагъу тщыхъуащ абыхэм актер IэщIагъэм пыщIа творческэ лэжьыгъэм я нэр къызэрыхуикIыр. Абы къызэрымыкIуэу игъэгушхуащ ныбжьыщIэхэм ядэлажьэ IэщIагъэрылажьэхэр. ИкIи, зэрыслъытэмкIэ, я япэ дерсыр фIагъ хэлъу къайхъулIащ.
ГъэщIэгъуэныщэт уи нэгу щIэкIыну псоми фIыуэ тцIыху мультфильмхэм хэт лIыхъужьхэм я макъхэр ди районым щыщ ныбжьыщIэхэмкIэ – актёр зэ чий зыбгъэдэлъхэм зэрагъэIуар. Псом хуэмыдэу телъыджащэр абыхэм я лэжьыгъэр ягъэзащIэу уакIэлъыплъынрат: жэуаплыгъэ яхэлъу, гу къабзэкIэ, псэ хуабагъ халъхьэу бгъэдыхьащ ахэр мы творческэ лэжьыгъэм. Ар икъукIэ ди гуапэщ!» — къыхигъэщащ Тэмазэ Рэмэзан. Паркым къыщызэрагъэпэща махуэщIыр творческэу, зэпеуэхэр хэту зэрекIуэкIам къыдэкIуэу, ар икIи IэфI хъуащ.
АтIэ, махуэщIым и къызэгъэпэщакIуэхэм Iэнэм къытрагъэуващ «шоколад псыкъежэхыр», пхъэщхьэмыщхьэ къыпачагъащIэхэр, «фор къызыпыж бжьэхуцыр», нартыху пIэнкIар, хъарбыз щIыIэбзэр… ИщхьэкIэ зэрыжысIауэ, ныбжьыщIэхэр хэтащ купщIафIэу зэхэгъэува про граммэм: зэпеуэхэмкIэ, зэныкъуэкъуныгъэхэмкIэ гъэнщIауэ щытам. Паркыр зэщIаIэтащ программэм хэтахэми, абы еплъахэми я гуфIэгъуэ, дыхьэшх макъым. АтIэ, зэрызэпеуам щыщт: «Угадай мультфильм по смайликам», «Вспомни песни из любимых мультфильмов», «Угадай мелодию из мультфильма по первой ноте» лъэныкъуэгъазэхэр… Анэ-адэхэм фIыщIэ ин хуащIащ щIэблэр творчествэм дезыгъэхьэх, «Мой выбор» АНО-м щылажьэ балигъхэм; езы ныбжьыщIэхэми – гурыхуэу сыт хуэдэ IэщIагъэри зэрафIэгъэщIэгъуэным, зэрыдихьэхым папщIэ зэрыгушхуэри жраIащ.
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
