Къэпщытэжыныгъэхэр

Къэрэшей-Черкесым и Правительствэм и Унэм хэгъуэгу зэIущIэ щызэхэтащ Правительствэм и тхьэмадэм и къуэдзэ Поляков Евгений и унафэ щIэту. Ар теухуауэ щытащ мы гъэм къэрал къэпщытэжыныгъэ аттестацэм (ГИА-м) кърикIуар гъэбелджылынымрэ дяпэгъэ ар егъэкIуэкIыным зыхуэгъэхьэзырынымрэ.

ЗэIущIэм къыщапщытэжащ блэкIа экзамен кампанэр, 2026 гъэм и кIэм ехъулIэу зэфIахын хуей упщIэхэр муниципалитетхэмрэ егъэджэныгъэ организацэхэмрэ къабгъэдэкIахэм я пащхьэм сэтей къыщащIащ. Дауэдапщэм и лэжьыгъэм къыхашащ къулыкъузэпх коммиссэм хэтхэр, районхэмрэ къалэ округхэмрэ я Iэтащхьэхэм я къуэдзэхэр, муниципальнэ координаторхэр, егъэджэныгъэмкIэ Управленэхэм, курыт еджапIэхэмрэ ику ит IэщIагъэ къыздыщIах еджапIэхэмрэ я унафэщIхэр. КъЧР-м егъэджэныгъэмрэ щIэныгъэмрэкIэ и министр Кравченко Иннэ убгъуауэ доклад къищIащ щIызэхуэса темэ нэхъыщхьэхэмкIэ. Министрым фIыщIэ яхуищIащ экзаменым пыщIа лэжьыгъэшхуэр зэгъэуIуауэ икIи жэуаплыгъэ ин зэрихьыр къыгурыIуэу хэти зэрыбгъэдыхьам папщIэ. Абы ищIыIужу къыхигъэщащ къэрал къэпщытэжыныгъэ аттестацэр республикэм сыт щыгъуи хуэдэу еджапIэхэм зэрыщекIуэкIар, етIанэгъэ а Iуэхум мураду хуаIэнумрэ къалэну зыхуагъэувыжыпхъэмрэ.

ЗэIущIэм хэтахэр зрипсэлъа упщIитхур ятеухуауэ щытащ: ГИА-р 2025 гъэм ирагъэкIуэкIыну зыщагъэхьэзырым технологическэ и лъэныкъуэкIэ Iуэхум къыхалъытамрэ 2026 гъэм ГИА-р щекIуэкIкIэ лъэпощхьэпо, хабзэкъутэныгъэ къэмыгъэхъуным кIэлъыплъынымрэ; мыгъэрей ГИА-м кърикIуар щIэплъыкIыжынымрэ егъэджэныгъэмкIэ хэгъуэгу бэзым зиужьын щхьэкIэ щIаплъыкIар тегъэщIапIэ ящIу, адэкIэ лэжьэнымрэ; ебгъуанэ, епщIыкIузанэ классхэм ГИА-р щаткIэ психологопедагогикэ дэIэпыкъуныгъэкIэ къызэрызэгъэпэщамрэ 2026 гъэм егъэджакIуэхэм я пщэрылъ нэхъыщхьэу щытынымрэ; 2025 гъэм экзаменхэр щаткIэ хабзэкъутэныгъэу къыщIагъэщахэм.

Къэрал къэпщытэжыныгъэ аттестацэм теухуа зэIущIэм и кIэм гуфIэгъуэ щIыкIэм иту ФIыщIэ тхылъхэр хуагъэфэщащ 2025 гъэм Къэрэшей-Черкесым экзаменхэр къыщызэгъэпэщынымрэ щегъэкIуэкIынымрэ жыджэру хэлэжьыхьахэм.

ЛЫХЬ Тимур