Къэрал нагъыщэхэмкIэ

Урысейм и Махуэм КъЧР-м и Iэтащхьэ Темрезов Рэшид къэрал, хэгъуэгу нагъыщэхэр яхуигъэфэщащ республикэм и цIыху гуащIафIэхэм. МахуэщI дауэдапщэм хэтащ КъЧР-м и Правительствэм и тхьэмадэ Аргун Мурат, УФ-м и Федеральнэ ЗэIущIэм ФедерацэмкIэ и Советым КъЧР-м къыбгъэдэкIыу хэт сенаторхэр: Къэзэнокъуэ Кърымрэ Салпагаров Ахъмэтрэ, Къэрал Думэм и депутат Узденов Солтан, Урысейм и Президентым и полномочнэ лIыкIуэу ди хэгъуэгум щыIэм и аппаратым и федеральнэ инспектор нэхъыщхьэ Макоев Тимур, Черкесск къалэм и мэр Баскаев Алексей сымэ.

Къызэхуэсахэм захуигъазэкIэрэ, республикэм и Iэтащхьэм къызэрыхигъэщащи, Путин Владимир и унэтIыныгъэм, УФ-м и Правительствэм и дэIэпыкъуныгъэм я фIыщIэкIэ, республикэм лъэпкъ, хэгъуэгу проектхэр, федеральнэ программэхэр ехъулIэныгъэ хэлъу щыпхагъэкI. Ахэр хуэунэтIащ хэгъуэгум и зыужьыныгъэм, республикэм щыпсэухэм я социальнэ гъащIэр егъэфIэкIуэным. Иужьрей илъэсхэм къудамэ зэхуэмыдэхэм зыужьыныгъэфI нэрылъагъухэр яIэщ. Апхуэдэщ медицинэр, егъэджэныгъэр, спортыр, мэкъумэш хъызмэтыр, туризмэр. «Ауэ, шэч зыхэмылъыр аращи, ди беягъ нэхъыщхьэр ди цIыхухэращ. Мы махуэщIым и мыхьэнэр нэхъри лъагэ ещI лъэпкъ куэду дызэрызэхэтым, дэтхэнэми и гуащIэдэкI къэгъэщIыныгъэр къэралми хэгъуэгуми я зыузэщIыныгъэм зэрыщхьэпэм. Нобэ мыбдеж къекIуэлIащ IэщIа гъэ зэхуэмыдэхэм ирилажьэхэр: дохутырхэр, егъэджакIуэхэр, юристхэр, экономистхэр, мэкъумэш хъызмэтым и гуащIэрылажьэхэр — къэралыр ипэкIэ кIуэтэным зи гуащIэ узыншэ хуэзыгъэтIылъхэр», — къыхигъэщащ Темрезов Рэшид. Хэгъуэгум и Iэтащхьэр къытеувыIащ СВО-м щыIэ зауэлIхэм я лIыгъэм, абыхэм къагъэлъагъуэ гуеигъэм, къэралым и плъыр щыпкъэу зэуапIэхэм зэрыIутым. «Нобэ Урысейр — цIыху мелуан бжыгъэ, лъэпкъ зэхуэмыдэхэм къахэкIахэр, дин зэмыщхь зезыхьэхэр зэзышалIэ, мамыррэ зэгурыIуэу зыгъэпсэу къэрал Уардэщ. Шэч къытесхьэкъым — ди зэкъуэтыныгъэр ди къару лъэщщ. Ди зэдыхуэпабгъэныгъэм ди хэгъуэгури, къэралри нэхъри лъэрыхь ищIынущ», — жиIащ Темрезов Рэшид. А псалъэхэм къадэкIуэу УФ-м и Президент Путин Владимир къыбгъэдэкIа къэрал нагъыщэ лъагэхэр яхуигъэфэщащ республикэм щыщ лэжьакIуэ щыпкъэхэм.

УФ-м и Президентым и ФIыщIэ тхылъкIэ и цIэр къраIуащ зэпыщIэныгъэхэмрэ коммуникацэхэмрэ загъэу жьынымкIэ Купсэм и унафэщIым и къалэнхэр зыгъэзащIэ, «Архъыз-24» телеканалым и редактор нэхъыщхьэ, КъЧР-м и ЦIыхубэ ЗэIущIэм (Парламентым) и депутат Батчаевэ Мадинэ, СВО-м и ветеран, «Защитники Отечества» фондым и хэгъуэгу къудамэм и координатор Гусхэ Замир, Зеленчук станицэм дэт еджапIэм и егъэджакIуэ Капалкинэ Юлэ, «Зыуэ щыт Урысей» партым и зыгъэзащIэ комитетым и унафэщIым и къуэдзэ Катчиевэ Лидэ, республикэм и Жылагъуэ палатэм и пашэ Ляшовэ Еленэ сымэ. А махуэм республикэм и Iэтащхьэм щIыхьыцIэхэр яхуигъэфэщащ къудамэ зэхуэмыдэхэм гуащIэдэкI ехъулIэныгъэфIхэр щызыIэрызыгъэхьа, илъэс куэд хъуауэ хэгъуэгум и щIыхьыр Iэтыным хуэлажьэхэм. Гуапэ зэрытщыхъуну, «Къэрэшей-Черкес Республикэм щIыхь зиIэ и экономист» щIыхьыцIэ лъагэр хуагъэфэщащ ди лъэпкъэгъу бзылъхугъэ гуащIафIэм, илъэс 35-рэ хъуауэ бухгалтер нэхъыщхьэ IэщIагъэ мытыншым телажьэ, зи творчествэмкIэ ди щIэджыкIакIуэхэм фIы дыдэу яцIыху Гъуэщокъуэ (Жумай) Мадинэ .