Еджэныр, гугъу зригъэхьыныр зимыщIасэ щIалэ цIыкIум лIыжь Iущ гуэрым чэнджэщ къритащ: — Мо тафэ нэщIым телъ мывэжьым махуэ къэс еIэ. Умыщхьэхыу, уимыкIуэту, утемызашэу. — Сытым щхьэкIэ? — Ар иужькIэ уэр-уэру къыбгурыIуэнщ. Абы диублауэ, щIалэ цIыкIур махуэ къэс мывэ абрагъуэм еIунщIт. И фIэщ хъут: елIалIэмэ, и къару хилъхьэмэ, мывэжьыр зэми-зэ и пIэм иригъэкIуэтынущ. И нэгум къыщIэувэт, уеблэмэ, а мывэ абрагъуэр къиIэтауэ, псори къеплърэ и къарур зрагъэщIэгъуэкIыу. Ауэ махуэм махуэ кIэлъыкIуэт, щIалэ цIыкIур елIалIэ пэтми мывэр и пIэм хуигъэкIтэкъым, къиIэтын дэнэ къыщына. Щыхуаби, щыщIыIи, щыуэшхи, щыуэси мывэр игъэкIуэтэным пылът. Зэи губжьти, псори хыфIидзэну телъадэт.
«Мыхьэнэ иIэкъым! Сыт щIауэ сыпылъ, ауэ зыри къикIкъым, зыми зихъуэжкъым. Мывэр здэщытам щытщ, сэри делафэ къыстоуэ!» — щегупсысри куэдыкIейт. Ауэ, зэгуэр, щIалэ цIыкIур псы гуэлым здыблэкIым, псы гущIыIум тридзэ и сурэтыр къилъэгъуащ. ЗыкъицIыхужакъым. Псы-гъуджэм къищт щIалэ Iэчлъэчышхуэ: и Iэхэр лъэщщ, и плъэкIэр лIы и плъэкIэщ, плIабгъуэщ, лъапэлъагэщ… КIуэ аракъэ, зихъуэжащ. Мывэр и пIэм имыкIауэ зэритми, ар зыгъэхъеину пылъам къыпхуэмыцIыхужыну зихъуэжащ. Апхуэдэщ еджэным и Iуэхури. Зэи къыпщохъу узэджэри, зэбгъащIэри лейуэ, зэгуэрми гъащIэм къыщомыгъэсэбэпыну. Сыт мы псом есщIэнур?—зыботыж упщIэр.
Жэуапыр зыщ: уэ щIэныгъэракъым бгъэкIуатэр, уэ уи щхьэщ ипэкIэ бгъэкIуатэр. Уи акъылым зыбогъэужь. Уи мурадыр зэбгъэхъулIэжыфу хьэл-щэн быдэкIэ зыбопсыхь. Уэ угупсысэу, къыбгурыIуэу, къыхэпхыфу зыбогъасэ. ИкIи зэгуэр плъагъунущ: зыбужьащ, къарууфIэ ухъуащ. Ухуэхьэзырщ бгыри бгъэкIуэтэну, умыцIыхуам ухунэсыну, щIэр къэбгъэIэрыхуэну! Псори уэ уи IэмыщIэщ зэрылъыр, уэращ зэлъытар!
Больше на Черкес хэку
Подпишитесь, чтобы получать последние записи по электронной почте.
