Лъэпкъхэм я зэгурыIуэныгъэр нэхъыщхьэу

ЩэкIуэгъуэм и 26-м республикэм и Iэтащхьэ Темрезов Рэшид яIущIащ Къэрэшей-Черкесым и жылагъуэ организацэхэм я Лъэпкъпсо Советым хэтхэм. Апхуэдэу, а зэIущIэм хэлэжьыхьащ Правительствэм и лIыкIуэхэр, лъэпкъ-щэнхабзэ жылагъуэ зэгухьэныгъэхэм я унафэщIхэр, хэгъуэгум и динырылажьэхэр. «Дытепсэлъыхьащ упщIэ зэхэщIыхьа куэдым, Къэрэшей-Черкесым и этнощэнхабзэ къэкIуэнум и зыужьыныгъэм ехьэлIауэ. Щхьэихауэ и гугъу тщIащ жылагъуэ зэкъуэтыныгъэм, лъэпкъхэм я зэгурыIуэныгъэм, ахэр хъумэным, гъэбыдэным, зегъэужьыным.

Ди Президентым игъэбелджылащ 2036 гъэм нэгъунэ къызэщIиубыдэ, къэрал политикэмкIэ Стратегиер. Абы и мыхьэнэ, къалэн пажэр – тхыдэкIэ зэфIэува Урысейм и зэкъуэтыныгъэр, бгъэдэлъ щIыналъэхэр хъумэныр, зэпIэзэрытыныгъэр къызэгъэпэщыныр, къэралым щыпсэу лъэпкъхэм ефIэкIуэныгъэ ягъэгъуэтыныр, урысей лъэпкъхэм загъэужьынращ. Къыхызогъэщ зэдэтщIэ ди Iуэхухэр зэуэ къэралым и ЛIыщхьэм игъэува къалэным телэжьэн зэрыхуейр», — щыжиIащ зэIущIэм Темрезов Рэшид.

КъинэмыщIауэ, мыбдеж щытепсэлъыхьащ щэнхабзэхэр, хабзэхэр, лъэпкъыбзэхэр хъумэным, загъэужьыным, еджапIэхэмрэ сабий IыгъыпIэхэмрэ я деж лъэпкъыбзэхэр щыхъумэным хуэгъэзауэ программэр зэрыщагъэзащIэм, жылагъуэ зэгухьэныгъэхэм дэIэпыкъуныгъэ зэрадгъэгъуэтыфыну бгъэдыхьэкIэхэм, апхуэдэуи, зыгъэзащIэ власть къулыкъухэр жылагъуэ организацэхэм зэрадэлажьэм, лъэпкъхэм яку дэлъ зэхущытыкIэхэр тыншыгъуэу щытын зэрыхуейм. «Унафэ къэсхьащ Черкесск къалэм дэт щэнхабзэмкIэ Унэм и хэщIапIэм къыщызэзгъэпэщыну иджырей зэманым тегъэпсыхьа, лъэпкъ организацэхэм я зэпсэлъапIэ, республикэм и этномузейр здыщIэтыну утыку. Абыи къыщымынэу, унафэ къызэрысхьамкIэ, 2026 гъэм лъэпкъ жылагъуэ организацэ къэс, Лъэпкъпсо советым хэтхэм, сом мелуан зырыз яттынущ, я этнощэнхабзэ зэхуэмыдэ хэр хъумэным ехьэлIа Iуэхугъуэхэр ирагъэкIуэкIын папщIэ», — къыпищащ хэгъуэгум и лIыщхьэм. КъыкIэлъыкIуэуи, фIыщIэ ин яхуищIащ КъЧР-м и муфтий Эркенов Мухьэмэд-хьэжы, Псыхуабэрэ Черкесскрэ я Архиепископ Феофилакт, лъэпкъ жылагъуэ организацэхэм я лIыщхьэхэм, хэгъуэгум лъэпкъ, дин зэгурыIуэныгъэ щыгъэIэным хуащI хэлъхьэныгъэшхуэм, ябгъэдэлъ гурыхуагъым, граждан еплъыкIэ тэрэзым папщIэ.

А псори республикэм и хъумакIуэ нэхъыщхьэ зэрыхъур, мыхъумыщIагъэхэмрэ щIэпхъаджагъэ къэмыхъунымрэ зэрыпэщIэтыр къыхигъэщащ. «ДяпэкIи ди зэдэлэжьэныгъэр — ар ди къэкIуэнум хуэтщI хэлъхьэныгъэфIщ, лъэпкъ къэс къыгурыдгъаIуэу ар зыуэ щыт Iэпкълъэпкъым – къарууфIэ, зыри къызытемыкIуэну Урысейм и зы Iыхьэу зэрыщытыр», — жиIащ республикэм и Iэтащхьэм.