НэхъыфI дыдэхэм ящыщу

Куэд щIакъым «Орлёнок» сабий купсэм «Хрустальные звёздочки» Урысейпсо фестиваль-зэхьэзэхуэм и Iыхьэ ныкъуэр зэриухрэ. Абы хэтащ ди къэралым и хэгъуэгу 36-м къабгъэдэкIа сабийхэр. Зэпеуэр номинацищымкIэ екIуэкIащ: уэрэджыIэхэр, къэфакIуэхэр, макъамэ Iэмэпсымэм еуэхэр. Жюрим и пашэу щытар Урысей Федерацэм и цIыхубэ артист, Къэрал Кремль Унэм и режиссёр нэхъыщхьэ Глазов Евгенийщ.

Нэхъыщхьэращи, Урысей псом щыщу мы зэпеуэм хыхьа ныбжьыщIэхэм яхэтащ Къэрэшей-Черкесым и Адыгэ-Хьэблэ къуажэм щыщ, ди лъэпкъэгъу щIалэ цIыкIу ЛIымаху Расим. Ар хыхьащ зи ныбжьыр илъэси 7-12-м ит сабийхэм я гупым, икIи «Исполнительское мастерство» номинацэмкIэ нэгъуэщI зэчиифIэхэм япеуащ. Расим зэпеуэм хыхьэн ипэ КъэрэшейЧеркесым и къалащхьэ Черкесск щекIуэкIа къыхэхыныгъэ Iыхьэм пхыкIащ. АбыкIэ къызэгъэпэщакIуэ хъуар Урысейм и УФССП-м ди хэгъуэгум щиIэ лэжьакIуэхэращ. Сыту жыпIэмэ, мы ведомствэращ илъэс къэс мы творческэ проектыр къызэзыгъэпэщри езыгъэкIуэкIри.

Республикэм щекIуэкIа Iыхьэм Расимщ и ныбжьым елъытауэ, макъамэ Iэмэпсымэм зэреуэ щIыкIэри къыхэлъытауэ нэхъыфI дыдэу къалъытар. Апхуэдэу Урысейпсо зэпеуэм ди республикэр пщIэ иIэу къыщигъэлъэгъуэну щIалэ цIыкIум хуагъэфэщащ. «Орлёнок» купсэм сабийхэм программэ купщIафIэ хуагъэхьэзырауэ щытащ: мастерклассхэр, репетицэхэр, ди къэралым и Ныпым и Махуэри абдеж щагъэлъэпIащ. Апхуэдэу зэхьэзэхуэм и махуэри къэсащ. Калининград щыщIэдзауэ Владивосток щиухыжу, абы щыщ сабийхэр мы зэпеуэм къеблэгъащ.

НыбжьыщIэхэр дэтхэнэри зэчиифIэ пэтми, абыхэм жюрир ткIийуэ къакIэлъыплъащ. Абы хыхьащ щэнхабзэмкIэ щIыхь зиIэ Iуэхузехьэхэр, егъэджакIуэхэр. ЛIымаху Расим и къыдэкIыгъуэр къыщысым, ар зэтеубыдауэ, зэкIужу и пшынэр иIыгъыу сценэм къытехьэри, и псэр хэлъу адыгэ макъамэхэм къеуащ. Абы и еуэкIэм зэхьэзэхуэ псор игъэщIэрэщIащ жытIэмэ, едгъэлеинукъым. Расим и мамыр еуэкIэр, Iэзагъ бгъэдэлъым и сабиигъуэ дахэм трихьа ныбжьыр адыгэ макъамэм и мотивхэр — а псоми жюрири залым щIэсахэри ятхьэкъуащ… Расим и лъэкIыныгъэхэр ищIэж пэтми, мыцIыху утыкушхуэм ита сабийр гузавэу пэплъащ жюрим и унафэм. Арами, абыхэми Расим и цIэр финалым пхыкIахэм яхэту къраIуащ! Иджы нэгъуэщI номинацэхэмкIэ пхыкIахэри щIыгъуу абы Ищхъэрэ-Кавказ федеральнэ хэгъуэгум къыбгъэдэкIыу иужьрей гала-концертым хэтынущ. Зэхьэзэхуэм и финалыр жэпуэгъуэ (октябрь) мазэм Нижний Новгород къалэм щекIуэкIынущ. Езы Расимщи, и текIуэныгъэм щогуфIыкI, ауэ къыгуроIуэ и хэкуми Кавказ псоми я пщIэр иIэту утыку зэритыпхъэр.

Пшынауэм и щIыбагъкIэ репетицэ бжыгъэ къыщынами, дяпэкIи апхуэдэхэм я бжыгъэр гъунэншэщ… ЛIымаху Расим и текIуэныгъэр КъэрэшейЧеркес псомкIи ехъулIэныгъэщ, дызэрыгушхуэ, дызэрыин Iуэхугъуэщ. Пшынауэ ныбжьыщIэм дэри дохъуэхъу икIи дяпэкIи лъагапIэ нэхъ ин дыдэхэм нэсыну, бгъэдэлъ зэфIэкIым нэхъри зиубгъуну Тхьэм жиIэ!

ГЪУКIЭКЪУЛ Иринэ


Больше на Черкес хэку

Подпишитесь, чтобы получать последние записи по электронной почте.

Добавить комментарий

Ваш адрес email не будет опубликован. Обязательные поля помечены *