Мы дуней дахэр нанухэм тыгъэ яхудощI!

АДЫГЭ-ХЬЭБЛЭ муниципальнэ район администрацэм щэнхабзэмкIэ и къудамэмрэ гуащIэдэкIымрэ социальнэ зыужьыныгъэмрэкIэ и Управленэмрэ я къызэгъэпэщыныгъэкIэ, Адыгэ Хьэблэ къуажэ купсэм сабийхэм я Лъэпкъыбэ Махуэм «Мы дуней дахэр сабийхэм тыгъэ яхудощI!» щхьэщIэдзапIэм щIэту, районым щыпсэухэр къызыхаша махуэщI дахэ щрагъэкIуэкIащ.

Абы къекIуэлIащ районым хыхьэ къуажэхэм къабгъэдэкIа сабийхэри, балигъхэри. Дыгъэм и бзийхэм къагъэхуэба махуэр гъэнщIауэ щытащ нанухэм я гуфIэгъуэ даущ макъхэмкIэ. Абыхэм я гукъыдэжыр нэхъри къаIэтащ цIыкIухэр зэрагъэгуфIа IэфIыкIэхэмкIи.

МахуэщIым ипкъ иту концерт программэ къагъэлъэгъуащ, районым щэнхабзэмкIэ и къудамэм епха творческэ гупхэмрэ артистхэмрэ къыхашэкIэрэ.

Сценэм я IэпщIэлъапщIагъкIэ щылыдащ уэрэджыIэ, къэфакIуэ ныбжьыщIэхэри, зэчий яхэлъу усэ къеджэхэри. Дэтхэнэри Iэгуауэ инкIэ яIэтащ.Концерт программэм ипкъ иту ныбжьыщIэхэм я нэгу зрагъэужьащ зэпеуэ зэмылIэужьыгъуэхэмкIэ, щIыгум сурэт нэхъ дахэу тещIыхьынымкIэ.

ИщхьэкIэ къызэрыхэзгъэщауэ, махуэщIым хэтауэ хъуар ягъэгуфIащ IэфIыкIэхэмкIэ: псыIэфIкIэ, мороженэкIэ…

***

Сабийхэм я Лъэпкъыбэ Махуэм ипкъ иту Iэхуитлъэхуит бэнакIуи 140-рэ щызэпэщIэтащ районым пашагъэр къыщыхьыным здыщIэбэна спорт зэхьэзэхуэм. ЦIыху куэд зэхуэзышэса а спорт зэхьэзэхуэр щекIуэкIащ Адыгэ-Хьэблэ къуажэм дэт «Сосрыкъуэ» спорткомплексым.

Хьэбэз, Адыгэ-Хьэблэ районхэм къикIа бэнакIуэ ныбжьыщIэхэр здызэпэщIэта зэпеуэм еплъыну къеблэгъащ спортсмен лъэрыхьхэр, щIыхь зиIэ гъэсакIуэ цIэрыIуэхэр, спортым и ветеран лъапIэхэр — СССР-м Iэхуитлъэхуит бэнэкIэмкIэ спортым и мастерхэу Хъупсырокъуэ Мухьэмэтбий, Мэзукъуэбз Мурадин, Уэз СулътIан, езы зэпеуэм и къызэгъэпэщакIуэ Борсэ Iэуес сымэ, нэгъуэщIхэри. ТекIуэныгъэр къэзыхьахэм, приёр хъуахэм хуагъэфэщащ щIыхь тхылъхэр, медалхэр, саугъэт щхьэхуэхэр.

***

А махуэм и пщэдджыжьым жьыуэ щIадзэри, «Дер Станистав и цIэр зезыхьэ бокс клуб» спорт еджапIэм боксымкIэ районым пашагъэр къыщыхьыным ехьэлIа зэпеуэ зэIуха щрагъэкIуэкIащ. Зэпеуэм и къызэгъэпэщакIуэ, бокс клубым и унафэщI Тау Алик дызэрыщигъэгъуэзамкIэ, зэхьэзэхуэм я IэкIуэлъакIуагъкIэ зызрапщытащ Черкесск къалэм, Хьэбэз, Адыгэ-Хьэблэ районхэм къабгъэдэкIа боксёри 100-м щIигъу.

Къапщтэмэ, мы зэпеуэр илъэс еплIанэ хъуауэ боксер цIэрыIуэу, гъэсакIуэу щыта Кячэ Нурбий и фэеплъым траухуэ. НыбжьыщIэ нэхъ цIыкIу дыдэхэми ерыщагъ къагъэлъагъуэу утыкум итащ.

Зэпеуэм щытекIуахэм хуагъэфэщащ щIыхь тхылъхэр, кубокхэмрэ медалхэмрэ. Саугъэт щхьэхуэкIэ къыхагъэщащ боксымкIэ IэпщIэлъапщIагъ ин зыгъэлъагъуэу утыкум ита ныбжьыщIэхэр.

АБИДОКЪУЭ Люсанэ