И ехъулIэныгъэм дрогушхуэ

Лъэпкъыбзэхэм я Махуэм и щӏыхькӏэ, «Бессмертие народа в его языке» фӏэщыгъэцӏэм щӏэту, КъэбэрдейБалъкъэр Республикэм, Бэрбэч Хь. и цӏэр зезыхьэ къэрал университетым лэжьыгъэ убгъуа щекӏуэкӏащ. Мазаем и 10-м щӏидзэри, гъатхэпэм и 14-м нэгъунэ екӏуэкӏащ лъэпкъхэм я бзэхэр, я тхыбзэр хъума хъуным, гъэбэгъуэным, зегъэужьыным теухуауэ щыта лэжьыгъэр Гулъытэ хэха хуащӏащ литературэмрэ щэнхабзэмрэ я ӏуэхущӏэ цӏэрыӏуэ, мы гъэм зи юбилейхэр дгъэлъапӏэ Шортэн Асчэрбий, Щоджэнцӏыкӏу ӏэдэм, Шахмурзаевэ Саидэ, Геттуев Мыхьэмэт сымэ я къалэмыпэхэм къыщӏэкӏа тхыгъэхэм.

Программэм къызэщӏиубыдащ еджакӏуэхэмрэ студентхэмрэ я къэхутэныгъэ, творческэ лэжьыгъэ зэхьэзэхуэхэр, лекцэхэр, зэпсэлъэныгъэхэр, мастер-классхэр. Еджакӏуэхэм папщӏэ япэ махуэм нэгузыужьхэр къызэрагъэпэщащ. Студентхэм драгъэкӏуэкӏащ «Доброе слово — мудрость народа» дерсхэр.

Зэхьэзэхуэ лэжьыгъэхэр очнэуи, заочнэуи екӏуэкӏащ. Нэхъыфӏхэр къыхагъэщащ, щӏыхь тхылъхэмрэ фэеплъ саугъэтхэмрэ хуагъэфэщащ. Зэхьэзэхуэм и иужьрей махуэм, гъатхэпэм и 14-м махуэщӏ концертышхуэ, текӏуахэр утыкум ишэн ӏыхьэр зэфӏагъэкӏащ. Зэхьэзэхуэм и къызэгъэпэщакӏуэу щытащ Цӏыпӏынэ Аслъэн и цӏэр зезыхьэ адыгэ щэнхабзэмкӏэ Купсэмрэ Отаров К. и цӏэр зезыхьэ балъкъэр щэнхабзэмкӏэ Купсэмрэ. Ди гуапэу къыхэдгъэщынщ мыхьэнэшхуэ зиӏэ Iуэхум ди лъэпкъэгъу, ди хэгъуэгум икӏа пщащэ зэрыхэтар, хэтам къыщымынэу — гулъытэ къызэрызыхуригъэщӏар, бжьыпэри иӏыгъыу къызэрытхуигъэзэжар

. Ар — Зеикъуэ курыт еджапӏэм и еджакӏуэ, е 5-нэ классым хэс Къумыкъу Ясминэщ. Пщащэр хэлэжьащ «Творческие работы» номинацэм щӏэта, е 5-8- нэ классхэм я еджакӏуэхэр здызэпеуа зэхьэзэхуэм. Ясминэ и лэжьыгъэр хуабжьу екӏуу утыку ирихьащ икӏи и егугъуныгъэ, и щӏэныгъэ лъагэу къалъытэри, е 2-нэ бжьыпэ увыпӏэр къыхуагъэфэщащ. Жыӏэпхъэщи, пщащэ гурыхуэ цӏыкӏум хэлъ зэчийм и закъуэкъым абыкӏэ къигъэлъэгъуар, атӏэ и бзэм, и лъэпкъым хуиӏэ гудзакъэ, зэхэщӏыкӏ, жэуаплыгъэ лъагэри наӏуэ къытхуищӏащ.

Я еджакӏуэм иримыгушхуэкӏэ къанэкъым зи нэӏэм щӏэт егъэджакӏуэ гупыр, зэрыеджапӏэу. — Ясминэ япэ классым къыщыщӏэдзауэ «5» защӏэ-кӏэ йоджэ. Абы къинэмыщӏауэ, лъэ ныкъуэ куэдым дехьэх — къофэ, усэ къоджэ, шахмат мэджэгу. Мы махуэхэм жыджэру хэтащ «Живая классика» Урысейпсо зэхьэзэхуэм и еджапӏэкӏуэцӏ ӏыхьэм икӏи бжьыпэр къыщихьащ. Адэкӏэ хэтынущ районкӏуэцӏ зэхьэзэхуэгъуэм, — дыщегъэгъуазэ Зеикъуэ курыт еджапӏэм и унафэщӏ Уэрзэлы Ларисэ. Езы цӏыкӏуми депсэлъащ икӏи, фэрыщӏыгъэншэу, дымыгъэщӏагъуэкӏэ къэнакъым и гупсысэкӏэ гъэхуамрэ и псэлъэкӏэ зэгъэкӏуамрэ.

— Университетым щекӏуэкӏа зэхьэзэхуэм сызэрыхэтар творческэ лъэныкъуэщ. Къыхэсхар Щоджэнцӏыкӏу ӏэдэм и тхыгъэщ. Ар къыхэсхын щӏэхъуам и щхьэусыгъуэр ди бзэр мыкӏуэдыжыным, тӏэпымыхуным сытогузэвыхьри аращ. Си къару къихькӏэ хэлъхьэныгъэ хуэсщӏыну сыхуейщ си анэдэлъхубзэм и зыужьыныгъэм. Мащӏэкъым сыздихьэхыр, ауэ псом нэхърэ нэхъ сфӏэфӏщ усэ сыкъеджэныр, литературэр. Къэбэрдей-Балъкъэр университетым щекӏуэкӏа зэхьэзэхуэм хэгъуэгу зэхуэмыдэхэм къикӏа еджакӏуэ куэд хэтащ. Дызэрыцӏыхуащ, ди еджэкӏэ, дызыдихьэх, тфӏэгъэщӏэгъуэнхэмкӏэ дызэпсэлъащ. А псори сигу ирихьащ, дяпэкӏи апхуэдэ утыкухэм сихьэну сыхуейщ икӏи сыхущӏэкъунущ, — балигъ псалъэщ е 5-нэ классым хэс пщащэ гурыхуэ цӏыкӏум къыджиӏар. Къумыкъу Ясминэ утыкум къызэрехъуэхъуари, и унэтӏакӏуэ, егъэджакӏуэ гупыр къызэрыщыгугъри хьэкъщ — дяпэкӏи нэхъыбэжым, нэхъ лъагэжым хущӏыхьэнращи, дэри абыкӏэ пщащэм дохъуэхъу.

ТУАРШЫ Ирэ