ЩIалэгъуалэм и гурыхуагъэр

Ди хэгъуэгум щыпсэу лъэпкъхэм я щэнхабзэхэм, къадекIуэкI хабзэхэм, тхыдэм фIыуэ хэзыщIыкIхэр наIуэ къэзыщI, акъылыр зыгъэлажьэ джэгу — этно-квиз тхьэмахуэ кIуам республикэ къалащхьэм щызэхэтащ. А Iуэху щхьэпэр къехьэжьэныр я жэрдэм хъуащ КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ и Министерствэмрэ «Алашара» жылагъуэ зэгухьэныгъэмрэ.

Абы хэтащ ищхьэ еджапIэ зэхуэмыдэхэм къабгъэдэкIа студенти 100-м щIигъу. ЩIалэгъуалэ гурыхуэр зэпеуащ лъэпкъхэм я щыIэкIэ-псэукIэм зэрыхащIыкIымкIэ, тхыдэ лэжьыгъэхэмрэ къуажэхьхэмрэ ират кIэрэ, Iыхьэ зэхуэмыдихыу гуэша темэхэм япкъ иту уэрэдхэр кърагъащIэкIэрэ. Этно-квизым и япэ махуэм зэхьэзэхуащ республикэм и колледжхэм щыщ команди 10. ЕтIуанэ махуэм эстафетэр яубыдащ ищхьэ еджапIэхэм щIэсхэм. Зэхьэзэхуэр къапщытэжащ абы хэтахэм зэхэту къахьа балл бжыгъэм елъытауэ.

ЕтIуанэ махуэм, этноквизыр ирагъэжьэн ипэ жылагъуэ, дин организацэхэм ядэлэжьэнымкIэ къудамэм и унафэщI Къуршэ Фаинэ щIалэгъуалэм фIэхъус ярихащ икIи къыхигъэщащ илъэс ещанэ хъуауэ Министерствэм зэхиублэ этно-квизыр джэгукIэ гъэщIэгъуэну зэрыщытыр. «Мыпхуэдэ дауэдапщэ хэр егъэкIуэкIыныр щхьопэ къалэн нэхъыщхьитI гъэзэщIэным: япэрауэ, лъэпкъыбэу зэхэт къэралым дызэрыщыщыр хьэкъ тщыхъуным, етIуанэрауэ — зызэхэтщIыкIыжкIэрэ икIи зыкъыдгурыIуэжкIэрэ, лъэпкъ щэнхабзэ щIэин бейхэр тхъумэным. Щхьэж и щэнхабзэр нэIуасэ къэфщIмэ, зэхуэмыдагъыу фызыпэщIэхуам фэ ефплъуи, пщIэ хуэфщIуи фе сэнущ», — жиIащ Фаинэ. Курыт еджапIэ хэхахэм япэ увыпIэр зыIэригъыхьащ «Дети гор» зи фIэщыгъэцIэ командэм. «Эволюция» командэр абы къызэрыкIэрыхуар очкоищ къудейщ. Ищхъэрэ Кавказ къэрал академием и «Кавказский полк» командэр ещанэ хъуащ.

Ищхьэ еджапIэхэм къабгъэдэкIа командэхэм бжьыпэр ихьащ КъЧКъУ-м и «Феникс»-м. Абы иужь иту къокIуэ «Синергия» финанспромышленнэ университетым и «Синергия традиций» гупыр. НэхъыфIищыр зэхуещIыж а университет дыдэм и «Этно-эрудиты» командэм. Япэ увыпIэр къэзыхьа гупхэр ягъэкIуэнущ мы гъэм ди хэгъуэгум щызэхэтыну «Межкультурный диалог» хэгъуэгузэпх щIалэгъуалэ форумым. Призёр хъуахэм ялъысащ кубокхэр, фIыщIэ тхылъхэмрэ медалхэмрэ. Этно-квизым хэта псоми фэеплъ саугъэтхэр хуагъэфэщащ.

АБЫКЪУ Къамырзэ