ТекIуэныгъэм и махуэщIым ехъулIэу, республикэм къыбгъэдэкIыу зауэ операцэ хэхар здекIуэкI щIыпIэмрэ госпиталымрэ тонн 18 хъу псы къабзэ хурагъэшащ.
Псы тонни 9-р СВО-р зэрыщIидзэрэ абы Iут 34-нэ гвардейскэ мотострелковэ бригадэм хэт ди зауэлIхэм яIэрыхьэнущ.
Адрей тонни 9-р зауэлIхэм здеIэзэ, я узыншагъэм здыхагъэхъуэж Ростов зауэ клиническэ сымаджэщым хуашэнущ. Мы псапащIэ гулъэр къызэгъэпэщынымкIэ дэIэпыкъуэгъу хъуащ УФ-м ФедерацэмкIэ и Советым зыхъумэжыныгъэмрэ шынагъуэншагъэмрэкIэ и комитетым и тхьэмадэм и япэ къуэдзэ Бондарев Викторрэ республикэм къыбгъэдэкIыу УФ-м ФедерацэмкIэ и Советым хэт сенатор Къэзэнокъуэ Кърымрэ. — КъыкIэлъыкIуэ псапащIэ гулъэр госпиталым и унафэщIым къыбгъэдэкIыу республикэ военкоматым кърагъэхьа лъэIумрэ сыт щыгъуи дызыпыщIа 34-нэ бригадэм хэт ди хэкуэгъу зауэлIхэр зыхуэныкъуэмрэ япкъ иту къызэдгъэпэщащ. Мы Iуэхур къызэрежьэрэ зауэлIхэм ядэIэпыкъуныр «Зыуэ щыт Урысей» хэгъуэгу къудамэм и лэжьыгъэр зыхуэунэтIа лъэныкъуэхэм ящыщщ, — жиIащ партым и хэгъуэгу къудамэм и исполкомым и унафэщI Джамбаев Руслан.
Къыхэгъэщыпхъэщи, партым и хэгъуэгу къудамэм СВО-р къызэрежьэрэ зауэлIхэми, абыхэм я унагъуэхэми, къэралым и хэгъуэгущIэхэм щыпсэухэми ядэIэпыкъуныр зэпигъэукъым. Къапщтэмэ, хэгъуэгу къудамэр хэту, зауэр здекIуэкI щIыпIэм псапащIэ гулъэ тонн 1300-м щIигъу ирагъэшагъэххэщ. Абы хохьэ шхыныгъуэхэр, псыр, хущхъуэхэр, щыгъын хуабэхэр, транспорт, техническэ Iэмэпсымэхэр, нэгъуэщIхэри.
БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
