НэхъыщIэм нэхъыжьыр и щапхъэу

Унагъуэм, лъагъуныгъэмрэ икърарымрэ я Махуэм республикэм и къалащхьэр зыхэта махуэщI Iуэхугъуэ дахэ куэдым языхэз хъуащ ди жылагъуэм и лъабжьэ нэхъыщхьэр — бынунагъуэхэр гъэлъэпIэныр. Черкесск къалэм щыIэ «ХытIыгу ЩхъуантIэ» паркым къыщызэрагъэпэща махуэщI утыкум ирашащ: СВО-м хэтхэм я унагъуэхэр, хуагъэфэщащ я бэшэчагъымрэ лIыгъэмрэ хуэфэщэн фIыщIэ псалъэхэр; унагъуэ зэрызэдащIэрэ юбилей илъэс бжыгъэм зэдыхуэкIуа зэщхьэгъусэхэр, лъагъуныгъэ къабзэм пэрыуэгъуи, щхьэусыгъуи зыри зэрыхуэмыхъуфынур дэтхэнэми и къекIуэкIыкIа, и гъащIэ щапхъэкIэ, сыт къэмыхъуами фIыуэ зэрылъагъуитIым зыри къазэрыпэмылъэщынур щIэзыгъэбыдахэр; илъэс куэд зи ныбжь унагъуэхэм къабгъурыуващ гъащIэ гъуэгум зэдытехьэ къудей, унагъуэщIэ къэзыгъэщIа зэщхьэгъусэхэри.

Гупсысэр езышажьэу щытащ унагъуэ зэдэзыщIэхэм я нэчыхьыр абдеж дыдэм унагъуэжь жыхуаIэм хуэдэ зэдэхъужахэм я пащхьэм иту, ЗАГС-м и лэжьакIуэхэм зэрыщIатхар. Абыхэм я пащхьэ ныбжьыщIэхэм Iэлъынхэр зыIэралъхьащ, я лъагъуныгъэм хуэщыпкъэнымкIэ икърари ятащ. Черкесск и къалэку уэрам нэхъыщхьэм, Первомайскэм ирикIуащ республикэм и къалащхьэм, муниципальнэ къэхъугъэхэм къикIа унагъуэ 500-м нэс.

Апхуэдэ щIыкIэкIэ республикэр гухьащ унагъуэхэм я Урысейпсо МахуэщIым. «Счастье — быть вместе!» къыхуеджэныгъэм щIэту екIуэкIа махуэщI Iуэхугъуэхэм зыри лъэныкъуэгъазэ хуэхъуакъым. Гулъытэншэ ящIакъым сабийхэри. Абыхэм папщIэ къызэрагъэпэщащ щIыгум сурэт тещIыхьын зэхьэзэхуэ дэхьэхыгъуэр. Сурэтхэм я нагъыщэу щытащ махуэщIым и дамыгъэр — шынэ-шынэ (ромашка) удз гъэгъа дахэ цIыкIур. «Движение Первых»-м хэт ныбжьыщIэхэм сурэт щIынымкIэ, щыгъэ блэнымкIэ, зэчиищIэхэр гъэнэхуэнымкIэ мастерклассхэр ирагъэкIуэкIащ, сурэтхэр куэду зытрагъэхащ. МахуэщIым и фащэ екIу хъуащ Черкесск къалэм и артистхэм ята концертыр. «Мы Махуэм дигу къегъэкIыж нэхъыщхьэр: унагъуэ быдэр ар уней насып къудейкъым, ар жылагъуэр зытет лъабжьэ лъэщщ. Унагъуэращ хабзэфIхэр здызэIэпахыр, нэхъыжьым и пщIэ щигъуэтыжыр, нэхъыщIэм гулъытэ щрагъэзыр, Хэку фIылъагъуныгъэр къыщыхъейр.

Къэрэшей-Черкесым щыпсэу лъэпкъхэм я псэкупсэ фIыгъуэхэм теухуа мы Илъэсым дэ нэхъри зыхыдощIэ ди щIэблэм апхуэдэ фIыгъуэхэр яхэтлъхьэным и мыхьэнэ иныр», — МАКС-м щитхащ КъЧР-м и Iэтащхьэм.

ТУАРШЫ Ирэ