Пшыхьым къикIыу

НАРТОКЪУЭМ и юбилейр щагъэлъэпIащ Байрамуковэ Хьэлимэт и цIэр зезыхьэ Къэрал Лъэпкъ библиотекэм. МахуэщI пшыхьым кърагъэблэгъащ жылагъуэ творческэ интеллигенцэр.

Тхылъ хъумапIэм и унафэщI Хапчаев Сэлыхь дауэдапщэр къыщызэIуихым жиIащ: «Дэ нобэ дыкъызэхуэсащ библиотекэм илъэс бжыгъэ ныбжьэгъугъэкIэ къыпыщIа Нартокъуэ СулътIан къыщалъхуа махуэр хуэтIэтыну. Абы ди сыт хуэдэ гугъуехьри, гукъэкIри, ехъулIэныгъэри къыддегуэш, чэнджэщэгъуу, акъылэгъуу къыткъуэтщ.

Сехъуэхъуну сыхуейщ СулътIан илъэс блыщI зэрырикъуамкIэ, узыншагъэ быдэ, насып, творческэ текIуэныгъэщIэхэр иIэну», — жиIэри, библиотекэм и лэжьакIуэхэм къабгъэдэкIыу юбилярым ФIыщIэ тхылъ хуигъэфэщащ.

Абы иужькIэ утыкум кърашащ КъЧР-м и цIыхубэ артист Хьэчыкъуэ Мыхьэмэт и деж зыщызыгъасэ бэрэбэнауэ гупыр, пхъэцIычымрэ пхъэтIаркъэмрэ зыхэт макъамэ гурыхьыр Iэрыхуэу кърагъэкIащ.

Къэрэшей-Черкесым лъэпкъ IуэхухэмкIэ, цIыхубэ зэпыщIэныгъэхэмрэ печатымрэкIэ и министрым и япэ къуэдзэ Хубиев Ислъам щыхъуахъуэм къихигъэщащ Нартокъуэр тхакIуэусакIуэу ди хэгъуэгум адэжкIэ къызэрыщацIыхум гулъытэ лей зэрыхуэщIыпхъэм. «СулътIанрэ сэрэ зыкъомыфI щIауэ дызэроцIыху, дызэрогъэныбжьэгъу. Журналистикэм ехьэлIауэ и чэнджэщ сыхуэныкъуэу зыхузогъазэ зэпыт. ФIыщIэ хуэсщIыну игъуэщ. АтIэ, дэIэпыкъуэгъуншэу газет зыгъэхьэзыру, къыдэзыгъэкIыу, уеблэмэ пощтзехьэу щыту узрихьэлIэнур мащIэ дыдэщ иджырей зэманым. ИкIи, зы егъэлеиныгъэ хэлъкъым, а псори хузэфIэкIыу СулътIан къытхэтщи, хуэфэщэн пщIэ хуэдывгъэщI. Зы шэчи къысхутехьэнукъым ар адыгэлI зэрырикъум, сыт щхьэкIэ жыпIэмэ, «адыгэм» и мыхьэнэр нэхъ инщ «лъэпкъым» нэхърэ. Къыщалъхуа махуэм сыт хуэсхьын, сыткIэ згъэгуфIа хъун си ныбжьэгъур жысIэурэ, згъэтIыгъуэу щылъа сурэт дахэр къыхуэсхьащ абы, адыгэм и шыфэлIыфэр къызэрыщыр, — жиIащ Хубиев Ислъам.

Пшыхьым щыIахэм ящыщщ Мейкъуапэ къалэм и «Адыгэ-Хасэм» и тхьэмадэ Вындышхуэ Заурбий, УФ-м и тхакIуэхэм я Союзым и секретарь ЕтлIыхъу Олег, УФ-м и пэщIэдзэ IэщIагъэ егъэджэныгъэм щIыхь зиIэ и лэжьакIуэ, тхакIуэ Братковэ Татьянэ, абазэ лъэпкъым и нэхъыжь Советым и тхьэмадэ Аубэч Мухьэдин сымэ.

Утыкур ягъэдэхащ Къэбэрдей-Балъкъэрым и цIыхубэ артист Зеущэ Iэуес, Дагъыстаным и цIыхубэ артист Кудайбердиев Ехья, Къэрэшей-Черкесым и цIыхубэ артист Алиев Хорлам сымэ.

Илъэс плIыщIым щIигъуауэ къалэмыр жану зыгъэлажьэ журналистым и гъащIэ зэхэщIыкIым хэзыгъэхъуа, зезыгъэужьа ныбжьэгъуфIхэр къритащ и IэщIагъэм. — КъызэрыщIэкIамкIэ, журналистикэр — Тхьэр къызэрысхуэупса тыгъэщ, — жеIэ СулътIан. — Ди республикэм гу зылъыттапхъэу, тлъагъупхъэу исыр мащIэкъым, къэхъукъащIэ гъэщIэгъуэну дызыхэплъэри нэхъыбэжщи, зыри блэзмыгъэкIыу си газетым къызэрытездзэжыным сыхущIокъу. ИтIани, апхуэдэ щIыкIэу сэри си гуащIэ Iыхьэ хызолъхьэ тхылъымпIэкIэ цIыхум Iэрыхьэ хъыбарыт Iэмалыр къызэтегъэнэным, — щIегъуж юбилярым.

Дуней псом къыщыдэкI газетхэм хуэдэу бзэ зэмылIэужьыгъуэхэм я къабзагъэр нэхъыфIу къэзыхъумэн зэрыщымыIэм шэч къытрихьэкъым Нартокъуэ СулътIан. — Си гум жеIэ, си фIэщи мэхъу сэ иджыри творческэ Iуэху дахэхэр къызэрыспэщылъыр. ЦIыхухэм сащхьэпэну, сылэжьэну гупыж сиIэщ!

ЛЫХЬ Тимур