Мы гъэм ТекІуэныгъэ Иныр илъэс 80 щрикъум хуэкІуэу, Къэрэшей-Черкес Республикэм лъэныкъуэ куэдкІэ лэжьыгъэшхуэ щокІуэкІ. А лэжьыгъэм ІыхьэфІ щеубыд фэеплъхэр зэгъэзэхуэжыным, ТекІуэныгъэм и Махуэм зэрыхуэфэщэну егъэхъулІэным.
Абы ипкъ иту, Черкесск къалэм дэт, ТекІуэныгъэм и паркым ит фэеплъ щэджащэр, хуиткъэщІыжакІуэ-зауэлІым теухуар, зэгъэзэхуэжынымкІэ лэжьыгъэхэр щІадзауэ, ирагъэкІуэкІ. Зэгъэзэхуэжыным къыхуагъэсэбэпынур мраморрэ гранитрэщ. Уэздыгъэ Іэмал лъэрыхьхэр ирашэлІэнурэ, фэеплъыр нэхъри нэхъыфІу къагъэнэхунущ. Республикэм щыпсэухэр щІэгужьеин щыІэкъым, фэеплъым хуэсакъыу, зыри зэрамыкъутэным елІалІэу, елэжьынущ. Абы къинэмыщІауэ, и теплъэ нэхъыщхьэр, и купщІэр зэрыщыту къагъэнэжынущ. Гуапэ зэрыхъущи, архитектурэ къэзыгъэнэху Іэмалхэр иращІылІэнущ а парк дыдэм ит фэеплъ мемориалкомплекс инми. Ар зытеухуар Хэку зауэшхуэм хэкІуэда, хъыбарыншэу кІуэда Черкесск къалэдэсхэращ.
КъинэмыщІауэ, ЩІыхьым и Аллеем къэзыгъэнэху уэздыгъэщІэхэр ирагъэувэнущ, паркыр зэрыщыту тротуар плиткэхэмкІэ кърагъэпкІыкІынущ. Парк ихьэпІэ-ІуплъапІэми зэхъуэкІыныгъэ игъуэтынущ. Ар нэхъыбэу зэхьэлІар паркым и фІэщыгъэцІэращ. Абы хэт хьэрф къэс кІыфІым ІупщІу къыхэщу къагъэнэхунущ. Езы ихьэпІэ аркэри щІэуэ ящІыжынущ. ТекІуэныгъэм и паркми, нэгъуэщІ фэеплъ щІыпІэхэми Махуэшхуэм хуэкІуэу зэрелэжьынур жеІэ Черкесск къалэ мэрием капитальнэ ухуэныгъэмрэ зэгъэзэхуэжыныгъэмрэкІэ и ІэщІагъэлІ нэхъыщхьэ Джуккаев Руслан икІи къыхегъэщ ахэр псори ТекІуэныгъэм и Махуэшхуэм ипэ къихуэу, накъыгъэм и 1-м ехъулІэу зэнэгъэса зэрыхъунур.
ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
