ЛIыхъужьхэм — щIыхь лъапIэ!

«Дэ тщыгъупщэкъым… Дэ дрогушхуэ…» «ТекIуэныгъэм и махуэщI Махуэшхуэр си хэкуэгъухэр сщIыгъуу щедгъэжьащ Мыужьых мафIэр здэщыIэ, ЛIыхъужьхэм я Аллеем. Хуэфащэ пщIэ яхуэтщIащ Хэку зауэшхуэм хэта, зи щхьэр щызыгъэтIылъа, лIыгъэрэ псэемыблэжыныгъэрэ къэзыгъэлъэгъуахэм. Ди щхьэр яхудогъэщхъ ди ЛIыхъужьхэм, апщыгъуэм фашизмэм пэщIэтахэм, текIуэныгъэр зыIэрызыгъыхьахэм, нобэ дыгъафIэ махуэм дыщыгуфIыкIыу мамыру дыпсэуныр, ди сабий тпIыныр, дылэжьэныр зи фIыщIэхэм. Абыхэм зэрахьа лIыгъэращ ди къэралым къэкIуэн щIиIэр. Мыужьых мафIэр щIэблэр дунейм ехыжахэракъым. Ар щIэблэр псэухэращ – дэ ди ЛIыхъужьхэр тщымыгъупщэн папщIэщ. Ди пщэрылъ пажэщ текIуэныгъэр къытхуэзылъэщахэр, блэкIа тхыдэ лIыхъужьым и фэеплъыр тхъумэныр. ТекIуэныгъэр къэзыхьахэм – игъащIэкIи ЩIыхь! Дэ тщыгъупщэкъым… Дэ дрогушхуэ…», — жиIащ республикэм и Iэтащхьэм.

ЧЕРКЕССК къалэм и утыку нэхъыщхьэм, хабзэм зэрытету, щызэхашащ ТекIуэныгъэм и Махуэшхуэм иращIылIа дауэдапщэхэр. Къэпсэлъэныгъэхэм иужь, щIыхь яхэлъу зауэ пакIэхэр, хэкупсэ организацэхэм хэт щIалэгъуалэ гупхэр утыкум ирикIуащ, ТекIуэныгъэр ди къэралым къызэрилъэщрэ илъэс 81-рэ зэрырикъуар ягъэщыпкъэу. «Накъыгъэм и 9-р — ди къэралышхуэм щыпсэу къэскIэ щихъ махуэщIщ. А махуэр и фэеплъщ ТекIуэныгъэр къытхуэзызэуахэм я щапхъэншэ лIыгъэм, дызэрыгушхуэ махуэщ, лъэпкъхэм зэрахьа лIыхъужьыгъэм, Хэкум и щхьэхуитыныгъэр зыхъумахэр зыгъэщыпкъэщ. Щхьэихауэ фIыщIэ псалъэ гуапэхэр яхуэфащэщ ди ветеран лъапIэхэм. Абыхэм къагъэлъэгъуа лIыгъэмрэ хахуагъэмрэ игъащIэкIи щапхъэгъэлъагъуэ яхуэхъунущ къэкIуэну щIэблэхэм. Абыхэм я фIыщIэщ къэрал хуитрэ лъэщрэ дызэрыщыпсэур, гъащIэ мамыр зэрыдиIэр», — къыхигъэщащ Темрезов Рэшид.

Фэеплъ пэкIум къриубыдэу, дауэдапщэм хэтахэр яхуэщыгъуащ мамыр гъащIэм зи гъащIэр щIэзытахэм, сыт хуэдэ лъэхъэни къыхэща ЛIыхъужьхэм. «Нобэ догъэлъапIэ ди къэралым и тхыдэм мыхьэнэ нэхъ лъапIэ дыдэ зиIэ и махуэщIыр – ТекIуэныгъэм и Махуэшхуэр. Ди дежкIэ ар щихъ махуэщIщ, Хэкум худиIэ фIылъагъуныгъэ гъунэншэр къэзыгъэлъагъуэщ, лIыхъужьыгъэмрэ цIыхубэ зэкъуэтыныгъэмрэ зыгъэщыпкъэщ», — пищащ республикэм и Iэтащхьэм. ГуфIэгъуэ, фэеплъ дауэдапщэхэр щекIуэкIащ респуб ликэм и къалэхэм, жылагъуэмрэ къуажэхэмрэ. Хабзэм зэрытету, Черкесск гарнизоным и зауэ пакIэхэр ирикIуащ республикэ къалащхьэм и ут нэхъыщхьэм; Мыужьых мафIэм щыIэ, ЛIыхъужьхэм я Аллеем удз гъэгъахэр щагъэтIылъащ. ТекIуэныгъэм и Махуэшхуэр дэркIэ – яхузэхэмыкъута хэкупсагъэм и нагъыщэщ, щIэблэхэм я зэпыщIэныгъэр къэзыгъэлъагъуэщ, Хэкум къулыкъу хуэщIэнымкIэ, фIылъагъуныгъэ хуиIэнымкIэ щапхъэщ. Ди щихъ пщэрылъщ – ди адэшхуэхэм зэрахьа лIыхъужьыгъэр тщымыгъупщэнымрэ ахэр къытщIэтаджэ щIэблэхэм яIэщIэтлъхьэнымрэ.

Ди къэралышхуэр, лъэпкъ куэду зэхэт Урысейр сыт щыгъуи зэкъуэту, къарууфIэу щытыну! ГуфIэгъуэ дауэдапщэ иным щIэту, теплъэгъуэ дахащэу екIуэкIащ Черкесск гарнизоным, къару къулыкъухэм я къулыкъущIэхэр, къэзакъхэр, курсантхэр, юнармейцхэр, зауэ-хэкупсэ клубхэм зыщызыгъасэхэр утыкум зэрырикIуар. «Нобэ Хэкум и хъумакIуэ щIэблэм щIыхь хэлъу пащэ я адэжьхэм я гъуэгуанэр, лIыхъужьыгъэкIэ гъэнщIа тхыдэр. Къэрэшей-Черкесым щыпсэухэм хэлъхьэныгъэшхуэ хуащIащ ТекIуэныгъэ Иныр къэлъэщыным.

НобэкIи я зауэ къалэныр щIыхь хэлъу щагъэзащIэ СВО-м и фронтхэм. КъинэмыщIауэ, илъэс 80-м щIигъукIэ зэрыщытам хуэдэу, фронтым щыIэхэм ящхьу, къызэрымыкIуэ зэкъуэтыныгъэ къагъэлъагъуэ тылым зи гуащIэдэкI лэжьыгъэр къызэзыгъэпэщхэм, абыхэм къакъуэт жылагъуэм, цIыхубэм, ТекIуэныгъэр къэгъэгъунэгъуным яхузэфIэкI къару хэзылъхьэхэм. Дэ пщIэшхуэ хуэтщIу дохъумэ фронтовикхэм я фэеплъыр, Хэкум зи гъащIэр хуэзыгъэтIылъахэр, тылым гугъу зыщезыгъэхьахэр, къэралыр зауэ нэужь хьэлъэхэм зэфIэзыгъэувэжахэм я щапхъэм дытету допсэу. НобэкIэ ди къарур — ди зэкъуэтыныгъэращ, Хэкум хуэтщI фIылъагъуныгъэращ, къэралым дызэрыхуэщыпкъэращ», — къыпидзэжащ республикэм и лIыщхьэм.