Мы гъэм Черкесск къалэр илъэс 200 зэрырикъуам и щIыхькIэ ирагъэкIуэкI дауэдапщэхэм ипкъ иту, республикэ къалащхьэм и Думэм щызэхэта зэIущIэм щагъэлъэпIащ къалэм дэс цIыху щыпкъэхэмрэ Черкесск и махуэщIыр къызэгъэпэщыным хэлъхьэныгъэ хуэзыщIахэмрэ. IэнатIэ зэхуэмыдэхэм пэрыт къалэдэсхэм я цIэр а махуэм нагъыщэ зэмылIэужьыгъуэхэмкIэ къыхагъэщащ. Гулъытэ зыхуащIахэм ящыщщ егъэджакIуэхэр, дохутырхэр, водителхэр, щэнхабзэмрэ спортымрэ, къалэ щIыпIэхэр гъэкъэбзэнымрэ гъэдэхэнымрэкIэ къулыкъухэм я лэжьакIуэхэр, нэгъуэщIхэри.
Республикэ къалащхьэм и Думэм и тхьэмадэ Дедук Валерий къыщыпсалъэм къыхигъэщащ зи IуэхущIафэ нэсыр къыхэгъэщыпхъэ дэтхэнэми къалэм и зыужьыныгъэм, и ефIэкIуэныгъэм хэлъхьэныгъэ зэрыхуищIар, юбилей махуэщIыр гъэлъэпIэным зэрыхэлэжьыхьар.
— Илъэс 200-р махуэбжым къыщыгъэлъэгъуа бжыгъэ къудейкъым. Псом япэрауэ, ар къалэм и тхыдэр зыухуэ цIыхухэм я махуэщIщ. Ахэр ухуэныгъэм, егъэджэныгъэм, творчествэм, цIыху гъащIэр къегъэлыным пылъ, Урысейми ди хэку цIыкIуми я хьэлэмэтым гурэ псэрэкIэ хуэлажьэ защIэщ. Дэтхэнэми фи гуащIэдэкIым папщIэ гум къыбгъэдэкIыу фIыщIэ фхузощI! — жиIащ абы.
Апхуэдэ цIыхухэм я гуащIэдэкI лэжьыгъэ купщIафIэмрэ къалэм и зыужьыныгъэм хэлъхьэныгъэу хуащIамрэ къапэкIуэу, КъЧР-м и Iэтащхьэ Темрезов Рэшид, КъЧР-м и Правительствэм, республикэм и ЦIыхубэ ЗэIущIэм (Парламентым), Черкесск къалэ Думэм къабгъэдэкIа ЩIыхь, ФIыщIэ тхылъхэр зыхуагъэфэщахэм иратыжащ. Къалэ махуэщIыр гъэлъэпIэным ипкъ иту, «Черкесск къалэм щIыхь зиIэ и цIыху» цIэ лъапIэри нэрыбгиплIым фIащащ.
Гуапэ тщыхъуащ абыхэм ди лъэпкъэгъу Шенкао (Амирокъуэ) Гуащэ зэрахэтыр. Дауи, абы Черкесск къалэм и зыужьыныгъэм хуищIа хэлъхьэныгъэр хэткIи наIуэщ. Илъэс 50-м щIигъуауэ абы и лэжьыгъэр хуэгъэзащ къалэдэсхэм я узыншагъэр хъумэным. Къалэ поликлиникэм и дохутыр нэхъыщхьэу куэдрэ лэжьащ, мы зэманым а медицинэ IуэхущIапIэ дыдэм дохутыр нэхъыщхьэм и къуэдзэщ.
Шенкао Гуащэ Урысей Федерацэми КъЧР-ми щIыхь зиIэ я дохутырщ. Къыхуагъэфэща щIыхьыцIэри и IуэхущIафэхэмрэ и гуащIэдэкI лэжьыгъэмрэкIэ къилъэщыжащ.
— Си гуапэщ апхуэдэ гулъытэ къызэрысхуащIар, ауэ сэ апхуэдиз фIыщIэ збгъэдэлъу схужыIэнукъым. Сэр нэхърэ нэхъыбэ зыщIа Iэджи щыIэщ. Си Iуэху слъагъуу, си къалэн згъэзащIэу, цIыхухэм сэбэп сазэрыхуэхъуным сыпылъу сыкъэгъуэгурыкIуа къудейщ. Черкесск къалэр нэхъ дахэ, нэхъ къабзэ хъуну, къалэдэсхэр узыншэну, ефIэкIуэну сыхуейщ. АбыкIэ сэ схузэфIэкIыр сощIэ, — къыджиIащ Гуащэ.
Апхуэдэ къабзэу, «Черкесск къалэм щIыхь зиIэ и цIыху» хъуащ КъЧР клиническэ сымаджэщым гу-лъынтхуэ хирургиемкIэ и къудамэмрэ хэгъуэгу лъынтхуэ Купсэмрэ я унафэщI Темрезов Марат, гъуазджэмкIэ езанэ сабий еджапIэм и егъэджакIуэ Бессоновэ Людмилэ, къалэм дэт езанэ спорт еджапIэм и унафэщI Мерамкулов Юрэ сымэ.
(ЯгъэлъэпIахэр тхыгъэм хэт сурэтым итщ). БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
