Лэжьыгъэ IуэхукIэ Къэрэшей-Черкесым щыIащ Пятигорскрэ Черкесскрэ я щихънагъ Феофилакт. Чыристан динырылажьэ пашэм и къэкIуэнымкIэ къызэщIиубыдащ Iуэху зэмылIэужьыгъуэ куэд.
ЭРКЕН — ЩЫХЬЭР жылагъуэм дэт Серафимовскэ къулъшырыфым Божественнэ литургиер щригъэкIуэкIащ. Черкесск къалэм, Покровскэ члисэм и Iэхэлъахэм щыIэ Покровскэ паркым зыщиплъыхьащ Черкесск къалэм и мэр Баскаев Алексей, Покровскэ члисэм и настоятель протоиерей Нартов Александр сымэ ящIыгъуу. ИкъукIэ игу ирихьащ икIи и гуапэу къыхигъэщащ паркым игъуэта зэхъуэкIыныгъэ къызэрымыкIуэхэр. Апхуэдэщ паркым ирагъэува тIысыпIэхэр, къэзыгъэнэху пкъохэр, лампIхэр, джэгупIэ утыкушхуэ уардэр, лъэс зекIуапIэхэр, спорт джэгупIэ утыкур, нэгъуэщI куэди. А псори щIэуэ ирагъэуващ, зызыгъэпсэхухэм, джэгунухэм, балигъи сабии ятегъэпсыхьауэ. Щихънагъ Феофилакт Баскаев Алексей хуигъэфэщащ урыс чыристан члисэм и нагъыщэ лъагэр — III нагъыщэ зиIэ, благовернэ князь Даниил Московскэм и цIэкIэ Орденыр. Апхуэдэ нагъыщэ лъагэр Баскаевым къратащ патриарх Кирилл и арэзыныгъэ хэлъу. Черкесск къалэм дэт Свято-Сергиевскэ еджапIэм егъэджакIуэхэм я семинарышхуэ щекIуэкIащ а махуэ дыдэм. Абыи хэлэжьы хьащ Феофилакт. Черкесск къалэм дэт щIэнгъуазэмкIэ Купсэм щекIуэкIащ е 6-нэ щIэныгъэ практическэ конференц — «Баталпашинские чтения», фIэщыгъэцIэр иIэу. ХабзэфI хъуауэ илъэс къэси ирагъэкIуэкI мыпхуэдэ зэIущIэхэм и нэхъыбапIэм лэжьыгъэр зытраухуэр къэзакъхэм я Iуэхухэращ, чыристан динращ. Мызыгъуэгум Iуэхур хуабжьу купщIафIэрэ убгъуауэ щытащ. Абы щхьэусыгъуэ хуэхъуащ конференцым къыщаIэта тхыдэ Iуэхугъуищыр: ТекIуэныгъэ Иныр мы гъэм илъэс 80 зэрырикъуар, Черкесск (Баталпашинск) къалэм и илъэс 200-р, святитель Тихон, Московскэ Патриархыр дунейм зэрехыжрэ илъэси 100 зэрырикъуар. Лэжьыгъэм хэтащ дин зэхуэмыдэхэр зезыхьэхэр, динырылажьэ пашэхэр, щIэныгъэрылажьэхэр, егъэджакIуэхэр, еджакIуэхэр, студентхэр. КъаIэта тхыдэ къэхъукъащIэхэм хуэфэщэн, гупсысэ куу зыкIуэцIылъ къэпсэлъэныгъэхэри утыкум къыщаIэтащ. Къыхагъэщащ къызыхэкIа лъэпкъ, зэрихьэ дин, зэрыт ныбжь… — зыми емылъытауэ, дэтхэнэми ди къэралым, ди хэгъуэгум, абы щыпсэу лъэпкъхэм къакIуа гъуэгуанэр, тхыдэр тцIыхун зэрыхуейр, ар щIэблэм хэкупсэ-лъэпкъыпсэ гъэсэныгъэ нэс зэрыхуэхъунур. «Баталпашинские чтения» лэжьыгъэр егъэкIуэкIынымкIэ арэзыныгъэ къайзыт, КъЧР-м и Iэтащхьэ Темрезов Рэшид, ар здрагъэкIуэкI Купсэм и унафэщI Ляшовэ Еленэ, конференцым хэлэжьыхьа дэтхэнэми Феофилакт фIыщIэ яхуищIащ, кърахьэжьа лэжьыгъэр къэуатыфIэрэ сэбэпрэ хъуну псоми яхъуэхъуащ. ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
