Адыгэм и гушхуапIэ къызэрымыкIуэщ ди лъэпкъым къыхэкIа, Урысейпсо, Къэралыбэ, Дунейпсо щIэныгъэ утыкухэм зи цIэ щызыгъэIу, зи гъащIэр щIэныгъэмрэ егъэджэныгъэмрэ хуэзыгъэтIылъ и цIыху пажэхэр, еджагъэшхуэхэр, IэщIагъэлI нэхъусахэр.
Оскар Уайльд итхыгъащ: «ЩIэныгъэ зэгъэгъуэтыным ухуэпабгъэныр къызыпэкIуэр еш уимыIэу илъэс пщIы бжыгъэ еджэныгъэм зэрыхуэбгъэтIылъращ» жэуэ. Нобэрей ди тхыгъэр зытедухуа АБДОКЪУЭ Ларисэ ЗэIудин и пхъум и гуащIэдэкI лэжьыгъэм уриплъэмэ, хьэкъ пщохъу — еш имыIэу абы зиужьащ щIэныгъэ – егъэджэныгъэ и лъэныкъуэкIэ, апщыгъуэми, зыхуеджэмрэ зригъэгъуэт щIэныгъэмрэ къемэщIэкIыу илъытэу. Арагъэнщ бзылъхугъэ гуапэм иджыри ныбжьыщIэ дыдэу щIыхузэфIэкIар щIэныгъэцIэ лъагэр къилъэщыныр.
Ларисэ и гъащIэм и къекIуэкIыкIам IупщIу къыхощ зытеува щIэныгъэ-егъэджэныгъэ гъуэгуанэм пщащэр зэрыхуэщыпкъэмрэ зэрыхуэпэжымрэ, псэемыблэжу игури и псэри и лэжьыгъэм зэрыхуэпабгъэр. И псэм фIэфI IэщIагъэ ирилажьэм, абы къару къыхелъхьэ, ар и нэгум иболъагъуэ, абы къыдэкIуэуи, ехъулIэныгъэ лъагэхэм хущIегъэкъу, щIэныгъэ зэгъэгъуэтыныр зэрыгъунэншэм шэч къытыуигъэхьэкъым.
Дунейр напIэдэхьеигъуэу зэрылъатэм, гъащIэм зэрызиужьым къыдэкIуэу, щIэныгъэм елэжьхэри нэрылъагъуу ныбжькIэ нэхъ щIалэ хъуащ. Иджырей гъащIэм тегъэпсыхьа щIэныгъэрылажьэр — къежьа цифровой технологиещIэхэр фIыщэу зыгъэIэрыхуэ, зыхуигъэувыжа къалэн лъагэхэм ерыщу, къикIуэт имыIэу хуэкIуэ, зи лэжьыгъэкIэ ехъулIэныгъэшхуэхэр зыIэрызыгъыхьэ, къэхутэныгъэщIэхэм хуэпабгъэ цIыхущ. А жыхуэтIэ хьэл-щэн псори зыдэплъагъу щIэныгъэрылажьэщ дахагъри губзыгъагъри къызэбэкI ди лъэпкъэгъу пщащэр — Абдокъуэ Ларисэ.
И гуащIэдэкI лэжьыгъэмкIэ зыхунэсам и гугъу пщIымэ, нобэкIэ адыгэ пщащэ гурыхуэр цифровой трансформацэмрэ егъэджэныгъэм стратегическэу зиужьынымрэкIэ проректорщ, КъЧР-м и РИПКРО-м жылагъуэ-щIэныгъэ егъэджэныгъэмкIэ кафедрэм и доцентщ, экономикэ щIэныгъэхэм я кандидатщ, ВАК-м и доцентщ, щIэныгъэ лэжьыгъи 180-м щIигъу и IэдакъэщIэкIщ. Абыхэм ящыщу 24-р ВАК-м и журналхэм къытехуащ.
КъинэмыщIауэ, жыджэру щIэныгъэ-къэхутэныгъэ лэжьыгъэхэр ирегъэкIуэкI, холэжьыхь щIэныгъэ -практическэ конференцхэр къызэгъэпэщынымрэ егъэкIуэкIынымрэ. Апхуэдэ и зы гуащIэ инщ иджыблагъэ ди лъэпкъэгъу щIэныгъэрылажьэр щIаIэтар…
Черкесск къалэм дэт, Байрамуковэ Хь. и цIэр зезыхьэ Къэрал Лъэпкъ тхылъхъумапIэм и лъэтеувэр щащIащ Ларисэ и Iэдакъэ къыщIэкIа егъэджэныгъэ-методическэ тхылъитIым: «Офис-менеджер: планирование карьеры и «Организация работы офиса менеджера».
Лъэтеувэ пшыхьым къеблэгъащ икIи купщIафIэу къыщыпсэлъащ КъЧР-м и ЦIыхубэ ЗэIущIэм (Парламентым) и депутат, республикэ Адыгэ Хасэм и тхьэмадэ, ДАХ-м и вице-президент Аслъэнхэ Алий, экономикэ щIэныгъэхэм я доктор, «Гуманитар дисциплинэхэр» кафедрэм и профессор Тоторкулов Шыхьэбэн, философскэ щIэныгъэхэм я доктор, профессор, жылагъуэ-щIэныгъэ егъэджэныгъэмкIэ кафедрэм и унафэщI Шыбзыхъуэ Светланэ, экономикэ щIэныгъэхэм я доктор, «Финансы и кредит» кафедрэм и профессор Шэрдан Саидэ, Хъупсырокъуэ Хъ. И цIэр зезыхьэ, КъЧР-м гуманитар къэхутэныгъэхэмкIэ институтым и унафэщI ЩакIуэ Ахьмэд, КъЧР-м физкультурэмрэ спортымрэкIэ министр Тхьэгъэпсэу Ахьмэд, щIэныгъэрылажьэхэр, бзэ щIэныгъэлIхэр, журналистхэр, жылагъуэ Iуэхузехьэхэр, студентхэр, СМИ-хэр.
Абдокъуэ Ларисэ къыщыхъуащ Черкесск къалэм. Япэ-ебланэ классхэм Ларисэ щеджащ къалэм и е 10-нэ курыт еджапIэм. 1990 гъэм зи № 18 курыт еджапIэщIэр щаухуэм, е 11-нэ классым абдеж къыщиухыжащ. ЕджапIэщIэм 1992 гъэм япэ дыдэ къыщIигъэкIа еджакIуэхэм, дыжьын медалыр зыIэщIэлъу къэзыухахэм ящыщщ ди лъэпкъэгъу пщащэр.
Ищхьэ щIэныгъэ щызригъэгъуэтащ Къэрэшей-Черкес технологическэ институтым, уеблэмэ IэщIагъитIым хуеджэну и дэфтэрхэр щIилъхьауэ щытащ: «Менеджмент», «Бухгалтерский учет и аудит». ИкIи, дыжьын медалыр зыIэщIэлъ пщащэм лъэкIыныгъэ иIэт зы экзамен иту, абыкIэ нагъыщэфI къихьмэ, ищхьэ еджапIэм щIыхьауэ къилъытэну… Пщащэм зэуэ IэщIагъитIымкIэ итащ экзаменхэр. ИкIи, и нэIэ нэхъ зытехуар «Менеджмент» IэщIагъэщIэ къэунэхуарат.
ИкIи, 1992 гъэм ищхьэ еджапIэм и студент хъури, абдеж щеджэхункIэ еджакIуэ гурыхуэу, жыджэру зыкъыщигъэлъэгъуащ. Къыхиха IэщIагъэмкIи зэи щIегъуэжакъым.
Менеджер IэщIагъэр зэзыгъэгъуэта Ларисэ 1996 — 2023 гъэхэм Ищхъэрэ – Кавказ къэрал академием и гуащIэ щигъэтIылъащ: ассистенту, егъэджакIуэ нэхъыжьу, доценту.
2000 гъэм Ставрополь къэрал мэкъумэшхъызмэт академием «Рыночная трансформация личных подсобных хозяйств в условиях Карачаево-Черкесской республики» и кандидат диссертацэр щIыхь хэлъу пхигъэкIри, щIэныгъэцIэ лъагэр къыхуагъэфэщащ.
2003 г ъэм Абдокъуэ Ларисэ къыхуагъэфэщащ менеджменымрэ маркетингымрэкIэ кафедрэм и доцент фIэщыгъэцIэр. Зэпымыууэ и щIэныгъэ нагъыщэм хегъахъуэ.
2023 гъэм и бадзэуэгъуэ (июль) мазэм щыщIэдзауэ щIэныгъэрылажьэ гуащэр щолажьэ КъЧР-м и РИПКРО-м. ИщхьэкIэ къызэрыхэдгъэщауэ, нобэкIэ, Абдокъуэ Ларисэ цифровой трансформацэмрэ егъэджэныгъэм стратегическэу зиужьынымрэкIэ проректорщ.
Егъэджэныгъэ-методическэ тхылъитIыр дунейм къытехьэным авторым илъэситху лэжьыгъэ, и щIэныгъэ куурэ Iуэху зэхэщIыкI инрэ ярихьэлIащ. А лэжьыгъэ уасэншэхэм къакIуа гъуэгуанэм теухуауэ, мыращ авторым жиIар:
— Тхылъхэр дунейм къытехьэн зэрыхуеймкIэ гупсысэр къыщежьар «менеджмент»-м къикIымрэ «менеджер»-р зихуэдэмрэ къазэрыгурымыIуэм щыхьэт сыщытехъуаращ. Студентхэм а лъэныкъуэгъазэхэр я пащхьэ щислъхьэкIэ, упщIэ къагъэув хабзэт. Ялъытэт, я нэхъыбэм деж, менеджерыр – сатуущIэ-чэнджэщакIуэу. Ауэ, хьэкъыпIэкIэ аратэкъым зэрыщытыр.
Мы егъэджэныгъэ-методическэ тхылъ цIыкIухэр дунейм къыщIытехьам и къалэн пажэр – ахэр егъэджакIуэхэмрэ студентхэмрэ дэIэпыкъуэгъу яхуэщIынращ; абыхэм къагурыIуэн папщIэщ менеджментыр – ар гъуазджэу, управленэу зэрыщытыр, менеджерыр – ар цIыхур, Iэзагъ хэлъу лъэныкъуэгъазэ псомкIи зезыгъакIуэрщ, — къыддэгуэшащ тхылъхэм я авторыр.
— ЩIэныгъэ зыбгъэдэлъ лъэпкъым и къэкIуэнур дахэщ, абы ущымыгуфIыкIыну Iэмал иIэкъым. Лъэпкъым щыщ цIыху нэхъыбэм щIэныгъэфI ябгъэдэлъмэ, еджагъэшхуэхэр и куэдмэ, абы зыуигъэужьынущ, ипэкIэ уигъэкIуэтэнущ. Мы зэманым гъащIэм улъэщIэмыхьэу мэлъей. Абы къыхэкIкIэ, мыхьэнэшхуэ иIэщ гъащIэм, лэжьыгъэ къызэгъэпэщыкIэщIэхэм уадэкIуэтэным, технологиещIэхэм я дунейм ухэпщIэным. Нобэ зи тхылъ утыку кърахьа щIэныгъэрылажьэри тетщ апхуэдэ Iуэху бгъэдыхьэкIэм. Уеблэмэ, нэхъри иригъэфIакIуэу, ехъулIэныгъэ къигъэлъагъуэу, — жиIащ Адыгэ Хасэм и тхьэмадэм.
«ЕгъэджакIуэфI ухъун папщIэ, ебгъэдж щIэныгъэри ебгъаджэхэри уи псэм хэпщIауэ, фIыуэ плъагъуу щытыпхъэщ» — жиIэгъащ урыс еджагъэшхуэ Ключевский Василий…
Больше на Черкес хэку
Подпишитесь, чтобы получать последние записи по электронной почте.