«ЩIалэгъуалэм спортыр къыхех!»

 Адыгэ-Хьэблэ къуажэм дэт «Сосрыкъуэ» физкультурэ-оздоровительнэ ком­плексым щызэхэтащ хэкупсагъэмрэ спорт псэкъарумрэ ятещIыхьа «Спортыр къыхэх!» фестивалыр. Мы IуэхуфIыр къезыхьэжьахэм ар къайхъулIащ къызэ­рымыкIуэ спорт махуэщIу, абы зэришэлIащ ныбжьыщIэ Iэчлъэчхэр, Адыгэ-Хьэблэ районым ит спорт еджапIэхэмрэ секцэхэмрэ я гъэсакIуэхэмрэ гъэсэн­хэмрэ, спортыр фIыуэ зылъагъу куэд.

 МЫПХУЭДЭ къыхуеджэныгъэм щIэта фестивалым и хьэщIэ лъапIэу щытащ КъЧР-м и ЦIыхубэ ЗэIу- щIэм (Парламентым) хэтхэр — «Зыуэ щыт Урысей» партым и хэгъуэгу къуда­мэм и зыгъэзащIэ комите­тым и унафэщI Джамбаев Руслан, депутатхэу Къардэнхэ Фатимэрэ Аслъэнхэ Алийрэ, КъЧР-м физкультурэмрэ спортымрэкIэ и министрым и къуэдзэ Агырбэ Мурат, Адыгэ-Хьэблэ, Нэгъуей районхэм я администрацэхэм я Iэтащхьэхэу Астэжь Мыхъутаррэ Хапиштов Муратрэ, «Сабий спорт» парт проек­тым и жылагъуэ советым и тхьэмадэ, республикэм каратэмкIэ и Федерацэм и президент Айбазов Аслъэн.

Ахэр ущие губзыгъэхэмкIэ, Iуэхуублэ хъуэхъухэмкIэ щIэблэм зыщыхуагъазэм къыхагъэщащ ерыщрэ щыпкъэу спортым бгъэдэт цIыхухэр зэпыщIэн, зэкъуэгъэувэн мыхьэнэр фести­валым зэрызэрихьэр. Спортсмен ныбжьыщIэхэм хуа­гъэфэщащ текIуэныгъэщIэхэмрэ гукъинэж дахэхэмрэ яIэну, тхьэгъэпсэу псалъэхэмкIи щхьэхуэу гъэсакIуэхэм зыхуагъэзащ къыдэкIуэтей щIэблэр хэкупсэу, спортым и хабзэ нэхъыфIхэм тету къэIэтыным хуащI хэлъхьэныгъэ уасэншэм пап щIэ.

СпортымкIэ чемпионы­щIэхэр къытхуэзыгъэтэджыну дызыщыгугъ педа­гогхэм я фIыщIагъэ къызэрымыкIуэхэр къыхалъытэри ЩIыхь тхылъхэмкIэ я цIэр къраIуащ. Дауэдапщэм и Iуэхугъуэ нэхъыщхьэу щытащ спортсменхэм зэ­рызагъэхьэзырар утыкум къыщыгъэлъэгъуэжыныр.

Зэхьэзэхуэ зэхуэмыдэхэм щытекIуахэмрэ призер щыхъуахэмрэ нэрылъагъу къащIащ боксымкIэ, Iэхуитлъэ- хуит бэнэкIэмкIэ, гимнастикэмрэ футболымрэкIэ зэфIэкIыу ябгъэдэлъыр — Адыгэ-Хьэблэ районым деж нэхъ жыджэру зыужьыныгъэ зыгъуэта спорт лIэужьыгъэхэмкIэ.

 «Спортыр къыхэх!» фестивалым и къыкIэлъыкIуэ къекIуэкIыгъуэр Нэгъуей районым щрагъэкIуэкIыну траубыдащ. Мы спорт ма­хуэщIыр ди республикэм къыщызэрагъэпэщ «Сабий спорт» парт проектымрэ «Урысейм и къару» Урысей спорт марафонымрэ япкъ иту, хэгъуэгум деж партым и цIыхубэ программэр щыгъэзэщIыныр нэхъыщхьэу.

Мыгъэрей фестивалыр теухуащ Хэкум и хъумакIуэхэм я Илъэсым, абыкIэ ди щIыналъэм и къалэ округхэмрэ районхэмрэ нэхъапэ къызэщIрагъэубыдэнущи, Черкесск къалэм щызэхэ­тыну спорт махуэщIыр фе­стивалым и кIэухыу щы­тынущ.

ЛЫХЬ Тимур