Комиссэм и зэIущIэ

Къэрэшей-Черкесым лэжьыгъэ IуэхукIэ къеблэгъащ УФ-м ФедерацэмкIэ и Советым зыхъумэжыныгъэмрэ шынагъуэншагъэмрэкIэ и Комитетым и тхьэмадэм и къуэдзэ, Урысейм и ЛIыхъужь, генерал-полковник Бондарев Виктор.

Темрезов Рэшид федеральнэ хьэщIэр ди щIыналъэм къызэреблэгъам, зэдэлэжьэныгъэмкIэ Комиссэм и къыкIэлъыкIуэ зэIущIэр ди хэгъуэгум щрагъэкIуэкIыну мурад зэращIам папщIэ фIыщIэ хуищIащ. «Къэрэшей-Черкесым къыбгъэдэкIыу УФ-м ФедерацэмкIэ и Советым щыIэ Къэзэнокъуэ Кърыми хэту, Бондарев Викторрэ сэрэ зэдедгъэкIуэкIа зэIущIэм дыщытепсэлъыхьащ ФедерацэмкIэ Советымрэ ди республикэмрэ зэдэлэжьэнымкIэ мыхьэнэшхуэ зиIэ, лэжьыгъэр нэхъри езыгъэфIэкIуэну Iуэхугъуэхэм. Апхуэдэщ зыхъумэжыныгъэмрэ шынагъуэншагъэмрэкIэ Комитетым и къалэнхэм ящыщхэр. Хэгъуэгу къалэнхэр фӀагъ хэлъу зэфӀэгъэкӀынымкӀэ ФедерацэмкӀэ Советым зэпымыууэ дэлэжьэным и мыхьэнэр къыхэзгъэщащ.

Дэ уасэшхуэ худощӀ ФедерацэмкӀэ Советым, спикер Матвиенко Валентинэ и щхьэкӀэ, гулъытэу къытхуащӀымрэ дагъэгъуэт дэӀэпыкъуныгъэмрэ. Шынагъуэншагъэр гъэбыдэным теухуа ӀуэхухэмкӀэ зэдэлэжьэныгъэр ди къалэн пэрытхэм ящыщщ», — МАХ-м щитхащ республикэм и лӀыщхьэм. Зэпсэлъэныгъэм и темэ нэхъыщхьэхэм ящыщ зыуэ щытащ щӀалэгъуалэм драгъэкIуэкI зауэ-хэкупсагъэ лэжьыгъэр, ди дзэ къулыкъущӀэхэмрэ абыхэм я унагъуэхэмрэ защӀэгъэкъуэныр. Бондарев Виктор, Къэрэшей-Черкесым къыбгъэдэкӀа сенаторхэм я гъусэу, зэпымыууэ хэтщ Урысейм и гъунапкъэ щӀыналъэхэмрэ и хэгъуэгущӀэхэмрэ гуманитар щӀэгъэкъуэныгъэ яхуэутӀыпщыным. Федеральнэ хьэщӀэм жиӀащ ди хъумакӀуэхэмрэ абыхэм я унагъуэхэмрэ ядэӀэпыкъунымкӀэ республикэм лэжьыгъэшхуэ зэрыщекӀуэкӀыр. А къалэнхэр федеральнэ повесткэм деж нэхъыщхьэу къонэ. КъинэмыщӀауэ, абы къыхигъэщащ республикэм и зыужьыныгъэфӀыр икӀи жиӀащ федеральнэ лъэныкъуэкӀэ зыхуей хуэзэу дэӀэпыкъуныгъэ къаритыну зэрыхьэзырыр. ЗэӀущӀэм икӀэм лъэныкъуитӀми къыхагъэщащ адэкӀи зэрызэдэлэжьэну Ӏуэхугъуэ пыухыкӀахэр. Ипщэ Осетием и депутатхэм я лӀыкӀуэхэм я унафэщӀу щытащ Ипщэ Осетием и Парламентым и къэралщӀыб политикэмрэ парламент зэпыщӀэныгъэхэмрэкӀэ и комитетым и унафэщӀ Дриаев Зазэ.

Лэжьыгъэ ӀуэхукӀэ зэхаша Ӏуэхугъуэ нэхъыщхьэу щытащ УФ-м ФедерацэмкӀэ и Советымрэ Ипщэ Осетие Республикэм и Парламентымрэ я зэдэлэжьэныгъэмкӀэ комиссэм и зэӀущӀэр, абы щызэпкърахащ парламент зэхущытыкӀэхэм зегъэужьыным теухуа Ӏуэхугъуэхэр. ЗэӀущӀэм и кӀэм лӀыкӀуэхэм я унафэщӀхэм фӀыщӀэ хуащӀащ УФ-м и Правительствэм, УФ-м и МИД-м, ФедерацэмкӀэ Советым Ипщэ Осетием хуащӀ дэӀэпыкъуныгъэм, комиссэм и лэжьыгъэм зэрызыщӀагъэкъуам папщӀэ, апхуэдэуи къыхагъэщащ Къэрэшей-Черкесым дауэдапщэр фӀагъ лъагэ иӀэу къызэрызэрагъэпэщар. КъинэмыщӀауэ, парламентарийхэр щыӀащ Орджоникидзевскэ жылагъуэм щыӀэ, Кавказ щхьэдэхыпӀэхэм я хъумакӀуэхэм я фэеплъ комплексым, МафӀэ мыужьыхым удз гъэгъахэр щагъэтӀылъащ. Апхуэдэуи, делегацэм хэтхэр щыӀащ 2004 гъэм Беслан къалэм къыщыхъуа гуауэм хэкӀуэдахэм я фэеплъу Коста Хетагуровэ къуажэм къыщызэӀуаха фэеплъ сыным. ИужькӀэ хьэщӀэхэр еблэгъащ Урысейм и ЛӀыхъужь Боташев Къ. и цӀэр зезыхьэ зауэ еджапӀэ купсэм. Бондарев Виктор къэрал нагъыщэхэр яритащ ди хэкуэгъухэм, СВО-м хэтхэм. КъинэмыщӀауэ, ахэр хэтащ СВО-м и лӀыхъужь Джабаев Бислан и фэеплъ пхъэбгъур республикэ военкоматым и унэм къыщызэӀуахым.

Зыгъэхьэзырар ЕЗАУЭ Маринэщ