Къэралым и лъабжьэ быдэщ

ЩэкIуэгъуэм и 28-м Черкесск къалэм дэт щэнхабзэмкIэ Унэм щагъэлъэпIащ УФ-м и ФНС-м и Къэрэшей-Черкес республикэ УФНС-р къызэрагъэщIрэ илъэс 35-рэ зэрырикъуар, хьэкълыкъ къулыкъум и IэщIагъэ махуэщIыр.

Пшыхьым хэтащ Къэрэшей-Черкес Республикэм и Iэтащхьэ Темрезов Рэшид, КъЧР-м и ЦIыхубэ ЗэIущIэм (Парламентым) и тхьэмадэ Иванов Александр, республикэм и Правительствэм и тхьэмадэ Аргун Мурат, УФ-м и Федеральнэ ЗэIущIэм ФедерацэмкIэ и Советым КъЧР-м къыбгъэдэкIыу хэт сенатор Къэзэнокъуэ Кърым, УФ-м и Президентым и лIыкIуэу СКФО-м щыIэмрэ и Аппаратымрэ къабгъэдэкIыу КъЧР-м щыIэ федеральнэ инспектор Мэкъуауэ Тимур, Черкесск къалэм и мэр Баскаев Алексей, нэгъуэщIхэри. Пэублэ псалъэр иришажьэкIэрэ, КъЧР-м и Iэтащхьэм къыхигъэщащ илъэс 35-м къриубыдэу хэгъуэгу хьэкълыкъ къулыкъум иригъэкIуэкIа лэжьыгъэ иныр, абы технологиещIэхэм, зэманым къигъэув мардэхэм екIуу, цифровизацэ Iэмалхэм зэрызытригъэпсыхьар.

— Хьэкълыкъ къулыкъум пщIэ зыхуэсщI и лэжьакIуэхэми, УФНС-м и унафэщI Текеев Расул Таубий и къуэми си гум къыбгъэдэкIыу сывохъуэхъу фи IэщIагъэ махуэщIымкIэ, хэгъуэгу хьэкълыкъ къулыкъур къызэрагъэщIрэ илъэс 35-рэ зэрырикъумкIэ! Абы къриубыдэу лэжьыгъэ купщIафIэ, евгъэкIуэкIащ. Ди Лъэпкъ пашэ Путин Владимир зэрыжиIащи, «Хьэкълыкъ къулыкъур — бюджетыр къызэрагъэщI, ар зытращIыхь лъабжьэщ, абы и лэжьыгъэм елъытащ социальнэ упщIэхэр зэфIэха зэрыхъунур, шынагъуэншагъэр, къэралым и зыхъумэжыны гъэр, ухуэныгъэр, зыужьыныгъэр зэрыщыту. Фи къулыкъур — къэралым и гъусэ пэжщ, Урысейм и финанс зэпIэзэрытыныгъэмрэ экономикэ зыужьыныгъэмрэ къызэригъэпэщу. Шэч къытесхьэкъым дяпэкIи фи ехъулIэныгъэхэм къызэрыхэхъуэнум, лъагапIэщIэхэм фызэрыхунэсынум, — жиIащ хэгъуэгум и Iэтащхьэм.

А псалъэхэр хьэкълыкъ къулыкъущIэхэм яхь гуащIэдэкI жэуаплыгъэ лъагэм и щыхьэтщ. Арыншэуи хъунукъым. АтIэ, абыхэм я лэжьэкIэм, IэщIагъэм зэрыхащIыкIым елъытащ хьэрычэт къудамэм и щытыкIэри, бюджетым и хэхъуэри, социальнэ программэхэм къриубыдэу еджапIэхэр, сабий IыгъыпIэхэр, сымаджэщхэр, гъуазджэ, щэн хабзэ IуэхущIапIэхэр, гъуэгухэр ухуэнри, зэгъэзэхуэжынри. — ФIыщIэ фхузощI фи гуащIэ гъерэтыфIэм, фи гуащIэдэкI гукъыдэж мыужьыхым папщIэ. Сывохъуэхъу дяпэкIи ехъулIэныгъэщIэхэмкIэ! Узыншагъэ быдэ фиIэну, фи унагъуэкIи, фи щхьэкIи зывузэщIыну, фехъулIэну! — жиIащ КъЧР-м и Iэтащхьэм.