ЛэжьапIитI зэдэзыхьыну хуейм ицIыхупхъэр сыт? Сыт хуэдэ мардэхэр иIэ мы щытыкIэм, сыт хуэдэ хабзэхэр телажьэрэ? «Совместительство», «совмещение» лэжьэкIэм сыт хуэдэ зэщхьэщыкIыныгъэхэр яIэ? Абыхэми, нэгъуэщI упщIэхэми жэуапэгъу къыхуохъу КъЧР-м гуащIэдэкIымкIэ и Къэрал инспекцэм и унафэщI къалэнхэр зыгъэзащIэ БИДЖИЕВ Руслан.
— Сыт «совместительство» жыхуиIэр?
— Ар — гуащIэдэкI зэгурыIуэныгъэм тету, и лэжьыгъэ нэхъыщхьэм къыщыдэхуэ зэманым къриубыдэу, нэгъуэщI лэжьыгъэ Iыхьэ, улахуэ зытелъ игъэзэщIэнращ.
— Лэжьэгъуэ сыхьэт мардэ иIэ апхуэдэ лэжьыгъэм?
— Махуэм сыхьэти 4-щ мардэр (махуэм и лэжьэгъуэ сыхьэтым и ныкъуэ). Мазэр къапщтэми, апхуэдэщи, лэжьэгъуэ мазэм и ныкъуэращ «совместительство»-м и мардэр.
— ЖыхуэтIэм хуэдэ лэжьыгъитI щызэдихьым деж, лэжьэгъуэ махуэ псо лэжьэнкIэ хуит?
— Хуитщ: улахуэр зэрыгувам къыхэкIыу, лэжьапIэ нэхъыщхьэр къызэтеувыIамэ; лэжьыгъэ нэхъыщхьэм къыхуигъэув къалэнхэр игъэзэщIауэ, зэман къыхудэхуамэ; и узыншагъэ IуэхукIэ лэжьакIуэр и къалэнхэм къыпрагъэкIауэ, ауэ лэжьапIэтым абы иритын, е здиунэтIын нэгъуэщI лэжьапIэ щымыIэмэ, е здаунэтIам езы лэжьакIуэр кIуэну хуэмеймэ.
— ЛэжьапIэ зэдэхьынымкIэ гуащIэдэкI хуитыныгъэ зимыIэр хэт?
— Илъэс 18 иримыкъуахэр; узыншагъэмкIэ, гъащIэмкIэ щытыкIэ шынагъуэм епха лэжьыгъэм пэрытыр апхуэдэ дыдэ лэжьыгъэ зэдихьыну пэрыувэн хуиткъым; транспорт Iэмалхэм ирилажьэхэр, апхуэдэ зэхэзекIуэр зи къалэнхэр, зэдихьыну лэжьыгъэри абыхэм яхуэдэмэ.
— Лэжьыгъэ зэдэзыхьыр отпуск щыкIуэкIэ, сыт хуэдэ хуитыныгъэхэр иIэ?
— Илъэс къэс, ахъшэ телъу отпуск кIуэн, и лэжьыгъэ нэхъыщхьэм деж отпуск щыкIуэм техуэу; мази 6 мылэжьамэ — аванс отпуск етын; улахуэр къыхуэмынэу отпуск гъэкIуэн, зэдихь лэжьыгъэ етIуанэм деж и отпуск махуэхэр лэжьыгъэ нэхъыщхьэм деж нэхърэ нэхъ мащIэу щытмэ.
—«Совместительство»-мрэ «совмещение»-мрэ сыт я зэщхьэщыкIыныгъэр?
— «Совместительство» жыхуиIэм къикIыр: лэжьыгъэ етIуанэр щигъэзащIэр и лэжьапIэ нэхъыщхьэм къыхуигъэув къалэнхэр щызу зэфIиха нэужьщ; щхьэхуэу гуащIэдэкI зэгурыIуэныгъэ къагъэщI; зы лэжьапIэтIым е тIум я деж щылажьэ хъунущ.
«Совмещение» щыжытIэкIэ: и лэжьапIэ нэхъыщхьэм деж, и лэжьапIэтым деж, лэжьэгъуэ махуэм къриубыдэу щигъэзащIэ лэжьыгъэ щIыгъужыныгъэщ; гуащIэдэкI зэгурыIуэныгъэншэу зэфIокI.
Зыгъэхьэзырар ШЫБЗЫХЪУЭ Ирэщ
Больше на Черкес хэку
Подпишитесь, чтобы получать последние записи по электронной почте.
