Военнэ ищхьэ еджапIэм щIэныгъэ къыщыщIэпх къудейкъым, атIэ абдежщ Хэкум къулыкъу хуэщIэным ухуэхьэзыру, зэпIэзэрыт ухъуауэ балигъ гъащIэм ущыхыхьэр. А пIалъэр, шэчыншэу, уи хьэлщэныр зыпсыхь, пэшэныгъэм и фIагъхэм зезыгъэужь икIи хэкупсагъэ ин къыпхуэзыгъэушщ.
Ди къэралым нэхъыфI дыдэу ит ищхьэ военнэ еджапIэхэм IэщIагъэ щызрагъэгъуэтащ Хьэбэз лицейр къэзыуха куэдым, абыхэм яхэтщ иджыри студент гъуэгур къызэпызымычауэ, зи гуращэ зэгъэхъулIэным жану хуэкIуэхэри. Мис ар щыхьэт тохъуэ дяпэкIэ зауэ IэщIагъэм хуеджэну мурад зыщIахэр Хьэбэз лицейм лъабжьэ быдэ иIэу къызэрыщIигъэкIым. Военнэ ищхьэ еджапIэхэр ди лицейм щIэсхэм я еджэныр зэфIэкIауэ щахуеблэгъэнум темыпыIэжу поплъэ, езы щIалэ цIыкIухэри хуабжьу щIохъуэпс я гъащIэр цIыхухъу IэщIагъэм епха хъуным.
Нобэ е 11-нэ классхэм хэсхэм яIущIащ Хьэбэз, Абазэ районхэм я военком Темыр Иналрэ военкоматым и къудамэм и унафэщI Хьэмдэхъу Арсенрэ. Ахэр щIалэгъуалэм къахутепсэлъыхьащ военнэ ищхьэ еджапIэхэм щIэныгъэ къыщыщIэпхыным фIыуэ хэлъым, еджапIэр къэзыухахэм Урысей Федерацэм IэщэкIэ Узэда и Къарухэм и сатырхэм хыхьэн, ипэкIэ щыкIуэтэн папщIэ лъэкIыныгъэу щыIэм. КъулыкъущIэхэм гулъытэ хэха хуащIащ иджырей зэманым нэхъ щIэупщIэ зиIэ хъуа IэщIагъэхэм: хъыбарегъащIэ технологиехэм, радиоэлектроникэмрэ кибершынагъуэншагъэмрэ яхуэгъэзам. Абыхэм зэрыжаIамкIэ, нобэ дунейм щытлъагъу зауэ зэпэщIэтыныгъэхэр ауи ирагъэкIуэкIыфынутэкъым зауэлIхэр техникэ лъэщкIэ къызэгъэпэщауэ щымытамэ. Военкоматым къикIахэм я гугъу ящIащ къулыкъу IэщIагъэхэр здадж ищхьэ еджапIэм щIэтIыcхьэнум тхылъу зэхуихьэсыпхъэмрэ и Iэпкълъэпкъыр ипсыхьын зэрыхуеймрэ.
ЕджакIуэхэм яфIэгъэщIэгъуэну къулыкъущIэхэм яупщIт общежитэ гъащIэр зэрыгъэпсам, стипендэхэр зэратым, спортымрэ щэнхабзэмрэ ехьэлIа дауэдапщэхэм зэрыхагъыхьэм ятеухуауэ. Мы зэIущIэр щхьэпэ хъунущ военнэ IэщIагъэр къыхэзыхыну гупсысэмкIэ. ИкIэм-икIэжым абыхэм къыхахыжынур хэт ищIэн, ауэ дыгугъэнщ ди Хэкум ифI зыхэлъ лъагъуэ теувэну!
АБЫКЪУ Къамырзэ
Больше на Черкес хэку
Подпишитесь, чтобы получать последние записи по электронной почте.
