КъЧР-м и Іэтащхьэ Темрезов Рэшид хэтащ Бердиев хьэжы Исмэхьил и цІэр зэрихьэу, Карачаевск къалэм дащІыхьыну мэжджытым и япэ мывэр гъэтІылъынымкІэ дауэдапщэм. Мы Іуэхугъуэр ирагъэхъулІащ Рэмэдан мазэ лъапІэм, абы лъабжьэ хуэхъуащ хэгъуэгум и Іэтащхьэм и унафэр.
Ухуэныгъэм и пэублэ Іуэхум хэтащ КъЧР-м и муфтий Эркенов хьэжы Мухьэммэд, Пятигорскрэ Черкесскрэ я архиепископ Феофилакт, УФ-м и Президентым деж щыІэ, динырылажьэ организацэхэм зэпыщІэныгъэ ядэІыгъынымкІэ Департаментым и унафэщІым и къуэдзэ Файзуллин Алмаз, Ставрополь крайм и муфтий Рахимов хьэжы Мухьэммэд, Правительствэм хэтхэр, республикэм и ЦІыхубэ ЗэІущІэм и депутатхэр, республикэм и къалэхэмрэ районхэмрэ я Іэтащхьэхэр, Исмэхьил хьэжы и гъунэгъухэмрэ и Іыхьлыхэмрэ.
Іуэхур къызэІуахащ КъурІэным ит сурэм къеджэнымкІэ. Апхуэдэ щІыхьыр хуагъэфэщащ Бердиев хьэжы Исмэхьил и пхъурылъху, хьафиз Кубанов Шэхьэбан. Къызэхуэсахэм захуигъазэкІэрэ, Темрезов Рэшид жиІащ мэжджытым дин, лъэпкъ зэкъуэтыныгъэ я лъэныкъуэкІэ республикэм и мызакъуэу, зэры-Кавказу, Урысей Федерацэми мыхьэнэ хэха зэриІэр.
«Исмэхьил хьэжы и хэку цІыкІуми, Урысейми я тхыдэм хэмыгъуэщэжын лъэужь къыхинащ. Ар — Ищхъэрэ Кавказым и Координационнэ купсэм и япэ тхьэмадэу щытащ икІи а ІэнатІэр илъэс 20-м щІигъукІэ зэрихьащ. Къэрэшей-Черкес Республикэм и муслъымэнхэм я Духовнэ Управленэм и пашэу щыткІэрэ, 1990 гъэхэм Исмэхьил хьэжы хэлъхьэныгъэшхуэ хуищІащ ислъам дин зыужьыныгъэм. Апщыгъуэми ар щыпкъэу и телъхьэу щытащ мамырыгъэр, къэгъэщІыныгъэр, зэкъуэтыныгъэр, зыуэ щытыныр, дин, лъэпкъ зэзэгъыныгъэр ди къэралым щытепщэным.
Больше на Черкес хэку
Подпишитесь, чтобы получать последние записи по электронной почте.
