ЛIыхъужьым и щIыхькIэ

2018 гъэм щегъэжьауэ, «Зыуэ щыт Урысей» партым и жэрдэмкӏэ ягъэзащIэ «Парта Героя» зи фӏэщыгъэцӏэ щӏэнгъуазэ проектыр. 2019 гъэм проектым федеральнэ мыхьэнэ иӏэу утыкум ирахьащ.

Проектым ипкъ иткӏэрэ, ипэхуным партэхэр щагъэуващ курыт еджапӏэхэм, иужьым абыхэм гъусэ яхуэхъуащ ищхьэ еджапӏэхэри. 2022 гъэм нэс партэхэр зытраухуар Совет Союзым, Урысейм я лӏыхъужьхэращ. А илъэсым щыщӏэдзауэ лӏыхъужь партэхэр хуагъэув СВО операцэм щыхэкӏуэда ди зауэлӏхэм. Иджы дыдэ, Черкесск къалэм дэт, зи № 9 гимназием къыщызэӏуахащ иджыри апхуэдэ зы партэ. Ар зытеухуар мы еджапӏэр 1989 гъэм къэзыуха, Лӏыхъужьым и Орденыр (дунейм ехыжа нэужь) къызыхуагъэфэща Высоколян Владимирщ.

Жагъуэ зэрыхъущи, Владимир СВО-м хэкӏуэдащ и зауэлӏ къалэныр игъэзащӏэу. ЛIыхъужьым и партэр къыщызэӏуахым гимназием къеблэгъащ зауэлӏым и ӏыхьлыхэр, гъунэгъухэр, къыдеджахэр, и ныбжьэгъухэр, властым къыбгъэдэкӏа и лӏыкӏуэхэр, еджакӏуэхэмрэ егъэджакӏуэхэмрэ.

— Высоколян Владимир, абы хуэдэ зауэлӏ хахуэ куэдым пэжыгъэм, мамырыгъэм цӏыхумкӏэ нэхъ лъапӏэ дыдэр щӏатащ — я гъащӏэр. Ар зыщыдгъэгъупщэ мыхъунщ, фэеплъу тхъумэн хуейщ. Нобэрей ӏуэхур зытеухуа зауэлӏ хахуэм къыдеджахэри, и ныбжьэгъухэри къызэреблэгъами къегъэлъагъуэ абыхэм яхъума зэныбжьэгъугъэр, абы и къару лъэщыр. Фэри, еджакӏуэхэм, щӏэблэщӏэм, фигу ивмыгъэху апхуэдэ дакъикъэхэр, фхъумэ ныбжьэгъугъэр, мамырыгъэр, — жиӏащ Черкесск къалэ Думэм хэт депутат Дзугаев Альберт.

Высоколян Владимир и классэгъуу щытахэр къэпсалъэкӏэрэ, щӏагъэбыдэжащ Владимир ныбжьэгъу пэжу, хэти дэӏэпыкъуэгъу хуэхъуным хуэхьэзыру, цӏыху, лъэпкъ зэхэдз имыщӏу зэрыщытар, апхуэдэуи ягухэм къызэринэжар. А псалъэхэм я щыхьэтщ СВО-р къыщежьэм, чэнджэщ лъэпкъ къытримыхьэу Владимир зэуапӏэм зэрыӏуувар. 2023 гъэм, бадзэуэгъуэм и 15-м СВО-м хыхьащ, мамырыгъэм хущӏэкъуу, пэжыгъэм хуэпабгъэу.

2024 гъэм, гъатхэпэм и 6-м хэкӏуэдащ, зауэлӏ икърарым хуэщыпкъэу, и къалэн игъэзащӏэу. 2025 гъэм мазаем и 18-м Высоколян Владимир къыздалъхуа Черкесск къалэм деж и мащэр щрагъэгъуэтыжащ, и пщӏэрэ хуэфащэ хуэӏухуэщӏэрэ кӏэлъы зэрахьэжащ. Лӏыхъужьым и партэр къызэӏуахынри, япэу кӏэрытӏысхьэнри хуагъэфэщащ гимназием и еджакӏуэ нэхъыфӏхэм, щапхъэгъэлъагъуэхэм: Высоколян Оксанэрэ Самохин Дмитрийрэ. Сабийхэр къеджащ усэхэм, жаӏащ уэрэдхэр. Партэри, фэеплъ теплъэгъуэу а махуэм къызэрагъэпэщахэри напӏэзыпӏэм щӏигъэнащ удз гъэгъахэм. Гимназием и кӏэлындор кӏыхьым и зы блыныр траухуащ я еджакӏуэу щытауэ СВО-м хэкӏуэдахэм. Апхуэдэу а блыным пылъщ гимназием щеджа Анушко Виталий и сурэтыр. Иджы абы къыбгъэдэуващ Высоколян Владимир ейри.

Фэеплъ блыным и лъабжьэр а махуэм удз гъэгъахэм уэру ягъэдэхащ, фӏыщӏэ псалъэ куэди щыӏуащ. Фэеплъ ӏуэхугъуэхэм пащащ хьэщӏэхэм гимназием и еджакӏуэхэм драгъэкӏуэкӏа зэпсэлъэныгъэ-дерсымкӏэ. Проектым и купщӏэр — щӏэблэщӏэм блэкӏа тхыдэм, а тхыдэр зыухуа лӏыхъужьхэм пщӏэ хуащӏу, хэкупсэу гъэсэнращ икӏи «Парта героя» проектыр абы и зы ӏыхьэщ, и зы ӏэмал хьэлэмэтщ.

ТУАРШЫ Ирэ