IэщIагъэм драгъэхьэх

«Студент десант» Урысейпсо акцэм ипкъ иту Хьэбэз къуажэм дэт, Арэшыкъуэ Р. и цIэр зезыхьэ курыт еджапIэм и класс нэхъыжьхэр: е 9-нэ, е 11- нэм щеджэхэр ирагъэблэгъащ «Хьэбэз» МОВД-м и хэщIапIэм. Мы зэIущIэм и мыхьэнэ, и къалэн нэхъыщхьэу щытар хабзэхъумэ къулыкъухэм ущылэжьэным ухуеджэным пщIэрэ щIыхьрэ зэрыхэлъым ныбжьыщIэхэр щыгъэгъуэзэныр, дегъэхьэхынращ.
ЗэIущIэр иригъэжьащ, ар зытеухуауэ щытынум псори щызыгъэгъуэза, зэпсэлъэныгъэр зэгъэпэщауэ езыгъэкIуэкIа, «Хьэбэз» МОВД-м къулыкъущIэхэм ядэлэжьэнымкIэ и IэщIагъэрылажьэ нэхъыжь, полицэм и майор Уэрдокъуэ Лилэ. ДяпэкIэ IэщIагъэ къыхэзыхыну, ищхьэ, ику ит щIэныгъэ зэзыгъэгъуэтыну къызыпэщылъ ныбжьыщIэхэм къадэпсэлъэну, МВД-м къулыкъу щыпщIэным хэлъ хуэгъэкIуэтэныгъэхэм, фIагъым къахутепсэлъыхьыну еджакIуэхэм къаIущIащ, гуихауи къапсэлъащ «Хьэбэз» МОВД-м и унафэщI, полицэм и полковник Жантемыр Руслан, «Хьэбэз» МОВД-м и Жылагъуэ Советым и тхьэмадэ БакIуу Назир, ветеранхэм я Советым и тхьэмадэ Темыр Алий, Жылагъуэ Советым хэт, «Черкес хэку» газетым и редактор нэхъыщхьэ Абидокъуэ Люсанэ сымэ.
ЖыпIэнурамэ, зэIущIэ-зэпсэлъэныгъэр Iыхьэ зыбжанэкIэ гуэшауэ щытащ. ИкIи, япэ Iыхьэм — познавательнэ фIэщыгъэцIэр зиIам къриубыдэу ныбжьыщIэхэр ирагъэблэгъащ МОВД-м и хэщIапIэм и щIыбагъ пщIантIэм, кинолог гупым я лэжьыгъэм, полицэ къулыкъущIэхэм къагъэсэбэп транспортхэм, дэтхэнэри зэрызэщхьэщыхуам, къулыкъум хуэгъэпсауэ къызэрызэгъэпэщам нэIуасэ хуащIащ. ПсалъэкIэ зэрыщагъэгъуэзам къыщымынэу, еджакIуэ гурыхуэхэм лъэкIыныгъэ яIащ транспортым кIэрытIысхьэну, яфIэгъэщIэгъуэн упщIэхэм жэуап ягъуэтыну. НыбжьыщIэхэм полицэ къулыкъущIэм и пщэрылъхэмрэ лэжьыгъэмрэ щызыгъэгъуэзар полицэм и подполковник КIудж Тимур Абы иужьым иту къулыкъум и къудамэ къэс ныбжьыщIэхэр щигъэгъуэзащ. НэIуасэ яхуищIащ къулыкъущIэхэм, абыхэм я лэжьыгъэ къызэгъэпэщыкIэм. Псалъэ папщIэ, япэ къудамэм — «дежурная часть» фIэщыгъэцIэр зезыхьэм и лэжьыгъэм щагъэгъуазэкIэрэ, ирагъэлъэгъуащ абыхэм я хэщIапIэр, Iэмал имыIэу къызэрызэгъэпэщауэ щытын хуей оборудованэхэмрэ оргтехникэмрэ, къахуэкIуэ (е кърашалIэ) цIыхухэр здыщIатхэ, здепсалъэ пэшхэр. НыбжьыщIэхэм, нэхъ гъэщIэгъуэныжыр аращи, пщащэхэращ полицэ къулыкъум и автотранспортым зезыпщытыну гукъыдэж зиIар. Аращ атIэ, щIалэ цIыкIухэм «къэмыхъу щIыкIэ» ящIэ транспорт зэхэлъыкIэри, лIэужьыгъуэхэри. Арами, нэгузыужь «студент десант»-м хэтауэ хъуар, уеблэмэ егъэджакIуэхэри къызыбгъэдэмыкIыжыфу куэдрэ зыбгъэдэтар кинолог къулыкъум щаIыгъ псэущхьэ дахащэхэращ. А лэжьыгъэ лъэныкъуэгъазэм икъукIэ екIуу, удэзыхьэхыу къытеувыIащ, сабийхэм я упщIэ куэдми жэуап яригъэгъуэтащ инспектор-кинолог, полицэм и лейтенант нэхъыщIэ Уэхъутэ Р. Нэгузыужь узэщIыныгъэ программэм и къыкIэлъыкIуэ Iыхьэм къызэщIрагъэубыдащ щIалэ цIыкIухэр зыдихьэхыпауэ зэплъа, полицэ къулыкъум бгъэдэлъ Iэщэ зэмылIэужьыгъуэхэм я гъэлъэгъуэныгъэр. ИкIи, НПП ОРЛС-м и IэщIагъэрылажьэ, полицэм и майор КIэмрыгу А. щхьэихауэ Iэщэ къэс гулъытэ хуищIащ: зэпкърихащ, зэпкърилъхьэжащ. КъызэрымыкIуэу телъыджащэт КъЧР-м и МВД-м и МЭКО-м и эксперт нэхъыжь, полицэм и майор Щохъужь Сэхьид дактилоскопическэ щIэтхэныгъэр зэрыригъэ кIуэкIым уеплъыныр, ущIэдэIуныр. Уеблэмэ, щапхъэ папщIэу зы ныбжьыщIэм и Iэпэм лъэужьхэр зэуэ трихри, фэеплъуи къритыжащ. ИщхьэкIэ къызэрыхэдгъэщауэ, студент десант Iуэхугъуэр Iыхьэ зыбжанэу гуэшауэ екIуэкIащ. ИкIи, иужьрейм деж пэшым щIэсу ныбжьыщIэхэмрэ Iуэху зэхэщIыкI ин зыбгъэдэлъ къулыкъущIэхэмрэ зэпсэлъэныгъэ зэдрагъэкIуэкIащ. Нэхъ тегъэчынауэ полицэ къулыкъум уеджэну пщIэ зэрыхэлъым къытеувыIащ «Хьэбэз» МОВД-м и унафэщIым и къуэдзэ, ОРЛС-м и унафэщI, полицэм и подполковник КIудж Тимур. Уеблэмэ ику ит, ищхьэ военнэ еджапIэхэм щIыхьэнымкIэ, еджа нэужь лэжьапIэ IэнатIэ ягъуэтыжынымкIэ щыIэ хуэгъэкIуэтэныгъэхэм щIигъэдэIуащ дяпэкIэ IэщIагъэ къыхэзыхыну къызыпэщылъ еджакIуэхэр. ЖиIащ полицэ къулыкъур IэщIагъэ зыхуэхъуну гуращэ зиIэ дэтхэнэми зэрадэIэпыкъунур. КупщIэ хэлъу екIуэкIа зэпсэлъэныгъэм кIэух хуэхъуащ егъэджакIуэхэмрэ еджакIуэхэмрэ я фIыщIэ псалъэхэр.
ЩОХЪУЖЬ Л