Наташэ — Мамхэгъ Жыхьэбэн

Жэщыр хэкIуэтащ. Губгъуэр щыгъэтыжауэ, къуажэ уэрамхэм зэхэзекIуэ дэтыжкъым.

Къуажэбгъум къегулIыпауэ щыт гъэш фермэм и зы пэш щхьэгъубжэм уэздыгъэ нур къыдедз. Хуэму жыхафэгур кърикIукIыурэ тхылъ IэщIэлъым йоджэ халат хужь зыщыгъ зы бзылъхугъэ. Тхылъыр зэтрепIэ, стIолым зытрегъащIэри, тетрадь напэм бжыгъэ гуэрхэр иретхэ. Аргуэру пэш лъэгур кърекIукI, тхылъым зэреджэурэ. Ар Наташэщ.

Хьэлъэт зэманыр. Фашистыдзэхэм я бомбэм, зы къуажэм адрей къуажэр кIэлъыкIуэу, Урысейм и щIыгум триулъэпсыкIт. Зи лъэ вакъэ изылъхьэ цIыхухэр бийм пэщIэуват. Топ зэдэуэ инхэмрэ бомбэ зэгуэудхэмрэ я гъуэзыр дуней мафIэсу ди Хэкум и къухьэпIэм къыщызэщIэнат.

Мис апщыгъуэращ  зи адэ-анэр Хэку зауэшхуэм хэкIуэда сабий ибэ гуп ди къуажэм къыщашар. Фэншэт сабийхэр. Гужьеигъуэмрэ мэжэлIэнымрэ щтэIэщтаблэ ищIа сабийхэр я Iэпкълъэпкъ уэд цIыкIухэмкIэ зэщIэкIэзызэт. А цIыкIухэр къуажэ Советым и унафэкIэ гъунэгъухэм трагуашэт, ягъэкъэбзэну, ягъэшхэну. Зипхъу кIасэ НэшиIэт зауэм зыгъэкIуа Мадинэ ибэ хъуа сабийхэм игу ящIэмыузкIэ къэ

накъым. Ари ящыщт Советым япэу къекIуэлIахэм. Фызым и нэр техуащ сабэм исея  бэхуцей пIащIэ лэжьэпа зыщыгъ хъыджэбз сырыху цIыкIум. Абы и Iэщхьэ пхылэжьыкIам къищт фIейм игъэсыхъа IэфракIэ гъурхэр. — Сыт уи цIэр, си тIасэ? — еупщIащ Мадинэ хъыджэбз цIыкIум. — Наташэ… — къыжьэдэкIащ абы зэхэпх къудейуэ. — Наташэ… — сабийм зэрыжиIам нэхъ щэхужу кIэлъыжиIэжащ фызми.

Наташэ. Мадинэ Наташэ цIэр НэшиIэту и тхьэкIумэм къоIуэ. А дакъикъэм анэм мафIэхъуэпскIым хуэдэу и нэгу щIэкIыжащ и НэшиIэт япэу быдз щригъэфа махуэм къыщыщIэдзауэ, зауэм щыдигъэкIа сыхьэтым щыщIэкIыжу. Сыту псынщIэу лъэта илъэсхэр! НэшиIэт и щхьэцым хэщIа лентIыр къыхихрэ джэдум и пщэм ирищIэу щыкъуейщIеигъам дэщIыгъуу, блэкIаи вагъуэбзум пеуэу жыг щхьэкIэм уэрэд къыщришу щыта зэманри.

Сыт хуэдиз гуфIэгъуэ нэпс  Мадинэ щIигъэкIат,  абы и НэшиIэт, хуеджэу къуажэм дохутыру къыщыкIуэжам!

Дэнэ щыIэ иджы и щIалэгъуэм гу щызымыхуа а пщащэр? Мадинэ маплъэ Наташэ къыздыраша лъэныкъуэмкIэ, къухьэпIэ жыжьэм и гъуэз пшагъуэ фIыцIэм и НэшиIэт гуфIэпсыжу къыхэкIыжынкIэ гугъэу. Мадинэ и унэм къихьа хъыджэбз цIыкIум и нэр зэуэ зытехуар Iэнэм къытена щIакхъуэ ныкъуэрат. Наташэ щыужат зыхуейр и анэм къыхуищIэу зэрыщытами, щIакхъуэмкIэ плъэурэ макъыншэу зэщыджащ мыхъумэ, зы псалъи къыхудэшеякъым.

И анэр зэрыфIэкIуэдрэ ар есат макъыншэу гъыуэ. Махуэ куэд текIащ абы лъандэрэ. Зауэри иухри гъатхэ дыгъэ хуабэм цIыхугухэр игъэхуэбэжащ. Ауэ Мадинэ и гур гъатхэ дыгъэм дэщIыгъуу къыхуэзыгъэхуабэу къыхуэнэжар и НэшиIэт и пIэ къиува Наташэт… Пщыхьэщхьэр хэкIуэтащ. Фермэм и къулыкъу пэшым и щхьэгъубжэм уэздыгъэ нурыр къыдедз. Хуэмурэ жыхафэгур кърикIукIыурэ,  тхылъ IэщIэлъым йоджэ халат хужь зыщыгъ бзылъхугъэ ныбжьыщIэ. Тхылъыр зэтрепIэ, стIолым зытрегъащIэри, тетрадь напэм бжыгъэ гуэрхэр иретхэ.

Аргуэру пэш лъэгур кърекIукI, тхылъым зэреджэурэ. Илъэсиблым и ещанэ илъэсым зыщIэбэныну къалэнхэр а бзылъхугъэм къилъытэу, ар зэригъэзахуэу аращ. Ар Наташэщ.