Къэрэшей-Черкес Республикэм и Махуэмрэ Черкесск къалэр къызэрагъэщIрэ илъэс 200 зэрырикъумрэкIэ дывохъуэхъу!

ПщIэ зыхуэтщI ди хэкуэгъухэ!

ФокIадэм (сентябрым) и 6-7 махуэхэм Къэрэшей-Черкес Республикэм и Махуэмрэ Черкесск къалэр къызэрагъэщIрэ илъэс 200 зэрырикъумрэкIэ дывохъуэхъу!

Республикэм и Махуэр — ар зыпэтщIын щымыIэ ди лъахэм ис лъэпкъхэм я зэкъуэтыныгъэмрэ я зэгурыIуэныгъэмрэ щIэзыгъэбыдэ махуэщIщ, Урысей уардэм дыхэткIэрэ къэралыгъуэ зэрыдгъуэтам и нагъыщэщ. Дэ дрогушхуэ щэнхабзэ куэд зэрыдиIэм, пщIэ зэхуэтщIу икIи ныбжьэгъугъэ зэкIэлъызетхьэу дыкъызэрыгъуэгурыкIуэм, а псори лъабжьэ быдэ тхуохъу зыдужьынымкIэ. Псом хуэмыдэу мы махуэщIыр хэIэтыкIауэ дызыпежьащ, Урысей Федерацэм и Президент Путин Владимир и УнафэкIэ ди республикэ къалащхьэм и илъэс 200-р зэдыдогъэлъапIэ. ЛIыщIыгъуитIыр — ар зэман зэхуэмыдэхэм халъхуа щIэблэхэм я гуащIэдэкI ехъулIэныгъэхэмкIэ, зауэ зэхуэмыдэхэм къыщагъэлъэгъуа хахуагъэмрэ я лэжьэкIэ жыджэрымрэкIэ гъэнщIа лъэхъэнэ псощ. Станицэ цIыкIуу къыщIидзэри ар хъуащ зи экономикэкIи щэнхабзэкIи ену зызыужь иджырей административнэ купсэ. Гуапэ зэрыхъущи, Черкесск и юбилеймрэ ТекIуэныгъэ Иным и Илъэс 80-мрэ зэтехуащ. Дэ фIыщIэшхуэ яхуэтщIу дигу къыдогъэкIыж зауэм кIэ езыта щIэблэ хахуэхэр, ди щхьэ яхудогъэщхъ икIи Хэку зауэшхуэм и ветеранхэмрэ тылым и лэжьакIуэхэмрэ игъащIэкIи я фэеплъыр тхъумэну къалэн зыхудощIыж! Ахэр, лIыгъэ яхэлъу, къимыкIуэту икIи ТекIуэныгъэр къызэрахьынумкIэ я фIэщхъуныгъэр ямыгъэкIуэду илъэс хьэлъэхэм пхыкIащи — я цIэхэр хэгъуэгум и тхыдэм сыт щыгъуи дыщэпскIэ хэтхауэ къэнэнущ. Дэ мамыр уафэм дыщIэту дызэрыпсэур абыхэм я фIыщIэщи, дахуэфащэу щытыным дыхущIокъу. Ди хэкуэгъу хахуэхэр, Черкесск щыпсэухэри яхэту, зауэ операцэ хэхар здекIуэкI щIыпIэхэм Хэкум ифI зыхэлъ Iуэхухэр ипэкIэ щыгъэкIуэтэным псэемыблэжу и ужь итщ. Дропагэ лъэхъэнэ зэхуэмыдэхэм Хэкум и хъумакIуэу щыта дэтхэнэми. Нобэ, Урысей Федерацэм и Президент Путин Владимир и дэIэпыкъуныгъэкIэ, Къэрэшей-Черкесымрэ абы и къалащхьэмрэ зайгъэужьынымкIэ дыубзыхуа Iуэхухэр тыншу зэфIыдох, зэгъусэу псэуалъэщIэхэр доухуэ, гъащIэм и щытыкIэ тыншхэр къызыдогъэпэщ. Дэ ехъулIэныгъэу диIэм республикэм щыпсэухэм я гуащIэ Iыхьэ хэмылъкIэ къанэкъым, абыхэм я къызэгъэпэщыкIэр, я зэчиймрэ я жанагъымрэ хуагъэтIылъ къэралымрэ хэгъуэгумрэ егъэфIэкIуэным. ПщIэ зыхуэтщI ди хэкуэгъухэ! МахуэщI гукъыдэжым фи унагъуэхэм хуабагъэрэ гуфIэгъуэрэ кърилъхьэну Тхьэм жиIэ! Дывохъуэхъу псэуныгъэ быдэ, дэрэжэгъуэ, унагъуэ зэIузэпэщыныгъэ, мамырыгъэрэ фIыгъуэрэ фиIэну! ФIыуэ тлъагъу ди Къэрэшей-Черкесымрэ абы и налкъутымрэ — Черкесск къалэмрэ — адэкIи къэмыувыIэу лъагапIэщIэхэм хурекIуэ, зареужь дяпэкIи къытщIэхъуэну щIэблэхэм папщIэ! МахуэщIымкIэ, ди хэкуэгъу лъапIэхэ, Къэрэшей-Черкесым и хьэщIэхэ!

ТЕМРЕЗОВ Рэшид, Къэрэшей-Черкес Республикэм и Iэтащхьэ

ИВАНОВ Александр, Къэрэшей-Черкес Республикэм и ЦIыхубэ ЗэIущIэм (Парламентым) и тхьэмадэ

АРГУН Мурат, Къэрэшей-Черкес Республикэм и Правительствэм и тхьэмадэ