ЛIыгъэр зи нагъыщэ

Урысейм и хьэлэмэт ихъумэу нобэ зауэ операцэ хэхам хэт ди зауэлI дэтхэнэри, шэч хэлъкъым, иджырей зэманым и лIыхъужьщ. Абыхэм УФ-м и лIыщхьэм къахуигъэува къалэнхэр нэгъэсауэ ягъэзащIэ, я унагъуэхэр, я хэку цIыкIур, Урысей псор шынагъуэм щахъумэ. Сыт хуэдэ гугъуехь ахэр пэщIэмыхуами, щIыхьрэ щытхъурэ пылъу я къулыкъур яхь. Апхуэдэхэм ящыщщ Курск областым гъэIэпхъуэныгъэ гупым хэту зи къулыкъур езыхьэкI хьэбэздэс ГЪУЭЗДЖЭШ Беслъэн Руслан и къуэр.

Беслъэн и адэр къыщхьэщымытыжу, и анэ Зулинэ (МыкIытIэхэ япхъущ) и закъуэ къиIэтащ. Анэм и бын закъуэр, зауэ щыгъэтыжа, къызэрыкIуэ къулыкъуми игъэкIуэну и пщIыхьэпIи къыхэхуэтэкъым. АрщхьэкIэ, Беслъэн щIэх дыдэ къыдэкIуэтейуэ, и къару щызэрыгъуэтым, гупыж ищIащ къэралым иригъэжьа зауэ операцэ хэхам хыхьэну. Щысабия лъандэрэ плъагъут ар зэрыерыщыр. И Iэпкълъэпкъыр псыхьат, спортым хуабжьу дихьэхт. Беслъэн Хьэбэз дэт курыт еджапIэми, лицейми щыщIэсам спорт Iуэхугъуэхэм жыджэру хэтт, еджапIэхэм я щIыхьыр иIэту, увыпIэфIхэр къахуихьу. Д

этхэнэ ныбжьыщIэми хуэдэу, абыи езым и гуращэхэр иIэжти, ухуакIуэ-инженер IэщIагъэм хуеджэну хъуапсэу ищхьэ еджапIэм щIэтIысхьащ. АрщхьэкIэ еджэныр къызэпигъэури, къулыкъум яфIыдэкIащ. Къигъэзэжа нэужь, Iуэхуншэу дэмысын щхьэкIэ, жыпсыщI заводым щылэжьэн щIидзауэ, къэралыр щытыкIэ гугъум йоувэ — зауэ операцэ хэхар къожьэ. Беслъэн лъэныкъуэ зезыгъэз адыгэлIхэм ящыщтэкъыми, шыщхьэIу мазэм СВО-м макIуэ икIи нобэр къыздэсым зытехьа зауэ гъуэгум тетщ, къэралым ифI зэрихуэу. Адыгэ щIалэм зэуапIэр хуэхъуащ лIыгъэмрэ хьэлыфIхэмрэ я гъэунэхупIэ. Зыкъым абы щытхъурэ щIыхьу къилэжьар. Беслъэн зыхэт дзэ пакIэм и командирхэм къыхагъэщ абы къулыкъум деж гугъуехьу зыпэщIэувэ псори щыпкъэу къызэрызэринэкIыр, зауэ IэщIагъэм нэхъри хуэIэзэ хъуну, лъэныкъуэ куэдым зрипщытыну зэрыпылъыр

. Ар Луганск, Донецк Республикэхэм щекIуэкIа зэхэуэхэм хэтащ. Мы илъэсыр зэрыщIидзэрэ, Курск областым къулыкъу щещIэ: шэгынхэр зэуапIэм ирешалIэ, лагъым нэхъыбэу къыщыуэ щIыпIэхэм цIыхухэр къришурэ кърегъэл. Апхуэдэу, мы гъэм уIэгъэ хъуа цIыху 69-рэ къызэрыригъэлам папщIэ нагъыщэ лъагэ къыхуагъэфэщэну и цIэр ираIуащ. Беслъэн зэуапIэм щызэрихьэ лIыгъэмрэ гуеигъэмрэ, къыхуагъэув къалэнхэр ехъулIэныгъэ пылъу зэригъэзащIэм къыпэкIуа медалхэр зэрехьэ: «Участник СВО», етIуанэ нагъыщэ зиIэ «За воинскую доблесть», «За храбрость», «За спасение погибавших» нагъыщэхэр, Жуковым и цIэкIэ ят медалыр. Анэр хуабжьу мэгуфIэ щIалэм зигъэпсэхуну унэм къыщыкIуэжкIэ. Зулинэ къыхегъэщ зэуапIэм зэрыщыIэрэ абы и гупсысэкIэми и дуней еплъыкIэми зэрызахъуэжар, куэдкIэ нэхъ балигъ зэрыхъуар.

Езы Беслъэнщи, шэч къытрихьэкъым, зауэлIыр сыт хуэдэ гугъуехь хэмыхуами, хэкум къыбгъэдэкI дэIэпыкъуныгъэм и мыхьэнэр зэрыиным, ар хэти фIыуэ зэрызыхищIэм. Зэанэзэкъуэм фIыщIэшхуэ хуащI псапащIэ Iуэхухэм хуэжумарт Аргун Олег, Хьэбэз район администрацэм и тхьэмадэ Жу Тимур, жылагъуэ организацэхэм хэтхэм. Абыхэм ди щIалэхэм псапащIэ гулъэхэр хурагъашэ зэпыт…

Иужьрей зэманым Беслъэн еджэн щIидзэжащ заочнэу. ТекIуэныгъэм и Ныпым щIэту ар и хэкум къигъэзэжмэ, ищхьэ щIэныгъэр иIэу жыпсыщI заводым Iухьэжын, абдеж зыщиужьын и мурадщ. НыбжьыщIэм и мурадыфIхэр Тхьэм къригъэхъулIэ!

БОРЭНЫКЪУЭ Мадинэ