«Къэрэшей — Черкесыр —хэгъуэгу нэхъыфIипщIым ящыщщ!»

Мыпхуэдэ псалъэхэмкIэ ди хэгъуэгум щекIуэкIа, профилактикэ бэзым и къулыкъухэм я унафэщIхэр зыхэта зэIущIэ убгъуар къызэIуихащ УФ-м и Президентым сабийхэм я хуитыныгъэхэмкIэ и Уполномоченнэ Львовэ-Беловэ Марие.
Зытепсэлъыхьар зы упщIэщ – социальнэ анэ-адэншагъэмкIэ профилактикэ бэзым ехьэлIауэ Урысейпсо инспекцэм хэгъуэгум хуэгъэзауэ иригъэкIуэкIа щIэплъыкIыныгъэхэр къызэщIэкъуэжынращ.
Федеральнэ хьэщIэм къызэрыхигъэщамкIэ, Къэрэшей-Черкесым деж сабий къэс езым яй дыдэм хуэдэу ядолажьэ. Хэгъуэгум лэжьыгъэшхуэ щокIуэкI социальнэ анэ-адэншагъэм гулъытэ хуэщIынымрэ сабий зиIэхэм защIэгъэкъуэнымрэ хуэгъэзауэ, уеблэмэ къызэрымыкIуэ бгъэдыхьэкIэхэр къагъэсэбэп СВО-м хэтхэм я унагъуэхэм зэрызыщIагъакъуэ IэмалхэмкIэ.
А псоми я фIыгъэкIэ, сабий социальнэ IуэхущIапIэхэм щаIыгъ ныбжьыщIэхэм процент 35-кIэ хэщIащ. НобэкIэ хэгъуэгум щылажьэ сабий социальнэ IуэхущIапIэхэм ныбжьыщIэ 86-рэ щаIыгъщ, абыхэм ящыщу блыр – сабий Унэм.
Илъэс кIуам щегъэжьауэ лэжьакIуэ гупым республикэм деж къыщапщытэ хабзэм тету сабийхэр стационархэм зэрыщаIыгъыр, КъЧР-м сабийхэм я хуитыныгъэхэмкIэ и Уполномоченнэ Алакаевэ Марие и нэIэм щIэту.

IуэхущIапIэхэм я лэжьыгъэм и фIагъыр къэзыгъэ-лъагъуэу, уасэ зэрыхуащIар сабийхэм унагъуэ зэрырагъэгъуэтаращ.
«НобэкIэ Къэрэшей-Черкесыр къэралым и хэгъуэгу нэхъыфIипщIым хохьэ социальнэ анэ-адэншагъэмкIэ къызэрызэрагъэпэщ лэжьыгъэмкIэ. Арами, адэкIи зэрызыдужьын, зызыхуэдгъэпсын диIэщ, анагъэмрэ сабиигъуэмрэ яхьэлIа упщIэхэм Урысейм и Президент Путин Владимир Владимирович хуищI гулъытэр къыхэтлъытэ-кIэрэ. Апщыгъуэми, УФ-м и Президентым сабийхэм я хуитыныгъэхэр хъумэнымкIэ аппаратым дяпэкIи гуащIа-фIэу дэлажьэкIэрэ, зэпыщIэныгъэр ягъэбыдэ. Си фIэщ мэхъу, тхузэфIэкIынущ сабийхэр фIыуэ къыздалъагъу унагъуэхэм зэрахуэзэнур», — къыпищащ хэгъуэгум и лIыщхьэм.

УФ-м и Президентым сабийхэм я хуитыныгъэхэмкIэ и Уполномоченнэ Львовэ — Беловэ Марие: «Си гуращэ нэхъыщхьэр — республикэм анэ-адэншэ сабийхэр здыщаIыгъ IуэхущIапIэ щымыIэжынращ, сабийуэ хъуар унагъуэ насыпыфIэхэм щапIынращ. Си фIэщ мэхъу дэтхэнэ сабийри, зи ныбжь хэкIуэтари къэухъуреихьауэ щытын хуейщ гулъытэкIэ, фIылъагъуныгъэкIэ, тыншу псэун хуейщ къыдалъхуахэмрэ и Iыхьлыхэмрэ ящIыгъуу. Кавказым деж а упщIэр сыт щыгъуи щытащ щIыхь бгъэдыхьэкIэу. Абы папщIэ, жэуаплыгъэ зыхь къулыкъухэм къагурыIуэн хуейщ гуп зэгъэуIуауэ, зэпыщIауэ зэрызэдэлэжьэнур, гъащIэм щытыкIэ хьэлъэ иригъэува унагъуэхэм сыт и лъэныкъуэкIи защIэгъэкъуэнымкIэ»…
«Си фIэщ мэхъу дяпэкIи зэдэдлэжьыну Iуэхухэм ехъулIэныгъэ хэлъу дыпигъэлъэщыну УФ-м и Президентым къытхуигъэув къалэнхэм, абы щыщуи анагъэр, сабиигъуэр хъумэнымкIэ, а лъэныкъуэхэм яхьэлIа упщIэхэр зэфIэхынымкIэ. Си гум къыбгъэдэкIыу фIыщIэ хузощI Марие Алексеевнэ хэгъуэгум къытхуищIа гулъытэм, ди сабий омбудсмен Алакаевэ Марие къызэрыдэIэпыкъум, и лэжьыгъэмкIэ зыкъызэрыщIигъакъуэм папщIэ» — жиIащ хэгъуэгум и лIыщхьэм.
Зыгъэхьэзырар АБИДОКЪУЭ Люсанэщ