Пилотыншэ авиацэм хэтыну IэщIагъэлI нэхъусахэр Къэрэшей-Черкесым егъэхьэзыр. Ищхъэрэ-Кавказ къэрал академием къыщызэIуахащ цIыху имысу лъатэ аппаратхэм здыхуагъасэ курсхэр.
Абы теухуауэ и телеграм-каналым хъыбар кърилъхьащ хэгъуэгум и Iэтащхьэ Темрезов Рэшид. Егъэджэныгъэ программэм хухахынущ академическэ сыхьэти 128-рэ икIи абы трагъэкIуэдэнущ мазитIрэ ныкъуэрэ. Курсыр теорие защIэу зэхэтынущи, студентхэм пилотыншэ аппаратхэр зищIысыр нэхъ тэрэзу зэпкърахыфынущ, абы и тхыдэм, лIэужьыгъуэу щыIэм, и къэгъэсэбэпыкIэм хуеджэнущ. ЩIалэгъуалэм зригъэгъуэта щIэныгъэр игъэунэхужыну Iэмал иIэнущ симуляторхэмкIэ джэгукIэрэ, щIыпIэ сэтейхэм зыщигъасэкIэрэ. Iуэхур зэфIэкIынукъым иужьрей аттестацэр хэмыту. АбыкIэ уасэ хуащIынущ курсым кIуахэм щIэныгъэрэ Iэзагъэу дерсхэм къыхахам.
«Къыхэзгъэщынщи, иджыпсту дерсхэр онлайн гъэпсыкIэм иту йокIуэкI, адэкIэ студентхэм зэIущIэ драгъэкIуэкIын щIадзэнущ. Курсым зыхатхащ Ищхъэрэ-Кавказ къэрал академием щылажьэ, Урысей Федерацэм и ЛIыхъужь Боташев Къэнэмэт и цIэр зезыхьэ еджапIэ Купсэм и курсант 33-м. Шэч хэлъкъым, пилотыншэу лъатэ аппаратхэр зезыгъэкIуэну икIи зезыхьэну IэщIагъэлIхэр гъэхьэзырыныр — ар иджырей гъащIэм къытхуигъэувауэ нобэкIэ дызыхуэныкъуапэщ. Мы зэманым пилотыншэ авиацэр зэуапIэхэми къыщагъэщхьэпэ, къыгуэпх мыхъунуи епхащ мэкъумэш хъызмэтым, ухуэныгъэм, туризмэм, дыкъэзыухъуреихь дунейр хъумэным ехьэлIа IэщIагъэхэм, нэгъуэщI куэдми. IэщIагъэлI нэгъэсахэр дгъэхьэзырмэ, абыхэм инновацэ технологиехэр ипэкIэ ягъэкIуэтэнущ, пилотыншэ аппаратхэр къулыкъу зэхуэмыдэхэм къыщагъэсэбэпыф хъууэ ягъэпсынущ, икIи, абы къикIыр аращи, ди республикэм и зыужьыныгъэм хэлъхьэныгъэшхуэ хуащI къудейуэ щымыту, Урысейми ифI дагъэкIынущ», — къыхигъэщащ хэгъуэгум и лIыщхьэм. ЛЫХЬ Тиму
Больше на Черкес хэку
Подпишитесь, чтобы получать последние записи по электронной почте.
