Лъэпкъыбзэхэм я зыужьыныгъэр

Накъыгъэм и 28 29 махуэхэм Карачаевск къалэм щызэхэтащ «Языки народов России. Перспективы и развитие» зи фIэщыгъэцIэ Урысейпсо щIэныгъэпрактическэ конференцэ. Абы и къызэгъэпэщакIуэу щытащ КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ Министерствэмрэ Алиев У. и цIэр зезыхьэ КъЧкъУ-мрэ, Урысейм и  ФАДН-м и дэIэпыкъуныгъэ хэлъу.

Лэжьыгъэм хэтащ щIэныгъэлIхэр, егъэджакIуэхэр, жылагъуэ Iуэхузехьэхэр, Урысейм и къэрал власть къулыкъухэм я лIыкIуэхэр, Москва, Уфа, Ставрополь, Владикавказ, Мэхъачкъалэ, Грозный, Налшык къикIахэр.

ЩIэныгъэ зэхыхьэр къызэIуихащ Алиев У. и цIэр зезыхьэ КъЧкъУ-м и ректор IэнатIэр пIалъэкIэ зыгъэзащIэ Узденов ТаусулътIан икIи и къегъэблагъэ псалъэхэм къыхигъэщащ иджырей гъащIэ къекIуэкIым лъэпкъыбзэхэр хъумэнымрэ абыхэм зыужьыныгъэ ягъэгъуэтынымрэ мыхьэнэ хэха зэриIэр.

Конференцым хэтхэм къегъэблагъэ псалъэкIэ захуигъэзащ КъЧР-м лъэпкъ IуэхухэмкIэ, цIыхубэ коммуникацэхэмрэ печатымрэкIэ и министрым: — Урысейм и беягъ нэхъыщхьэщ лъэпкъ зэхуэмыдэ куэд зэрыщызэдэпсэур, дэтхэнэми я лъэпкъыбзэ яIурылъу. Лъэпкъыбзэм лъэкIыныгъэ къыдет лъэпкъ къэс езым бгъэдэлъ къызэрымыкIуэ псэкупсэ щIэин лъапIэхэр къызыкъуихыну, уасэ ин зыхуищI хабзэхэр, щIэблэхэм зэIэпах фIагъ псори яхъумэну.

Дэтхэнэ лъэпкъым дежкIи мыхьэнэ хэха иIэщ урысыбзэм — нэгъуэщI лъэпкъхэм ящыщ цIыху мелуан бжыгъэхэр зэрызэгурыIуэм. Ар джынымрэ жылагъуэм хэпщэнымрэ лъэкIыныгъэ къытхузэрагъэпэщ  щэнхабзэ зэгурыIуэныгъэхэр къэгъэщIыным, лъэпкъхэр гъунэгъу зэхуэщIыныр, Урысейми, хамэ къэралхэми граждан мамырыгъэр щыхъумэныр.

Мыхьэнэ хэха иIэщ Урысейм щыпсэу лъэпкъхэм я бзэхэр Интернетым хуиту щыбгъуэтынымрэ щыджынымрэкIэ щытыкIэ щхьэхуэхэр къызэгъэпэщыным, электроннэ ресурсхэм загъэужьыным, электроннэ зэдзэкIакIуэхэр къэгъэщIыным, егъэджэныгъэ утыкухэм, контентыр лъэпкъыбзэхэмкIэ зэбгрыгъэкIыным.

Дэ къалэнышхуэ къытпэщылъщ Урысейпсо граждан щытыкIэр ди къэралым щыпсэу лъэпкъхэм я щэнхабзэ зэмылIэужьыгъуэхэмкIэ гъэбыдэнымкIэ», — къыхигъэщащ Есенеев Мурат.

Конференцым къекIуэлIахэм хъуэхъу псалъэкIэ зыхуагъэзащ КъЧР-м егъэджэныгъэмрэ щIэныгъэмрэкIэ и министрым и къуэдзэ Бэчыжь Фатимэ, щэнхабзэмкIэ и министр Агырбэ Зураб, филологие щIэныгъэхэм я доктор, профессор, Бэрбэч Хь. и цIэр зезыхьэ Къэбэрдей – Балъкъэр къэрал университетым нэмыцэ, роман филологиемкIэ и кафедрэм и унафэщI Аликаев Р. сымэ.

Дэтхэнэми я пэублэ псалъэхэм деж гулъытэ нэхъыщхьэ щрагъэгъуэтащ лъэпкъыбзэхэр хъумэнымрэ зыужьыныгъэ ягъэгъуэтынымрэ хуэгъэзауэ лажьэ хэгъуэгу программэхэм, мультимедийнэ бгъэдыхьэ-

кIэхэм, лингвистическэ къэхутэныгъэхэр зэрырагъэкIуэкIым, жылагъуэр куууэ а Iуэхухэм къызэрыхыхьэм.

Къалъытащ егъэджэныгъэ, щIэныгъэ,  художественнэ литературэм зэрызиужьыр, печать, электроннэ СМИ-хэм: радио, телевиденэ хуэдэхэм, апхуэдэуи къэрал лъэпкъ театрхэм зэфIах лэжьыгъэр зэрыуасэншэр. ДяпэкIэ зэлэжьыну лъэныкъуэгъазэхэри къыхалъытащ: лъэпкъыбзэ зыужьыныгъэм хуэунэтIа гъэмахуэ еджапIэхэр къэгъэщIыныр, кружокхэмрэ зэIущIэ зэхуэмыдэхэмрэ зэхэшэныр, апщыгъуэми, дэнэ дежи лъэпкъыбзэкIэ мыхъумэ щымыпсалъэу.

Къэпсэлъахэм нэхъыщхьэу гу лъатащ сабийм бзэр ицIыхуныр и унагъуэм деж къыщежьэн зэрыхуейм, лъэпкъыбзэм пщIэ хуищIыныр, ирипсэлъэныр, абы игъэзащIэ къалэныр къыгурыIуэным мыхьэнэ къызэрымыкIуэ зэригъэзащIэм.

Унагъуэм зэпымыууэ лъэпкъыбзэр щыIун зэрыхуейм шэч къытрамыхьэу къытеувыIащ.