Щапхъэгъэлъагъуэ нэхъыжьхэр

Жылагъуэ узыншэм и беягъ, и къулеягъ нэхъыщхьэр и цIыхухэращ. И махуащ нэхъыжьыфIхэр зи жьантIэм дэс лъэпкъым. Куэд я нэгум щIэкIащ, нэхъыбэжи фэкIэ ягъэващ ди нэхъыжьхэм — а щIэблэ хахуэм, губзыгъэм, блэкIам напэ къабзэрэ гу щабэу хуеплъэкIыжыфрэ, нобэми, къэкIуэнуми я фIыгъуэр хьэкъыу зыхэзыщIэу, щэхуу «шыкур» псалъэ купщIафIэмкIэ пэджэжыфым. Ди гуапэщ нобэ я цIэ итIуэну Хьэбэз районым щыщ, къыщалъхуа махуэхэр зыгъэлъэпIа ди нэхъыжь Iумахуэхэм.

ХЬЭМЩАУЭ Сэрэнэ Умар и пхъур мы гъэм бадзэуэгъуэм и 1-м илъэс 96-рэ ирикъуащ. Я къуажэгъу нанэр гулъытэншэ ящIакъым, езыми, и унагъуэми и гуфIэгъуэр дагуэшащ. ПсэукIэ-Дахэ къуажэ администрацэм и Iэтащхьэ Кэп Мурат и щхьэкIэ Хьэмщауэхэ еблэгъащ, УФ-м и Президент Путин Владимир къыбгъэдэкIыу нанэ Iумахуэм къыхуигъэкIуа хъуэхъу тхыгъэр хуихьыжри, и щхьэкIи къыбгъэдэкI псалъэ гуапэхэр хуигъэфэщащ.

Узыншагъэ быдэ, гукъыдэж мыкIуэщI, и унагъуэкIэ мамырыгъэрэ хуабагърэ нанэр щымыщIэну ехъуэхъуащ. ЖыIэпхъэщи, Сэрэнэ — бэшэчагъым, губзыгъагъым, лъагъуныгъэ гъунэншэм я щапхъэщ. ПщIэрэ щIыхьрэкIэ игъэнщIыфа и гъащIэ гъуэгуанэ кIыхьым къриубыдэу, Сэрэнэ пхъу хьэлэмэт — Радимэ къиIэтащ, игъэсащ, и гъащIэ зэхэщIыкI лъагэм щIипIыкIащ. Нанэм и хуабагъымрэ гуапагъымрэ къыщIэтэджащ быныр, бынырылъхур икIи дэтхэнэми нэхъыжьыфIым и хьэл-щэныфIхэр, и дуней тетыкIэ дахэр зыхиубыдащ.

Сэрэнэ-нанэ и унагъуэм сыт щыгъуи къыщокIуэкI зи уасэр мыкIуэщI хабзэфIхэр: пщIэ зэхуэщIыныр, зызэщIэгъэкъуэныр, гулъытэкIэ дэтхэнэри къэухъуреихьыныр. Аращ, атIэ, Сэрэнэ и щIэблэр зыщIипIыкIар: пэжыгъэ, лэжьыгъэр фIыуэ лъагъун, хэкупсагъэ къэмылэнджэж, и хэкумкIэ, и ХэкушхуэмкIэ, и лъэпкъымкIэ гушхуэныгъэрэ пагэныгъэрэ. И анэ къалэнри, и анэшхуэ пщэрылъри Сэрэнэ пылъхьэншэу зэригъэзэщIам и щыхьэтщ и бынунагъуэр зэрызэхэт хабзэфIхэр. Апхуэдэу къезыгъэжьа нанэм адэкIи пищащ а кIуэрабгъу захуэм. Къапщтэмэ, Сэрэнэ и гъащIэр — лъагъуныгъэм, псэемыблэжыныгъэм, къыхиха гъуэгум хуэпэжыным я тхыдэ наIуэщ. НэхъыжьыфI Сэрэнэ и махуэ къэс гуфIэгъуэкIэ, гулъытэкIэ, насыпыр къызэрилэжьамкIэ зэхэщIыкIыныгъэкIэ гъэнщIауэ щрет! Иджыри куэд къриугъэгъащIэ, фIыщэу къэзылъагъу и унагъуэм и хуабагъымрэ гуапагъымрэ зыщигъафIэу!

 ***

УНЭЖ Айшэт Исмэхьил и пхъум, Беслъэней къуажэм щыпсэум, мы махуэхэм игъэлъэпIащ и илъэс 98-р. И махуэ гуфIэгъуэр нанэм даIэтащ къыхуеблэгъа хьэщIэхэм — Беслъэней къуажэ администрацэм щылажьэхэм. Урысейм и Президентым къыхуигъэкIуа хъуэхъу псалъэ дахэхэр зэрыт тхыгъэ лъапIэм къеджэри, нанэм ар хуигъэфэщащ администрацэм и Iэтащхьэ Тхьэгъэпсэу Гарри. Илъэс куэд зэрылэжьам, и бэшэчагъымрэ губзыгъагъымрэ, ахэр щIэблэм щапхъэ хуищIу къызэрекIуэкIам я щIыхькIэ, Тхьэгъэпсэу Гарри нанэм ехъуэхъуащ гуапэу, гум къыбгъэдэкI фIыщIэ псалъэхэри щIигъужу. Узыншагъэ быдэ, гуапагъэрэ хуабагъэрэ, гулъытэ, щIэгъэкъуэн, унагъуэ зэIузэпэщыныгъэ щымыщIэну!

*** УНЭЖ Мачэ Гъулэ и пхъум бадзэуэгъуэ мазэм игъэлъэпIащ къыщыхъуа махуэр. Тылым и гуащIэрылажьэу щыта, гуащIэдэкI гъуэгуанэшхуэ къэзыкIуа нанэр Беслъэней къуажэм пщIэшхуэ щызиIэ нэхъыжьыфIщ. И гъащIэ гъуэгуращи — ар хэкупсагъэ хьэрэмыгъэншэм, бэшэчагъым я щапхъэщ. Иджыри сабийуэ, зауэ илъэс хьэлъэхэм, балигъхэм ящIыгъуу Мачэ тылым щылэжьащ. Псоми яхуэдэу къарууэ иIэмкIэ ТекIуэныгъэр къызэригъэгъунэгъуным хущIэкъуащ. Зауэ нэужьми увыIакъым, илъэс куэдкIэ лэжьащ гуащIафIэу икIи и Хэкум, хэгъуэгум хуигъэтIылъа и гуащIэ иныр, и псэемыблэжыныгъэр пщIэрэ щIыхьрэ зыхуэфащэщ. Мачэ къыщалъхуа махуэ гуфIэгъуэр дагуэшащ къыхуеблэгъа хьэщIэхэм. Абыхэм ящыщщ Беслъэней къуажэ администрацэм къыбгъэдэкIа лIыкIуэ гупри.

Нанэм и гуащIэдэкI хьэлэлым, и гъащIэ гъуэгуанэ дахэм, и дуней тетыкIэ екIум пэджэж фIыщIэ псалъэ гуапэхэр хуагъэфэщащ. Нэхъыщхьэр — Урысей Федерацэм и Президент Путин Владимир къыбгъэдэкIыу къыхуригъэхьа хъуэхъу тхыгъэри иратыжащ. Узыншагъэ быдэ, псэ хуабагъэ, гукъыдэж, гулъытэрэ гуапагъэрэкIэ къэухъуреихьауэ гъащIэ кIыхь ихьыну нанэм ехъуэхъуащ къыхуеблэгъахэр!

Зыгъэхьэзырар ТУАРШЫ Ирэщ