Мамыр гъащIэми хозагъэ

СВО-р зэрыщIидзэрэ мобилизацэкIи, я къулыкъу къалэнкIи, езыхэм я арэзыныгъэ, зэхэщIыкI лъагэкIи зэуапIэхэм Iухьауэ, леигъэ зылъыса цIыхубэм мамырыгъэр къыхузэрагъэпэщыж, Хэкум и гъунапкъэхэр яхъумэ ди хэкуэгъу, лъэпкъэгъу хахуэхэми. Сыт щыгъуи согупсыс: зауэм Iут цIыхур лIыхъужьщ, хахуэщ, нэхъри нэхъ лIыгъэжщ илъэгъуамрэ игъэвамрэ къыхэкIыжа нэужь, зауэлIыр цIыхуу, гу щабэрэ напэ къабзэу къэнэжыныр.

Ар гъэунэхуныгъэ къызэрымыкIуэщ, дызэреплъымкIэ. Апхуэдэ гъэунэхуныгъэм пылъхьэншэу пэлъэща, мамыр гъащIэми тыншу хэзэгъэжа зауэлIщ зи гугъу фхуэтщIыну дызыхуейр. Инжыдж-КIыкIун къуажэм щыщ ХЬЭТКЪУЭ Ислъам СВО-м и ветеранщ. ИлъэситI мэхъу а вэржьэрыгъуэм къызэрыхэкIыжрэ. Абы щегъэжьауэ, мэкъумэш хъызмэтым зритауэ, и гуащIэ абдеж щегъэтIылъ. Ислъам Хэкур ихъумащ, иджы мамыр гъащIэм хэувэжауэ, и унагъуэм, жы лагъуэм сэбэп къыхуихьу мэпсэу. ЩIалэр икъукIэ Iуэхум хилъэсауэ, ехъулIэхэм я IуэхущIафэм доплъей, я лэжьыгъэм зыщегъэгъуазэ. К ъ ы з э р ы р и г ъ э ж ь а р аращи, япэ щIыкIэ къищэхуащ тани 10. Iуэхум фIыуэ хилъэса щыхъум, нэхъри хъызмэтым зригъэужьмэ фIэфI хъуащ, ауэ къыгурыIуэт и къару закъуэкIэ ищIа мурадым зэрыпэмылъэщынур. ЗыщIэупщIыкIкъызыщIэупщIыкIри, зыхуигъэзащ КъЧР-м мэкъумэш хъызмэтымкIэ и Министерствэм. Абыхэм я чэнджэщ кIэ, хыхьащ «Начинающий фермер» программэм. АдэкIи кIуатэурэ, «Агростартап» программэм хэлэжьыхьри, къилъэщащ грантыр икIи къыхуагъэфэщащ сом мелуан 1,5-рэ. Грант ахъшэмкIэ Ислъам аргуэру Iэщ къищэхуащ: танэми, лыпхъэ жэмми 20-м нэс. ДгъэнэIуэнщи, грантыр къыплъысыным папщIэ балл бжыгъэ гъэнэIуа мардэр къэплъэщыфын хуейщ. СВО-м хэтахэм балл бжыгъэм хущIагъу. АхъшэмкIэ Iэщ, техникэ, зыхуэныкъуэ оборудованэ хэха къащэхункIэ хуитщ. Мыбыи гу лъытапхъэщ: 2025 гъэм щIышылэм и 1-м щегъэжьауэ, СВО-м и ветеранхэм папщIэ «Агромотиватор» грант лIэужьыгъуэ щыIэщ. Абы ипкъ иткIэрэ, лыпхъэ, гъэшыпхъэ Iэщхъуныгъэм зезытыну хуейм гранту сом мелуани 7 лъагъэсынущ, нэгъуэщI мэкъумэш IуэхущIафэ лъэныкъуэхэм зезытынухэм папщIэ — сом мелуани 5. Ар икъукIэ дэIэпыкъуныгъэфIщ икIи Ислъами ар къыхегъэщ. — Сызэрысабийрэ ди унагъуэм Iэщхъуныгъэр и IуэхущIафэщ. Адэ-анэм садэIэпыкъукIэрэ, сэри Iэщым садихьэхащ, сфIэфIщ мэкъумэшыр. СфIэфI Iуэхум зезгъэужьынымкIэ, нэхъри сыдихьэхынымкIэ хуабжьу къысщхьэпащ къэрал дэIэпыкъуныгъэр, республи кэм мэкъумэш хъызмэтымкIэ и Министерствэм и IэщIагъэлIхэм я чэнджэщхэмрэ унэтIыныгъэмрэ, — жеIэ Ислъам. ЩIалэр мэкъумэшым къыщыувыIэкъым. Абы и лъэкIыныгъэхэр щегъэлъагъуэ спортми. Апхуэдэу, ди республикэм щыщ, СВО-м и ветеранхэм яхэту республикэм и щIыхьыр Ставрополь щекIуэкIа «Кубок Защитников Отечества» спорт зэхьэзэхуэми Къэрэшей-Черкесым и цIэкIэ спорт утыкум хуэфэщэну итащ. КъинэмыщIауэ, КъЧР-м къыщызэрагъэпэща, СВО-м и ветеранхэм я Ассоциацэми хэтщ, Iуэху угъурлыхэр зэфIихыу. СВО-м ехьэлIа лъэныкъуэ куэдыр ущэхуащ, пIуатэ мыхъунщи, Хьэткъуэ Ислъам хабзэм ебакъуэкъым, езыри — фIэфIкъым абыхэм къытригъэзэжу тепсэлъыхьыну. ЗэрыжиIэмкIэ, водителу Ставрополь щылажьэт СВО-р щыщIидзам. «КIуэн хуейщ!» — джэр щызэхэсхым сыкIуащ, псалъи, чэнджэщи хэмылъу», — апхуэдэ къызэрыкIуэ еплъыкIэщ Ислъам СВО-м зэрыщыIам хуиIэр. НэгъуэщIу жыпIэмэ, лIыгъэ зэрихьауэ, къэмыхъуа гуэр ищIауэ зэгуэрми къилъытакъым, зэрыщытын хуейм хуэдэу ищIауэ мыхъумэ. ШЫБЗЫХЪУЭ Ирэ