Махуэжьхэ я чемпион

Псыжь къуажэм щыщ дзюдоист IэкIуэлъакIуэ МАХУЭЖЬ Исмэхьил илъэсийм иту спортым зритащ. ЩIалэр хэмыщтыкIыу, гушхуэу спорт утыкушхуэхэм йохьэ и зэфIэкIымрэ и Iэчлъэчагъымрэ къигъэлъагъуэу. Абы зеумысыж япэхуным гугъу ехьурэ и Iэпкълъэпкъыр зэрипсыхьар икIи, зэхьэзэхуэ цIыкIухэм хыхьэн щыщIидзагъащIэм, къыхагъащIэрейти, нэхъыбэрэ зэлэжьыжт, спортсмен ныбжьыщIэ лъэрыхьхэм ябгъурыувэныр и хъуэпсапIэу…

Мэлыжьыхьым и 23-27 махуэхэм Кипр Республикэм и Лимассол къалэм илъэс 16 зи ныбжь, килограмм 58-рэ зи хьэлъагъ самбистхэр европей пашагъэм здыщIэбэна зэхьэзэхуэм къэрал 26-м къабгъэдэкIыу хэта бэнакIуэ нэхъыфIхэм ящыщ зыуэ къалъытауэ — чемпионыцIэр къилъэщауэ къытхуеблэгъэжащ Исмэхьил.

СамбомкIэ европей федерацэм и зыгъэзащIэ комитетым и унафэкIэ, мыгъэрей чемпионатым иIа жыпхъэр етIанэгъэ яхъуэжынущи, щIалэгъуалэмрэ балигъхэмрэ щхьэхуэу ягъэбэнэн щIадзэнущ. Лимассол деж цIэимыIуэ ныпым щIэту зыкъыщызыгъэлъэгъуа урысей спортсменхэм ящыщ куэдым ехъулIэныгъэ лъагэхэр яIэу я хэку къихьэжащ.

Махуэжь Исмэхьил спортым зэрыщефIакIуэм гу лъызытэ и гъэсакIуэхэм къызэрыхагъэщымкIэ, ар егъэзыгъэ хэмылъу бгъэдохьэ зэгугъужынми, нэхъыбэ щIэнми. Дерсхэм игъуэу йокIуалIэ, ену зэтеубыдарэ и узыншагъэм кIэлъыплъ зэпыту щытщ, нэхъыщхьэращи — и текIуэныгъэхэр — дэтхэнэ гъэсакIуэми и щхьэр ину езыгъэлъагъужщ.

Европей утыкум уейуей жезыгъэIэу ита ди хэкуэгъу, лъэпкъэгъу щIалэр хэгъуэгум къихьэжащ мэлыжьыхьым и 29-м. Черкесск къалэм и ищхъэрэ къыдыхьэпIэм абы къыщежьэт и Iыхьлыхэр, ныбжьэгъухэр, и гуфIэгъуэм щыгуфIыкIыпауэ, бохъусыж апщийкIэ къезыгъэблэгъэжыну пIэцIеиж къалэдэсхэр, журналистхэр.

Iэгуауэ зэпымычым хэту Исмэхьил къыпежьахэм гулъытэ лей къыхуащIауэ къызэрыщыхъуам зэ щхьэкIэ къигъэукIытати, иужьым журналистхэм щадэуэршэрым жиIащ апхуэдэу гуапэу къыхущыта дэтхэнэми фIыщIэшхуэ зэрахуищIыр, хэти зэрыхуэарэзыр. Исмэхьил къезыгъэблэгъэжа гупышхуэм яхэтащ и анэмрэ и нанэмрэ, псом хуэмыдэу ахэращ щыгъуазэр Европэм и чемпион хъуным сыт хуэдиз илъэс бжыгъэ гуащIэу абы тригъэкIуэдами.

Дыщэ медалым хуэкIуэ гъуэгур ди самбист ныбжьыщIэмкIэ тыншауэ пхужыIэнукъым. Япэу абы къыпэщIагъэувар Куржым щыщ спортсмен лъэрыхь Нанеташвили Никэ. ТIуми къикIуэт жыхуаIэр ямыщIэу, замыту банэурэ, 1:1-уэ яухауэ къыщIокIри, ди хэкуэгъур нэхъ жыджэру зэрыбэнам щхьэкIэ, текIуэныгъэр къыхуагъэфащэ. АдэкIэ Исмэхьил къыхуэза спортсменхэр, Сербиемрэ Азербайджанымрэ щыщхэр, гугъу емыхьу, зы бжыгъи яримыту хыфIихуэри, финалым икIа украин самбист Барановский Карен пэщIэуващ.

Мыбдежым щыуагъэ пIэщIэщIи, убэлэрыгъи  хъунутэкъыми, ар тактикэкIи, техникэкIи и хьэрхуэрэгъум Iущу бгъэдохьэ, гугъапIэу иIэр екъутэри, дыщэ медалыр къелъэщ. — Кипр сыщыIэхун куэдым къысхуатхащ текIуэныгъэр къысхуагъэфащэу, чемпион сызэрыхъуфынум шэч къызэрытрамыхьэр жаIэу. Апхуэдэу гушхуэныгъэ къызэзыту къыскIэлъыплъа, гукIи псэкIи къысхуэгузэва дэтхэнэми фIыщIэ хузощI, сыт щхьэкIэ жыпIэмэ, уи лъахэм пэIэщIэ ущыхъум деж фIыуэ зыхыбощIэ ущIэбанэм и мыхьэнэри, укъыздикIа къэралыр къызэрыпщыгугъри, — жиIащ Исмэхьил.

Махуэжь Исмэхьил и текIуэныгъэм я фIыщIэшхуэ хэлъщ абы и гъэсакIуэхэу Уэхъутэ Азэмэтрэ АбытIэ Маратрэ. Мы щIалэ цIыкIум зэфIэкIыу иIэм нэхъри зыкъызэкъуебгъэхмэ, зыгуэр къызэрыхэкIынум шэч къытезымыхьари, къелIалIэу къыдэлажьэри, килограмм 58-рэ хьэлъагъым иту банэ европей самбист ныбжьыщIэхэм я нэхъыфI хъуным, и цIэр жыжьэ Iуным зи гуащIэ езыхьэлIари ахэращ. ДяпэкIэ зызыхуигъэхьэзырыну зэхьэзэхуэхэм Тхьэм лъапэ махуэ хичэрэ спортым и нэхъ лъагапIэ дыдэм теувэну къыщIигъэкI!

Хэгъуэгум и пщIэр иIэту, абы хузэфIэкIам и адэанэр къызыхэкIа зэкъуэш лъэпкъхэр — адыгэхэмрэ абазэхэмрэ ириину!

ЛЫХЬ Тимур