Хыр ткIуэпсурэ зэхолъадэ

Дунейм къытехьащ Урысей Федерацэм и тхакIуэхэм я Союзым хэт, усакIуэ Братковэ Татьянэ Николаевнэ и тхылъыщIэ. «ТкIуэпс цIыкIухэр» («Капельки») зыфIища къыдэкIыгъуэм итщ «миниатюрэ» усэ цIыкIухэр. Усэ къэси «пщIэрэ щхьэрэ иIэу» и напэкIуэцI щхьэхуэ лъысащ. Авторым тхылъыр къызэрызэIуих пэублэ псалъэм щыщIоупщIэ: — ТкIуэпсыр мащIэ хьэмэрэ куэд? А тхылъым ит, сатыр зыбжанэ нэхъ мыхъу усэхэр а упщIэм и жэуап хъууэ къэплъытэми угъуэщэнукъым. УсакIуэм къытхуеIуатэ гъащIэр напIэ дэхьеигъуэурэ зэрызэхуэсыр, хыр ткIуэпсткIуэпсурэ зэрызэхэлъадэр. Дыкъыхуреджэ ди гъащIэм и дэтхэнэ напIэзыпIэми пщIэ хуэтщIыну, дэтхэнэ псы ткIуэпсми и IэфIыр зыхэтщIэну. Зэман зэхуэмыдэхэм итхауэ, тхылъым ихуа усэ цIыкIухэр гъатхэ пщэдТхылъыщIэ Хыр ткIуэпсурэ зэхолъадэ джыжь уэсэпс ткIуэпсхэу зэщIоцIыуэ. ЦIыкIум гу лъызытэм инри елъагъу, напIэзыпIэм пщIэ хуэзыщIу псэум и гъащIэри мыхьэнэкIэ гъэнщIа мэхъу. Тхылъыр къызэIузых «ТкIуэпс цIыкIухэр» («Капельки») усэм кIэщIрэ псынщIэу къытхуетIэщI дунейр зэрызэхэлъымрэ гъащIэм и мыхьэнэмрэ: Фи фIэщ фымыщI, цIыхуитI зэхуэдэу, Дэтхэнэми къегъанэ и лъэужь. Пщэдей къыдэжьэр махуэ хьэмрэ жэщ? Жэуап къыдет къэдгъащIэ далэм. ТхакIуэр мэгугъэ тхылъым еджэ дэтхэнэми усыгъэ цIыкIухэм дунеишхуэм и дахагъэр, и мыхьэнэ иныр халъэгъуэну. Татьянэ Николаевнэ гъащIэм и «ткIуэпс цIыкIухэм» пщIэ яхуищIу ягъэсащ абы и тхылъхэр зытриухуауэ щыта цIыху цIэрыIуэхэм. Псалъэм къыдэкIуэу жытIэнщи, апхуэдэщ (мелиоратор) бэлыхьу щыта, усакIуэм и адэ Николай Михайлович, япэ космонавт Гагарин Юрий, нэмыцэхэм зэхакъута ленинград мафIэгум псэууэ къикIа Зимневэ Иринэ. Апхуэдэщ абы итха икIи къыдигъэкIа романипщIым, повестибгъум, рассказхэр зэрыт сборникым, усэхэм къыщыгъэлъэгъуа нэгъуэщI цIыху къызэрымыкIуэхэри. Дэри шэч къытетхьэкъым мы тхылъым щIэджыкIакIуэхэр куэду зэригъуэтынум, ахэр арэзы зэрищIынум. Гъуэгу махуэ утихьэ, тхылъыщIэ!

Зыгъэхьэзырар ДЭБАГЪУЭ Хьэтызэщ