Хэку зауэшхуэм хэта, ТекIуэныгъэр къэзылъэща мымащIэ ди республикэм икIри, фронтым Iухьащ. Апхуэдэ лIыхъужьхэм языхэзщ АйкIэпщ Исуф Исмэхьил и къуэри.
Ар зауэм и япэ махуэхэм щыщIэдзауэ фронтым къыщыхута зауэлIхэм ящыщ хъуащ. Губзыгъагъэрэ акъыл жанрэ зыбгъэдэлъ щIалэр 145-нэ фочауэ бригадэм хыхьэ хэха артиллерийскэ дивизием и е 1-нэ батареем щыIэ тIасхъэщIэх къудамэм и командиру щытащ. Зауэм къыщигъэлъэгъуа лIыгъэм, хахуагъэм, щхьэмыгъазэу зэрыщытам къыхэкIыу, Исуф къыхуагъэфэщащ Вагъуэ Плъыжьым и орденыр, Хэку зауэшхуэ орденым и е II нагъыщэ зиIэр, «За боевые заслуги» медалыр.
Зауэ нэужь зэманым Исуф цIыху щыпкъэу, гуапэу псэуащ. Куэду, ерыщу лажьэт. И унагъуэр фIыуэ илъагъут, быныр Iэдэб яхэлъу игъасэт. Зауэм теухуауэ упщIэ щраткIэ, жиIэр мащIэт, а пIалъэ ткIийр игу къигъэкIыжыну зэрыфIэмыфIыр нэрылъагъут. ЖыIэпхъэщи, и Iыхьлыхэр АйкIэпщ Исуф зэрихьа лIыгъэм щыгъуазэ щыхуэхъуар ар дунейм ехыжа нэужьщ.
Миноборонэм и архивым зыхуагъазэри, абдеж зауэлIым теухуа дэфтэрхэр щызыIэрагъэхьащ. Абы и фIыщIэкIэ унагъуэм къищIащ зэхэуэхэр здекIуэкI щIыпIэхэм Исуф япэ сатырхэм яхэту зэуэн къызэрыхудэхуар. Апхуэдэу, абы нэгъуэщI зауэлIхэри и гъусэу, бийм и ебгъэрыкIуэныгъэ 12 къагъэувыIащ, нэмыцэхэм я Iэщэр зыщIэлъ хъумапIэр къагъэуащ, пулемёткIэ ди зауэлIхэм къаздыхэуэ щIыпIитI ягъэкIуэдащ. НэгъуэщI зы Iуэхугъуи дэфтэрхэм къаIуэтэжащ: зы жэщ-махуэкIэ бийм и щIыбагъкIэ зигъэпщкIуу шэдым хэса нэужь, хьилагъэкIэ нэмыцэхэм я зэпыщIэныгъэ кIапсэр зэпичри, зы «бзэгуи» гъэр ищIауэ щытащ.
АйкIэпщ Исуф сабиитху иIащ, абыхэм я быныжу 13 къащIэхъуащ, къуэрылъху-пхъурылъхухэми сабий 19 ягъуэтыжащ. Жагъуэ зэрыхъущи, абыхэм я нэхъыбэр Исуф илъагъун къыхудэхуакъым. ЗауэлIым дунейр ихъуэжащ и ныбжьыр илъэс 65-м иту. Ауэ адэм, дадэм теухуа хъыбархэр унагъуэм пщIэ хуащIу щахъумэ, къащIэхъуэ бынхэм АйкIэпщ дадэм Хэку зауэшхуэм щызэрихьа лIыхъужьыгъэр хуаIуатэ.
Зыгъэхьэзырар ГЪУКIЭКЪУЛ Иринэщ
Больше на Черкес хэку
Подпишитесь, чтобы получать последние записи по электронной почте.