«Псэухэр фIыуэ пхуэлъагъунукъым, хэкIуэдахэм я фэеплъыр пхуэмыхъумэмэ»

 Совет Союзым и маршал Рокоссовский К. и псалъэхэр и щхьэщIэдзапIэу, Хьэбэз районым хыхьэ Али-Бэрдыкъуэ къуажэм дэт е 2-нэ курыт еджапIэм «ЛIыхъужьым и Партэ» къыщызэIуа­хащ Гаджимагомедов Нурмагомед и фэеплъу. Мы щIалэ хахуэм и цIэр еджапIэм и тхыдэм къыхэнащ.

Урысей къулыкъущIэ, лейтенант, 247-нэ Кав-каз къэзакъ гвардейскэ десант-ебгъэрыкIуэ дзэ пакIэм и ротэм и командир Гаджимагомедов Нурмагомед Кулинск районым хыхьэ Кани дагъыстан къуажэм къыщыхъуащ. Урысейм и ВДВ-м и Кавказ къэзакъ полкым къулыкъу щищIащ. 2022 гъэм мазаем (февралым) зауэ операцэ хэхам щыщIидзэм, Хэкум и хуитыныгъэмрэ и хьэлэмэтхэмрэ зыхъумэну къэувахэм яхэтащ. Абы сыт щыгъуи жиIэт: «СылIэми нэхъыфIщ, гъэру зыст нэхърэ». Апхуэдэт и хьэл-щэныр — цIыху хахуэт, щхьэмыгъазэт. Зэхэуэ гуащIэ гуэрэм Нурмагомед уIэгъэ хьэлъэ щыхъуащ. Арами, и къарум къихьыху бийм пэщIэтащ. ХузэфIэмыкIыж щыхъум, гъэру зимытын щхьэкIэ, къэзыухъуреихьа боевикхэри здихьри, зыкъигъэ­уэжащ.

2022 гъэм гъатхэпэм (мартым) и 3-м Урысейм и Президент Путин Владимир и унафэкIэ, Нурмагомед «Урысей Федерацэм и ЛIыхъужь» цIэр къыфIащащ (дунейм ехыжа нэужь). Апхуэдэ зауэ нагъыщэ лъапIэр абы къыхуагъэфэщащ и зауэлI къалэнхэр игъэзащIэу лIыгъэрэ гуеигъэрэ къызэригъэлъэгъуам къыхэкIыу.

Дауэдапщэм ипкъ иту, Гаджимагомедов Нурмагомед и гъащIэмрэ и лIыхъужьыгъэмрэ теухуауэ документальнэ нэтын къагъэлъэгъуащ. Къызэхуэсахэр ирагъэплъащ сурэт гъэлъэгъуэныгъэхэм, Нурмагомед къыдалъхуахэм, и Iыхьлыхэм, къулыкъу къыдэзыщIахэм щIалэм теухуауэ къаIуэтэжа гукъэкIыжхэмрэ ди сэлэтым зауэ операцэ хэхам щызэрихьа лIыгъэмрэ къызыхэщыж теплъэгъуэхэм. Псом хуэмыдэу, къызэхуэсахэм гукъинэж ящыхъуащ лIыхъужьым и анэ Мазаевэ Сапижэт и псалъэхэр. Абы фIыщIэ яхуищIащ еджапIэм и унафэщIхэмрэ еджа кIуэхэмрэ, и къуэм и фэеплъым апхуэдэ пщIэ­рэ щIыхьрэ зэрыхуащIам папщIэ. Анэм къыхигъэщащ лIыхъужьхэм я фэеплъыр хъумэным къытщIэтаджэ щIэблэмкIэ мыхьэнэшхуэ зэ­риIэр икIи жиIащ и къуэм зэрихьа лIыгъэр еджакIуэхэм щапхъэ зэрахуэхъунур.

Хьэбэз район администрацэм и Iэтащхьэм и къуэдзэ Унэжь Олег и къэпсэлъэныгъэм къыхигъэщащ Гаджимагомедов Нурмагомед и цIэр лIыхъужьыгъэмрэ гуеигъэмрэ я нагъыщэ зэрыхъуар.

— Партэр тематическэ дерсхэр здыщрагъэкIуэкIыну, ветеранхэмрэ зауэ зэхуэмыдэхэм хэтахэмрэ здыщаIущIэну, мыхьэнэшхуэ зиIэ гъэсэныгъэ Iуэхухэм здыщытепсэлъыхьыну щIы­пIэ хъунущ, — къыхигъэщащ Унэжь Олег.

«ЛIыхъужьым и Партэ»-м япэ дыдэу дагъэтIысхьащ еджапIэм фIы дыдэу щеджэ Нэней Альбертрэ Мэремыкъуэ Инарэрэ.