Бжьыхьэр уэшхрилэщ, уафэгъуагъуэ, уафэхъуэпскI куэдрэ къохъу. Тхьэм ирещIи, апхуэдэхэм деж я нанэхэм я ущиеу, ирагъащIэу щытахэр яцIыхужу къыщIэкIынщ нэхъыжьхэм. Сэ сцIыхужхэр: гуахъуэ, лошкIэ ди жьэм хуэтхьыну, уафэгъуагъуэшхуэм, уафэхъуэпскIым техуэу дышхэну идэтэкъым нанэм, IэлъэщI цIыкIу зытрыдигъалъхьэт, пэрыIэбэр пщэфIапIэ цIыкIум къыщIидзти, уэшхым хидзэт, ди ныбэхэм дытеуIуэн хуейт уафэр гъуэгъуамэ, зи мыхьэнэр къыдгурымыIуэ «бисымлыхь», «тобэ-тобэ» псалъэхэри езым кIэлъыжыдмыIэу идэтэкъым, уэлбанэр щхьэщыкIыхун, ди пэр къыщIэтшиикI хъунутэкъым, электрокъару зрикIуэ техникэ пыдгъанэ хъунутэкъым…
А псоми къадэкIуэу, IэфIыгъэ, псэ пIейтеиныгъэ гуэр къысхилъхьэу, сигу къокIыж а дакъикъэхэм щыму, е таурыхъ-хъыбархэм дедэIуу, загъуэ-загъуэу бжэмкIэ дыплъэрэ уэшхыр щыщигъэтыжынум, уэрамым дыщытелъэдэжынум дытемыпыIэжу дыпэплъэу дызэхэсу зэрыщытар. А псори ди нанэжьхэм, дадэжьхэм ягъэунэхуахэм тращIыкIыжа нэщэнэт, ауэ нокIуэкIэ къагупсысатэкъым. Дауэ щымытми, иджы гу зылъыстэжу, си анэшхуэм уэлбанэ щыхъукIэ къытпиубыду щытахэр быным, бынырылъхум сэри ядэсIыгъыну сыпылъщ.
Ауэ, сыпылъ къудейуэ къонэж. «Иджы дышхэ хъунукъым, дыпсалъэ хъунукъым, уафэгъуагъуэм дихьынущ…», — жаIэу, гушыIэр къыщытралъхьэкIэ, изошэхыжри, щэхуу си щхьэ хузогъэзэщIэж нанэ и нэщэнэ-ущиехэр.
Больше на Черкес хэку
Подпишитесь, чтобы получать последние записи по электронной почте.
