ЛIыхъужьхэм я цIэр кIуэдкъым

Зауэ-хэкупсагъэ гъэсэныгъэмрэ спорт-цIыхубэ лэжьыгъэмрэ хухаха мазэр республикэм зэрыщрагъэжьам ипкъ иту, Черкесск къалэм дэт е 11-нэ егъэджэныгъэ Купсэм «Герои никогда не умирают, герои в нашей памяти живут» дауэдапщэ щрагъэкIуэкIащ. А махуэм екIуэкIа зэхыхьэм еджапIэмкIэ мыхьэнэ ин зиIэ Iуэхугъуэ зыбжанэ къызэщIрагъэубыдащ. Кърагъэблэгъащ хьэщIэ лъапIэхэри: КъЧР-м и ЦIыхубэ ЗэIущIэм (Парламентым) экономикэ политикэмкIэ, хьэрычэт ӀуэхумкIэ, цифрэ зыужьыныгъэмрэ туризмэмрэкIэ и комитетым и тхьэмадэ Ганшин Алексей, Парламентым щIэныгъэмкIэ, егъэджэныгъэмкIэ, щэнхабзэмрэ щIалэгъуалэ IуэхухэмрэкIэ и комитетым и унафэщI Черняевэ Татьянэ, СВО-м и ветеранхэм я Урысейпсо Ассоциацэм и хэгъуэгу къудамэм и унафэщI Мутчаев Дахир, Черкесск къалэ Думэм и депутатхэр, хабзэхъумэ къулыкъухэм я лэжьакIуэхэр, СВО-м и ветеранхэр…

ХьэщIэхэм фIэхъус псалъэкIэ захуигъэзащ егъэджэныгъэ Купсэм и унафэщI Ляшовэ Еленэ. — Нобэ екIуэкI Iуэху гъуэр, Хэку зауэшхуэм щыгъуэ къэралым и щхьэхуитыныгъэр къэзызэуахэм фӀыщIэ зэрахуэтщIыр къызэрыдгъэлъагъуэ Iэмалщ. Мы зэманым ди къэралыр аргуэру щытыкIэ гугъум ихуащ. ИкIи ди къуэ щыпкъэхэм я фIыгъэкIэ, ди адэжьхэм зэрахьа лIыгъэм иджыри зэ къытрегъэзэж, ар дэри нэрылъагъу тхуохъу.

ФIыщIэ яхудощI апхуэдэ къуэ хахуэхэр зыгъэса, ахэр гъуэгу тэрэз тезыгъэува дэтхэнэми. Нобэрей Iуэхугъуэм зы ещI нэхъыжьхэри нэхъыщIэхэри, дадэ-нанэхэри, адэ-анэхэри, ди къэкIуэнур зыухуэ щIэблэри. Ди адэжьхэми, абыхэм къащIэхъуэжа щӀэблэхэми дрогушхуэ, къэралыр къытхуахъумащи, нобэми абы и хьэлэмэт зэрахуэри. Ди щIэблэм захузогъазэ, ахэр дэтхэнэми щапхъэ яхуэхъуну, — жиIащ Ляшовэ Еленэ. Илъэс кIуам мы егъэджэныгъэ Купсэм, Хэку зауэшхуэм и лIыхъужь Къардэн Мурат и цIэкIэ къыщызэIуахауэ щытащ «ЛIыхъужьым и партэ». Апхуэдэ Iуэхум къыдэкIуэу, Къардэным и хьэпшып зыбжанэ еджапIэм и музейм тыгъэ къыхуащIащ. А махуэм хьэпшыпхэр еджапIэм яритыжащ лIыхъужьым къыщIэна и щIэблэ Куликов Олег.

Апхуэдэ тыгъэр еджапIэмкIэ зэрылъапIэр къыхагъэщащ абы и лэжьакIуэхэм, икIи апхуэдэ дзыхьрэ пщIэрэ къызэрыхуащIамкIэ лIыхъужьым и Iыхьлыхэм фIыщIэ хуащIащ, хуэсакъыу зэрахьэну къагъэгугъащ. Мы махуэм нэгъуэщI зы Iуэхуи хэтащ — еджапIэр къэзыухахэу къэралым и хьэлэмэт зэрахуэу СВО-м щыхэкIуэда Балясников Олегрэ Шунгаров Темирланрэ я фэеплъ пхъэбгъу къызэIуахащ. — Олег хэкупсэу зэрыщытар мы еджапIэм къыщежьауэ жыпIэ хъунущ. Гъэсэныгъэ хуабжь хэлъащ. АбыкIэ абы и адэ-анэми, егъэджакIуэхэми фIыщIэ ябгъэдэлъщ. Хьэлъэщ цIыхум блэкIа зэманкIэ утепсэлъыхьыныр. Согугъэ, хьэршым абы дыщызэхихыу, дилъагъуу, дыкъыгурыIуэу, — ныбжьыщIэр игу къигъэкIыжу псэлъащ абы и Iыхьлы, и егъэджакIуэу щыта Клеповэ Иннэ. Шунгаров Темирлан и анэ шыпхъур къыщыпсалъэм адэ-анэхэм яхъуэхъуащ зэуапIэм щыIэ дэтхэнэ зы сэлэтри узыншэу и унэ къигъэзэжыну, абы лIыхъужьыгъэ хэлъу, хэкIуэдахэми я фэеплъыр нэху хъуну. Фэеплъ пхъэбгъур еджапIэм и япэ къатым щыфIалъащ.

Ар къызэIуахыну хуагъэфэщащ зи псэр къэралым хуэзыта ныбжьыщIэхэм я Iыхьлы гъунэгъухэм. Зауэ-хэкупсагъэ мыхьэнэ зиIэ дауэдапщэм екIуу зыкъыщагъэлъэгъуащ Купсэм и еджакIуэхэми, сабий IыгъыпIэм и гъэсэнхэми.

БОРЭНЫКЪУЭ Мадинэ