Щэнхабзэ щIэиныр нобэрей гъащIэм

Черкесск къалэм дэт Сурэт Галереем и хэщIапIэм «Влияние национальных и культурных традиций на современную жизнь человека» щхьэщIэдзапIэм щIэту Къэрэшей-Черкесым и жылагъуэ Палатэм зэIущIэ щригъэкIуэкIащ.

Зэпсэлъэныгъэм кърагъэблэгъащ КъЧР-м щэнхабзэмкIэ и министр Агырбэ Зураб, жылагъуэ организацэхэм, щэнхабзэ IуэхущIапIэхэм я лIыкIуэхэр, жылагъуэ Палатэм хэтхэр. Щэнхабзэ щIэиныр хъума хъунымкIэ щыIэ Iэмалхэм здрипсэлъа, лъэпкъ щэнхабзэхэр ныбжьыщIэхэм ящымыгъупщэнымкIэ зэлэжьыпхъэхэмкIэ здызэхъуажэ утыку хьэлэмэт хъуащ зэIущIэр.
— Дуней псор зы щытыкIэм изыгъэувэ глоболизацэм лъэпкъ щэнхабзэхэр, хабзэ щIэиныр хъумэным и мыхьэнэр нэхъри нэхъ ин ещI. Щэнхабзэращ цIыху къэс адрейхэм къыщхьэщызыгъэкIыр, дызыщыщыр, дыкъызыхэкIар, дызыхуэкIуэр къыдгурыIуэнымкIэ дэIэпыкъуэгъу къытхуэхъур. Аращ зэманхэр зэпызыщIэу ди нэхъыжьхэм егугъуу зэрахьа я гъэунэхуныгъэхэр, Iущыгъэр, хабзэ хъугъуэфIыгъуэхэр щIэблэм ялъэзыгъэIэсыжыр.
Дэтхэнэ лъэпкъми къыдэгъуэгурыкIуэ хабзэхэр и лъабжьэщ лъэпкъ куэду зэхэт ди жылагъуэм и зэгурыIуэныгъэр, пщIэ зэхуэщIыныгъэр, — къекIуэлIахэм захуигъэзащ республикэм и жылагъуэ Палатэм и унафэщI Ляшовэ Еленэ. ЗэIущIэм хэтахэм къыхагъэщащ щэнхабзэр хъумэным хэхауэ гулъытэ зэрыхуэныкъуэр, икIи нэхъы бэу щIалэгъуалэр абы къыхэшэн зэрыхуейр. А Iуэхум зэрыдебгъэхьэхыфыну Iэмалхэми ирипсэлъащ.

Мы зэманым ныбжьыщIэхэм нэхъыфIу зыхаубыдэ хъыбарыр интернетым зэрепхам къыхэкIыу, ар абыхэм яхуэгъэзауэ къэгъэсэбэпыным псори арэзы техъуащ. Агырбэ Зураб къыхилъхьащ, театрхэм я артистхэр, щIыпIэ телевиденэм и лэжьакIуэхэр Iуэхум къыхашэу, лъэпкъ къэс я хабзэ гуэр щапхъэу къэзыгъэлъагъуэ теплъэгъуэ кIэщI цIыкIухэр зэхэгъэувэнымкIэ проект гъэхьэзырын хуейуэ. Ар адрейхэми дащтащ, апхуэдэ теплъэгъуэхэр социальнэ зэпыщIэныгъэхэмкIэ нэхъ пхырыбгъэкIыфу зэрыщытыр и тегъэщIапIэу.
Лъэпкъыбзэхэр хъумэнри щэхабзэм и зы Iыхьэ нэхъыщхьэу зэрыщытыр, ар ныбжьыщIэхэм къагъэсэб хъуным зэрыщхьэпэнымкIи къыхэлъхьэныгъэхэр щыIащ.

Апхуэдэу, щIалэгъуалэр къызэщIэзубыдэ фетивальхэр, форумхэр, мастер-классхэр, семинархэр нэхъыбэу егъэкIуэкIыпхъэу къалъытащ. Апхуэдэхэри щэнхабзэ мыхьэнэ зиIэ IуэхущIапIэхэм деж къыщызэрагъэпэщмэ зэрынэхъыфIыр жаIащ. А махуэм ящIа къыхэлъхьэныгъэхэр зэман кIэщIкIэ зэхагъэувэжу, къэрал къулыкъущIапIэхэм, жылагъуэ организацэхэм, егъэджэныгъэ IуэхущIапIэхэм хуаунэтIыну жаIащ, абы зэгъэуIуауэ зэрырилэжьэным хуэдэу.

БОРЭНЫКЪУЭ Мадинэ