ПсапащIэ Iуэхум и къарур лъэщщ

Бзылъхугъэхэм я Дунейпсо махуэм ипэ къихуэу «Зыуэ щыт Урысей» партым жылагъуэ дэӏэпыкъуныгъэмкӏэ и Штабым зэӏущӏэ гуапэ щекӏуэкӏащ, хэгъуэгум и мысату организацэхэм я унафэщӏ бзылъхугъэхэр хэту. Зэхыхьэр «Зэӏущӏэфӏхэр» жыхуиӏэ акцэм ипкъ иткӏэ къызэрагъэпэщащ. Нэхъыщхьэу абдеж щытепсэлъыхьащ мысату организацэхэм епха бзылъхугъэхэм я лэжьыгъэм и мыхьэнэ лъагэм, абыхэм я къарур зэхыхьэмэ, я лъэкӏыныгъэм нэхъри зэрефӏэкӏуэнум.

Зэпсэлъэныгъэм хэтащ «Зыуэ щыт Урысей» партым и хэгъуэгу Исполкомым и унафэщI Джамбаев Руслан, КъЧР-м и Цӏыхубэ Зэӏущӏэм (Парламентым) щӏэныгъэмкӏэ, егъэджэныгъэмкӏэ, щэнхабзэмрэ щӏалэгъуалэ ӏуэхухэмрэкӏэ и комитетым и унафэщӏ Черняевэ Татьянэ, къэралым и хьэлэмэтым хуэгъэзауэ лажьэ мысату организацэхэм я унафэщӏхэр. Псом япэ бзылъхугъэхэм я махуэщӏымкӏэ яхъуэхъуащ Джамбаев Руслан. — Мысату организацэхэм республикэм лэжьыгъэшхуэ щрагъэкӏуэкӏ. Си щхьэкӏэ срогуфӏэ дызэгурыӏуэу дызэрызэдэлажьэм. Ди хэгъуэгум деж нэрылъагъуу, зыхэпщӏэу, дызэщӏыгъуу зы проекткъым щыдгъэзэщӏар. СВО-р зэрыщӏидзэрэ, абы щыӏэхэм ядэӏэпыкъунри фи ӏуэхум къыхыхьауэ, зэпымыууэ ивогъэкӏуэкӏ. Абыкӏэ фӏыщӏэ мыухыж фхузощӏ. Кавказ республикэхэм я бзылъхугъэ пашэхэр зэрылъэрыхьыр дэнэ дежи щынэрылъагъущи, адэкӏи фрефӏакӏуэ! — жиӏащ Джамбаевым. А махуэм кърагъэблэгъа бзылъхугъэу хъуам республикэм щыпсэухэм ядэӏэпыкъуныр япэ ирагъэщу, я ӏуэхум псэ къабзэкӏэ зэрыпэрытым папщӏэ, КъЧР-м и Цӏыхубэ Зэӏущӏэм, партым и хэгъуэгу къудамэм къабгъэдэкӏыу Щӏыхь тхылъхэр иратащ. — Бзылъхугъэ пашэхэм я зэфӏэкӏыр куэдкӏэ зэрынэхъыбэм шэч хэлъкъым. Дэ зэкъым дызэрызэхуэзэр, икӏи фи лэжьыгъэм деж фызыпэщIэхуэ гугъуехьхэр долъагъу. Лэжьыгъэм къыдэкӏуэу фи щхьэми, фи унагъуэми факӏэлъыплъыжын къыфхудохуэ. Арами псори фхузэфӏокӏ. Бзылъхугъэр псапащӏэ ӏуэхур зыгъэкӏуатэ къаруушхуэщ. Фэ фщыщ дэтхэнэми а лъэныкъуэмкӏэ илъэкӏ къызэримыгъанэр хьэкъщ, — захуигъэзащ Черняевэ Татьянэ.

Адэкӏэ зэпсэлъэныгъэ гуапэ къыкӏэлъыкӏуащ. Щхьэж зыпэрыт лэжьыгъэм къытепсэлъыхьащ, гулъытэрэ дэӏэпыкъуныгъэу зыхуэныкъуэхэр къыхагъэщащ. Къыхэлъхьэныгъэщӏэхэри къыщыӏуащ. Ахэр «Зыуэ щыт Урысей» партым и лъэпкъ программэщӏэр щызэхагъэувэкӏэ къыхалъытэну жаӏащ.

БОРЭНЫКЪУЭ Мадинэ