Хуэныкъуэм уи дамэр щIэгъакъуэ

СВО-м хэт зауэлIхэм, абыхэм я унагъуэхэм защIэгъэкъуэным ехьэлIауэ, КъэрэшейЧеркесым и Iэтащхьэ Темрезов Рэшид и унафэм щIэту, зэрыреспубликэу екIуэкIа псапащIэ акцэм жыджэру хэтащ Хьэбэз районри. «Копилка Победы» псапащIэ концертышхуэ къыщызэрагъэпэщащ Хьэбэз дэт щэнхабзэмкIэ Уардэ Унэм. «Копилка Победы»- р районым щыпсэухэм я зэкъуэтыныгъэм и нагъыщэ нэху хъуащ. Концертым къекIуэлIащ властым и лIыкIуэхэр, ведомствэхэм, IуэхущIапIэхэм, организацэхэм я унафэщIхэр, районым щыпсэухэр. Залым увыпIэ щхьэхуэ щаубыдащ СВО- м хэт лIы хахуэхэмрэ абыхэм я унагъуэхэмрэ. Къызэхуэсахэм псалъэ гуапэкIэ захуигъэзащ Хьэбэз муниципальнэ районым и Советым и унафэщI Тэмазэ Рэмэзан. Абы къыхигъэщащ Хэкум и хъумакIуэхэм щIыхьрэ хахуагъэрэ яхэлъу ди къэкIуэнум къимыкIуэту зэрыпэрытыр. — Ди Президентым сыт щыгъуи къыхегъэщ лъэпкъхэм я зэкъуэтыныгъэр ди къэралым и къару нэхъыщхьэу зэрыщытыр. Сыт хуэдэ Iуэху хьэлъэ районыр дыпэщIэмыувами, мис мыпхуэдэу дызэрыубыду, ди зауэлIхэм щIэгъэкъуэн дазэрыхуэхъуным хэти дыхущIэкъун хуейщ. Нобэрей псапащIэ концертри аращ зыхуэунэтIар — зэуапIэм Iут ди щIалэхэм ТекIуэныгъэр я Iэрылъхьэу нэхъ щIэх къытхуэкIуэжынращ, — жиIащ властым и къулыкъущIэм. КъекIуэлIахэмрэ псапащIэ концертыр зи жэрдэмхэмрэ фIыщIэ псалъэкIэ захуигъэзащ спецоперацэм и зауэлI, «Суворова», «За отвагу», «Участник специальной военной операции» медалхэр къызыхуагъэфэща, Куэш-Хьэблэ щыщ ЩакIуэ Беслъэн. Хьэбэз районым и щэнхабзэ къудамэм и лэжьакIуэхэм, артист зэчиифIэхэм, уэрэджыIэхэм утыкум зыкъыщагъэлъэгъуащ: Пхъэш Азэмэт, Тхьэкъуахъуэ Расул, Токъубай Къэхъун, Хъупсырокъуэ Мурат, Лахъу Данэ, Туаршы Амир, Адэмокъуэ Ахьмэд сымэ; «Черкесия», «Iэдииху», «Юность Кавказа» ансамблхэм я къафэхэмкIэ пшыхьыр нэхъри ягъэдэхащ. Концертым къыхэкIа ахъшэмрэ районым къыбгъэдэкIа гуманитар дэIэпыкъуныгъэмрэ ди зауэлIхэм икIэщIыпIэкIэ Iэрагъэхьэжынущ. Ди фIэщ мэхъу, ди къарур зэхэтлъхьэмэ, куэд щIауэ дызыпэплъэ ТекIуэныгъэр гъунэгъу зэрытщIынур! АСЛЪЭНЫКЪУЭ Мадинэ