Сабийхэм я гъэмахуэ зыгъэпсэхугъуэр

 Сабийхэм я гъэмахуэ зыгъэпсэхугъуэр къызы­хуэтыншэу къызэгъэпэщыным, дапщэщи хуэдэу, гулъытэшхуэ щрат ди республикэм. Къэрэшей-Черкесым егъэджэныгъэмрэ щIэныгъэмрэкIэ и министр Кравченко Иннэ Правительствэм и Унэм щригъэкIуэкIа къулыкъузэпх комиссэм и япэ зэIущIэм и утыку кърахьа Iуэхугъуэхэм ящыщщ ар. КъинэмыщIауэ, къызэ­хуэсахэр тепсэлъыхьащ УФ-м просвещенэмкIэ и Министерствэм и унафэкIэ са­бий зыгъэпсэхупIэ-зэIэзапIэ лагерхэр къызэгъэпэщы­нымкIэ веб-сайтхэр къэгъэщIын, мы гъэм гъатхэпэм и 17-м Минпросвещенэм къыдигъэкIа унафэм ипкъ иту гъэсэныгъэ программэхэр гъэпсын зэрыхуейм.

ЗэIущIэм хэтащ комиссэм хэт къулыкъу зэхуэмыдэхэм я лIыкIуэхэр, сабийхэм я узыншагъэм здыхагъахъуэ, зыздагъэпсэху лагерхэм я унафэщIхэр. Зэхуэсым зэрыщыжаIамкIэ, мы гъэм ди хэгъуэгум щылэжьэну къалэщIыб лагерхэм этнощэнхабзэ лъэпкъ Iуэхугъуэхэри къыщызэрагъэпэщынущ. Министрым жиIащ ар республикэм щыпсэу лъэпкъхэм я щэнхабзэ щIэинхэр хъумэным, егъэфIэкIуэным хуэунэтIауэ зэрыщытынур. КъинэмыщIауэ, Кравченко Иннэ зэ­хуэсым къеблэгъахэм ягу къигъэкIыжащ зыгъэпсэхупIэ лагерхэм ягъэкIуэнухэр къыщыхахкIэ, псом япэ зауэ операцэм хэт ди щIалэхэм  я унагъуэхэм щыщ сабийхэм, ныкъуэдыкъуагъ зытелъхэм, ОВЗ зиIэхэм гулъытэ нэхъ хуащIын зэрыхуейр.

ИужькIэ, зэIущIэм къыщыпсэлъахэщ республикэм егъэджэныгъэмрэ щIэныгъэмрэкIэ, узыншагъэр хъумэнымкIэ и Министерствэхэм, МЧС-м, МВД-м, Роспотребнадзорым я лIыкIуэхэр. Ахэр тепсэлъыхьащ щхьэж и пщэрылъ елъытауэ са­бийхэм я зыгъэпсэхугъуэ пIалъэм зэрыхуэхьэзырым.

Министрым и къуэдзэ Атаевэ Лейла жиIащ Луганск Республикэм щыщу ди щIы-налъэм зыщагъэпсэхуну кърагъэблэгъа сабий 750-м папщIэ зыгъэпсэхугъуэ лагерым и бжэр накъыгъэм и 1-м къызэрызэIуихынур. Ауэ, ди хэгъуэгум щыщ  цIыкIухэм я зыгъэпсэху­гъуэ пIалъэр щыщIидзэнур мэкъуауэгъуэм и 1-ращ.

— Лагерхэр лэжьэнущ накъыгъэ мазэм къыщы­щIэдзауэ фокIадэ мазэри хиубыдэу. КъинэмыщIауэ, республикэм и Iэтащхьэм и жэрдэмкIэ, Хэкум и хъумакIуэм и Илъэсым ипкъ иту, «ЩыIэщ апхуэдэ IэщIагъэ – Хэкур хъумэн» хэкупсагъэ-спорт лэжьыгъэм щытекIуа сабий 300-м махуищкIэ зыщрагъэгъэпсэхуащ къалэ-лIыхъужь Волгоград, СВО-м хэтхэм я унагъуэм щыщ, ныкъуэдыкъуагъ зытелъ, ОВЗ-м хиубыдэ са­бийхэм щыщу нэрыбги 100 «Адель», «Жемчужина Кавказа» зыгъэпсэхупIэ-зэIэзапIэ IуэхущIапIэхэм махуитIкIэ щыIащ. Мы лэжьыгъэм адэкIи пытщэнущ, — жиIащ Атаевэ Лейла.

КъинэмыщIауэ, нэхъы­щхьэу зэIущIэм къыщаIэта упщIэхэм ящыщщ зызыгъэпсэху сабийхэр зи нэIэм щIэхуэну гъэсакIуэхэмрэ вожатэхэмрэ я щIэныгъэр абы тегъэпсыхьауэ зэрыщыты­пхъэр. ЖаIащ зэманым декIу щIэныгъэ зыбгъэдэлъ гъэсакIуэхэм, вожатэхэм, чэнджэщэгъухэм сабийхэм я зыгъэпсэхугъуэ зэманыр фIагъ хэлъу ягъэкIуэным­кIэ сэбэпышхуэ зэрыхъур.

Къулыкъузэпх комиссэм и нэIэм щIигъэуващ 2025 гъэм сабийхэм я зыгъэпсэхугъуэ пIалъэр тыншыгъуэу къызэгъэпэщынымрэ егъэкIуэкIынымрэкIэ ягъэбелджыла пщэрылъхэр зэ­рызэфIахым кIэлъыплъыну.

ЕЗАУЭ Маринэ