Карачаевск къалэм дэт, къэрэшей лъэпкъыр зэхэзехуэн щащӀам хэкӀуэдахэм я фэеплъ комплексым деж пэкӀу щекӀуэкӀащ.
Абы хэтащ властым и къулыкъухэм я лӀыкӀуэхэр, жылагъуэ зэгухьэныгъэхэм я унафэщӀхэр, депутатхэр, диным и лэжьакӀуэхэр, хьэщӀэхэмрэ къалэдэсхэмрэ, республикэм и къалэхэмрэ районхэмрэ къикӀа лӀыкӀуэхэр. ПэкӀум хэтхэр щыму дакъикъэкӀэ щыта нэужь, дыуэ ящӀащ икӀи Мемориалым удз гъэгъахэр тралъхьащ.
Дауэдапщэм къыщыпсэлъащ КъЧР-м и Парламентым и спикер Иванов Александр, лъэпкъ, жылагъуэ зэгухьэныгъэхэм я унафэщӀхэр, нэхъыжьхэм я лӀыкӀуэ Джанибековэ Айшат, СВО-м хэт Акбаев Рэшид сымэ. Абыхэм я псалъэхэм къыщыхагъэщащ къэрэшейхэмрэ ди къэралым хэт адрей лъэпкъхэмрэ сыт щыгъуи къахэзыгъэщхьэхукӀ псэ къарур, пэжыгъэр я фӀэщ зэрыхъур, гуащӀафӀагъэр, хэкулӀыгъэ нэс зэрахэлъыр.
Ди адэжьхэм нэхъ щытыкӀэ хьэлъэ дыдэхэми яхъумэфа напэр, лӀыгъэр, хабзэм хуэпэжыныгъэр, Хэкум хуаӀэ лъагъуныгъэр лъабжьэ быдэ хуэхъуащ иджы зэгурыӀуэу, мамыру къэкӀуэнур зыухуэ КъэрэшейЧеркес лъэпкъыбэм. Къэрэшейхэр хэкум къыщыкӀуэжа махуэ жыжьэхэм хуэдэу, республикэм щыпсэу лъэпкъ зэкъуэшхэр ноби я блыпкъ зэгъэкъуауэ я Хэкум и ефӀэкӀуэныгъэм хущӀокъу. А зэкъуэтыныгъэр — Къэрэшей-Черкесымрэ лъэпкъ куэду зэхэт Урысей псомрэ я къаруушхуэщ, абыхэм я тегъэщӀапӀэ нэхъыщхьэщ, адэкӀи зэрызиужьынум и нагъыщэщ.
ДЗЭМЫХЬ Маринэ
Больше на Черкес хэку
Подпишитесь, чтобы получать последние записи по электронной почте.
