Нэгъуей лъэпкъым къыхэкIа тхакIуэ, УФ-м щэнхабзэмкIэ щIыхь зиIэ и лэжьакIуэ, Къэрэшей-Черкесым и цIыхубэ тхакIуэ, драматург, публицист КАПАЕВ Иса Суюн и къуэр илъэс 75-рэ зэрырикъуам теухуа дауэдапщэ зэхуэмыдэхэр ди республикэм щекIуэкIащ.
Капаевыр и авторщ нэгъуеибзэкIи, урысыбзэкIи къыдэкIа тхылъ 31-м. Абыхэм яхэтщ тюркологием, нэгъуей мифологием теухуа щIэныгъэ къэхутэныгъэхэри. Ар и авторщ «Урыс нэгъуей псалъалъэми».
Апхуэдэу, Къэрэшей-Черкес къэрал университетым тхакIуэм и юбилейм теухуа «Писатель и читатель: диалог и сотворчество» зыфIаща литературэ пшыхьыр къыщызэрагъэпэщащ. Абы къеблэгъащ вузым и егъэджакIуэхэр, щеджэхэр, тхакIуэм и творчествэр зыфIэфIхэр, нэгъуэщIхэри.
КъинэмыщIауэ, хьэщIэ лъапIэу щыIащ Урысейм и тхакIуэхэм я Союзым хыхьэ, лъэпкъ литературэхэмкIэ Советым и тхьэмадэ, тхакIуэ, усакIуэ, журналист, зэдзэкIакIуэ Латынин Валерий, Урысейм и тхакIуэхэм я Литературэ зэгухьэныгъэм и тхьэмадэ, актёр, тхакIуэ Коноплянников Юрий, Кавказым щыщ тхакIуэхэм я Клубым и унафэщI, педагогикэ щIэныгъэхэмкIэ кандидат, литературовед, усакIуэ Муслимовэ Миясат, Урысейм и тхакIуэхэм я Литературэ зэгухьэныгъэм и президиумым хэт Эсмурзиевэ Лидие сымэ.
КъЧКъУ-м и ректорым и къалэнхэр зыгъэзащIэ Узденов Таусолтан пшыхьыр къызэIуихкIэрэ жиIащ мыпхуэдэ зэIущIэхэм университетми, республикэ псомкIи мыхьэнэшхуэ зэраIэр. Къыхигъэщащ Капаев
Иса и творчествэр лъэпкъымрэ литературэмрэ къулыкъу яхуэщIынымкIэ зэрыщапхъэр, абы и IэдакъэщIэкIхэр республикэм и щэнхабзэ щIэиным уасэшхуэ зиIэ и хэлъхьэныгъэу зэрыщытыр.
Къыхэгъэщыпхъэщи, тхакIуэхэм я Союзхэм я Дунейпсо зэгухьэныгъэм къыбгъэдэкIыу Капаев Иса и юбилейм ехъулIэу екIуэкIа дауэдапщэхэм ипкъ иту «90 лет Союза писателей СССР» медалыр къыхуагъэфэщащ.
КъинэмыщIауэ, юбилярыр гъэлъэпIэнымкIэ зэхаубла дауэдапщэхэм ящыщ хъуащ «Иса Капаев. Диалектика творчества» монографием и гъэлъэгъуэныгъэри. Ар и IэдакъэщIэкIщ филологие щIэныгъэхэмкIэ доктор Суюновэ Насыпхъан.
Монографиер Капаевым и творчествэр лъэныкъуэ зэхуэмыдэхэмкIэ зэпкърызых тхылъ хъуащ. Лэжьыгъэм и лъабжьэщ авторым и творчествэм хэлъ философ, аксиологическэ, усыгъэ щхьэхуэныгъэхэр.
Къэрэшей-Черкесым и къэрал филармониеми нэгъуей литературэм и классикым и щIыхькIэ Iуэхугъуэ дахэ, и тхыгъэхэр зи лъабжьэ театр теплъэгъуэхэри къыщызэрагъэпэщащ.
Зыгъэхьэзырар ЧЫРБЫЖ Иринэщ
Больше на Черкес хэку
Подпишитесь, чтобы получать последние записи по электронной почте.
