IэщIагъэ IэзагъэмкIэ

 Къэрэшей-Черкес Республикэм егъэджакIуэ, гъэ­сакIуэ нэхъыфIхэр щагъэбелджылащ. Абы теухуа дауэдапщэр Черкесск къалэм дэт сабий зэчиифIэхэм я хэгъуэгу «Спутник» Купсэм щекIуэкIащ.

 Жюрим ягъэбелджылащ «ЕгъэджакIуэ нэхъыфI», «Лъэпкъыбзэмрэ литературэмрэкIэ егъэджакIуэ нэхъыфI», «ГъэсакIуэ нэхъыфI» Урысейпсо зэпеуэхэм щы­текIуахэр. Мыбы ипэкIэ егъэджакIуэхэмрэ гъэсакIуэхэм-рэ ябгъэдэлъ зэфIэкIымрэ IэщIагъэ зэхэщIыкIымрэ къагъэлъэгъуагъэххэт.

— ЕджакIуэ къэс езым фIыуэ илъагъу, щапхъэ зытрих, и гъащIэм лъэужь дахэ къыщызыгъанэ иIэжщ. Апхуэдэхэм я мыхьэнэр къэлъытэгъуейщ. Нобэ мыб­деж къекIуэлIа егъэджа­кIуэхэмрэ гъэсакIуэхэмрэ фIыщIэ псалъэхэр фхудо­гъэфащэ. Фи гуащIэдэкI лэжьыгъэ купщIафIэм, къыхэфха IэщIагъэм фызэры­хуэщыпкъэм я хьисэпкIэ дэтхэнэми ди щхьэр фхудо­гъэщхъ — жиIащ Къэрэшей-Черкесым егъэджэныгъэмрэ щIэныгъэмрэкIэ и министр Кравченко Иннэ.

Апхуэдэу, жюрим къызэрипщытэжамкIэ,   егъэджа­кIуэ нэхъыфIу къалъытащ Карачаевск къалэм дэт е 1-нэ курыт еджапIэм ма­тематикэмрэ физикэмрэкIэ сабийхэм щIэныгъэ яб­гъэдэзылъхьэ Хьэнфэн Сабинэ.

Илъэсым и гъэсакIуэ нэхъыфIу къыхагъэщащ Къар-дэныдж станицэм дэт «Березка» сабий IыгъыпIэм и гъэсакIуэ Гончаровэ Иринэ.

«Лъэпкъыбзэмрэ лите­ратурэмрэкIэ егъэджакIуэ нэхъыфI» зэпеуэм япэ увыпIэр хуагъэфэщащ Карачаевск къалэм дэт е 3-нэ курыт еджапIэм щезыгъаджэ Алиевэ Ларисэ.

А зэпеуэхэм пэрыт щыхъуахэр федеральнэ утыкум щекIуэкIынум хэтынущ.

КъинэмыщIауэ, 2023 гъэм щыщIэдзауэ «Лъэпкъыбзэмрэ литературэмрэкIэ егъэ­джакIуэ нэхъыфI» зэпеуэм ипкъ иту, сабий IыгъыпIэхэм деж лъэпкъыбзэм гулъытэ нэхъыбэ хуэзыщI гъэсакIуэхэри къыхагъэщ хъуащ. Апхуэдэу, бзэм  зе­гъэужьыным хуэгъэзауэ нэIурыт лэжьыгъэхэр нэхъ гъэщIэгъуэну ягъэзащIэу жюрим къилъытащ Дзэмыхь Иринэ, Братхэ Саратинэ, Тебуевэ Мединэ сымэ.

Зэпеуэм щытекIуахэм республикэм и Iэтащхьэ Темрезов Рэшид къыбгъэ­дэкIа фIыщIапщIэ хуагъэфэщащ.

Мы Iуэхум хэта дэтхэнэри щIыхь тхылъкIэ къыхагъэщащ.

БОРЭНЫКЪУЭ Мадинэ