Жьакуэ щIыпIэ дахэ куэд иIэщ: Балуф, Дамыгъэшхуэ, ДамыгъэцIыкIу, АфIэунэхэ я Iуащхьэ, БакIулий мэз.
Жьакуащхьэ удэкIмэ, нэхъыбэжщ апхуэдэ щIыпIэ гъуэзэджэхэр: ШэмыгъапцIэ, Балътэчэпхъэн, Жьакуэкъуэ, Аршавэ и псынэ, Лоухэ ящI.
Илъэс куэдкIэ ШэмыгъапцIэ мэкъупIэ щыдиIащ. Си къуэш ТIалэрэ сэрэ мэкъу дызэреуэри гъэщIэгъуэнт.
ЩIыпIэр жыжьэт, екIуэлIэгъуейт. Абы къыхэкIыу пщыIэ хэтщIыхьурэ дыкъанэт. Уэшх къыщешхкIи, ди щыгъыныр зыщытхт, целлофаным кIуэцIытлъхьэт, аргъынэм кIэщIэтлъхьэти, дымыувыIэу деуэт. Удзыр щыцIынэм деж еуэгъуафIэщ, куэди пыдупщIт, иужькIэ дгъэщIагъуэу, ди фIэщ мыхъужу. Уэшхыр теужу дыгъэр къы щIидзыжа нэужь, щыгъын гъущэхэр зыщыттIэгъэжти, пщыIэм дыщIэтIысхьэжт.
НэгъуэщI зы гукъэкIыжи сиIэщ ШэмыгъапцIэ епхауэ. Зы гъэ гуэрым, сщIэжкъым зыхуэдэр, Жьакуащхьэ щекIуэкIауэ щытащ дельтапланеризмымкIэ СССР-м и чемпионат. Мэкъуауэни, мэкъуIэнащтэни димыIуэхужу, гуп дызэрыгъэхъути, абы деплъыну дыкIуэт. Дельтапланыр яIыгъыу спортсменхэр Красногорскэ станицэм и Iэгъуэблагъэхэм бгым ежэхти Псыжь псыхъуэм щхьэщылъатэт, зыкъаIэтыжт, уэгум иту къыдэкIыжти, бгъэхэм хуэдэу ди щхьэщыгум щыхуарзэт…
Дэбагъуэ Хьэтызэ
Больше на Черкес хэку
Подпишитесь, чтобы получать последние записи по электронной почте.
