Черкесск къалэм дэт еджапIэ-интернат щхьэхуэм (коррекционнэм) «Дружба народов — единство России» щхьэщIэдзапIэм щIэту дауэдапщэ гъэщIэгъуэн щрагъэкIуэкIащ. Республикэ къалащхьэм дэт, сабий зэчиифIэхэм я «Спутник» купсэм и пэшышхуэм и театр-студием къэзыпщытэж концертышхуэ къыщызэригъэпэщащ. Мамырыгъэмрэ лъэпкъ зэкъуэтыныгъэмрэ я мыхьэнэр уэрэдхэмкIэ, къафэхэмэкIэ, усэхэмкIэ, IэпэтэрмэшкIэ къагъэлъэгъуащ еджапIэм и гъэсэнхэмрэ абы щылажьэ егъэджакIуэхэмрэ.
А махуэм ныбжьыщIэхэм я зыкъэгъэлъэгъуэныгъэм хэплъэну къеблэгъащ Къэрэшей-Черкес республикэ профсоюз зэгухьэныгъэм егъэджакIуэхэм я къудамэм и унафэщI Чотчаевэ Маринэ, Черкесск къалэ Думэм и депутат Дзугаев Альберт, ныкъуэдыкъуагъ зытелъхэм я «Всероссийское общество глухих» жылагъуэ организацэм и хэгъуэгу къудамэм и унафэщI Акперовэ Асят, «Всероссийское Общество Слепых» жылагъуэ организацэм и тхьэмадэ Дубовик Сергей, нэгъуэщIхэри. Пэжщ, еджапIэхэм дежщ здыщагъэбыдэр лъэпкъ зэкъуэтыныгъэр, гъэсэныгъэр, щэнхабзэ зэмылIэужьыгъуэхэр здахъумэр. Ауэ, мы махуэм зэхаша зэхыхьэшхуэм и мыхьэнэр куэдкIэ нэхъ инт. Мыбдеж зи узыншагъэкIэ зи зэфIэкI иримыкъу ныбжьыщIэхэм я лъэкIыныгъэхэр утыкум щагъэлъэгъуащ.
Макъамэ зэхэзымыххэр куэду яхэтами, уэрэдхэрIэпэтэрмэшкIэ ягъэзэщIащ, апхуэдэ къабзэу къэфахэщ. Концертыр зыгъэхьэзырахэр хуабжьу егугъуащ гъэщIэгъуэну, абы еплъхэр темызашэу гъэпсыным икIи къайхъулIащ. Зыкъэгъэлъэгъуэныгъэр удихьэхыу екIуэкIащ, ныбжьыщIэхэри хуиту утыкум итащ: къэралым щыпсэу лъэпкъхэм я таурыхъхэм щыщ пычыгъуэхэр, къафэхэр, уэрэдхэр ягъэзэщIащ.
— Дэ дрогушхуэ ди сабийхэм. Абы я псэр етауэ мы махуэм зыхуагъэхьэзыращ, щэнхабзэ зэхуэмыдэхэм нэIуасэ зыхуащIащ. Мыр дэркIэ зыкъэгъэлъэгъуэныгъэ къудейкъым, атIэ гъащIэм и дерс нэхъыщхьэхэм ящыщ зыщ. Абы дегъэлъагъу дызэщIыгъумэ куэд зэрытхузэфIэкIынур, — хьэщIэхэр къыщригъэблагъэм жиIащ еджапIэм и унафэщI Гербековэ Зульфия. Сабийхэм я зыкъэгъэлъэгъуэныгъэм уасэшхуэ хуищIащ Чотчаевэ Марини. — Си гуапэщ нобэ слъэгъуар. Мыр, дауи, концерт къудейкъым, атIэ ди къэралым и хъугъуэфIыгъуэ нэхъыщхьэхэр къэзыгъэлъагъуэ Iуэхугъуэщ. Урысейм щыпсэу лъэпкъхэм я зэкъуэтыныгъэр, зэныбжьэгъугъэр, пщIэ зэхуэщIыныр и лъабжьэу сабийхэр макъамэхэмкIэ, къафэхэмкIэ, лъэпкъ хабзэхэмкIэ къыддэгуэшащ. Дэ псори дызэхуэдэкъым, ауэ аращ ди къару нэхъыщхьэр, ди къэкIуэнури, ди беягъри зэлъытар аращ, — къыхигъэщащ профсоюзым къыбгъэдэкIам. НыбжьыщIэхэмкIи егъэджакIуэхэмкIи ар махуэщI дахэ хъуащ. УзыншагъэкIэ зи зэфIэкI иримыкъу сабийхэр жылагъуэм хэзэгъэнымкIэ, ахэр абы щыщ Iыхьэу ялъытэнымкIэ мы нобэрей зэхыхьэр IуэхугъуэфIу къыщIэкIащ.
БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
